വാവ വളരാനും ബുദ്ധിയ്ക്കും ഹോംമേഡ് കുറുക്ക്

14 ചേരുവകള്‍

14 ചേരുവകള്‍ ഉപയോഗിച്ചാണ് ഈ പ്രത്യേക കുറക്കു തയ്യാറാക്കുന്നത്. ഇതില്‍ ധാന്യങ്ങളും ഡ്രൈ നട്‌സും മസാലയുമെല്ലാം ഉള്‍പ്പെടുന്നു. ഈ മസാലകള്‍ ചേര്‍ക്കുന്നത് കുഞ്ഞിന്റെ പ്രതിരോധ ശേഷി നല്‍കാനും വയറിന്റെ ആരോഗ്യത്തിനുമെല്ലാം ഏറെ നല്ലതാണ്.

പ്രത്യേക കുറുക്കുപൊടി

ബ്രൗണ്‍ അരി, റാഗി, ഗോതമ്പ്, ബദാം, പിസ്ത, ചെറുപയര്‍, കടല, കടലപ്പരിപ്പ്, കപ്പലണ്ടി, കുരുമുളക്, അയമോദകം, ജീരകം, വേപ്പില, ഇഞ്ചി എന്നിവയാണ് ഈ പ്രത്യേക കുറുക്കുപൊടി തയ്യാറാക്കാന്‍ വേണ്ടത്.

ബ്രൗണ്‍ അരി

ബ്രൗണ്‍ അരി, കപ്പലണ്ടി തൊലി കളഞ്ഞത്, കടലപ്പരിപ്പ്, ചെറുപയര്‍, കടല, ബദാം, പിസ്ത എന്നിവയെല്ലാം 50 ഗ്രാം വീതം, ഗോതമ്പ് 125 ഗ്രാം, റാഗി 500 ഗ്രാം എന്നിവയാണ് ഈ പ്രത്യേക കുറുക്കു പൊടി തയ്യാറാക്കാന്‍ വേണ്ടത്. ഇതിനു പുറമേ കറിവേപ്പില എണ്ണ ചേര്‍ക്കാതെ വറുത്തത് ഒരു പിടി, ഇഞ്ചി 1 കഷ്ണം, കുരുമുളക് 1 ടീസ്പൂണ്‍, അയമോദകം 15 ഗ്രാം, ജീരകം 15 ഗ്രാം എന്നിവയും വേണം.

റാഗി

റാഗിയില്‍ കാല്‍സ്യം ധാരാളമായി അടങ്ങിയിരിക്കുന്നതിനാല്‍ അവ അസ്ഥികളെ ശക്തിപ്പെടുത്താന്‍ സഹായിക്കും. കുട്ടികള്‍ക്ക് സ്വാഭാവികമായി അയേണ്‍ നല്‍കുന്ന, ഇതു വഴി വിളര്‍ച്ച തടയുന്ന ഒന്നു കൂടിയാണിത്.

ബദാം

മുതിര്‍ന്നവര്‍ക്കു മാത്രമല്ല, കുട്ടികള്‍ക്കും നല്‍കാവുന്ന നല്ലൊരു ഭക്ഷണവസ്തുവാണ് ബദാം. ആരോഗ്യപരമായ ഗുണങ്ങള്‍ ഏറെ കുട്ടികള്‍ക്കു നല്‍കുന്ന ഇത് വളരുന്ന പ്രായത്തില്‍ കുട്ടികള്‍ക്കു ലഭിയ്‌ക്കേണ്ടുന്ന പല പോഷകങ്ങളും നല്‍കുന്നു. ബദാമിലെ ഫോസ്ഫറസ് കുട്ടികളുടെ എല്ലിന്റെയും പല്ലിന്റെയും ആരോഗ്യത്തിന് ഏറെ പ്രധാനമാണ്.ബദാമിലെ ആല്‍ക്കലി പ്രതിരോധശേഷി വളര്‍ത്താന്‍ ഏറെ നല്ലതാണ്.ഇതിലെ എല്‍ കാര്‍ട്ടിനൈന്‍, റൈബോഫ്‌ളേവിന്‍ എന്നിവ തലച്ചോറിന്റെ വികാസത്തിന് ഏറെ ഉത്തമമാണ്.

ചെറുപയര്‍

പ്രോട്ടീന്‍ സമ്പുഷ്ടമാണ് ചെറുപയര്‍. മസിലുകള്‍ക്കു ബലം വരുന്നതിനും തലച്ചോറിന്റെ വളര്‍ച്ചയ്ക്കും ശരീര വളര്‍ച്ചയ്ക്കുമെല്ലാം അത്യാവശ്യം. ദിവസവും കുട്ടിയ്ക്കു ചെറുപയര്‍ നല്‍കുന്നത് പ്രോട്ടീന്‍ ആവശ്യം ഒരു പരിധി വരെ പൂര്‍ത്തീകരിയ്ക്കാന്‍ സഹായിക്കും.തൂക്കം വര്‍ദ്ധിപ്പിയ്ക്കാനും അമിത വണ്ണമില്ലാതെ പുഷ്ടി ലഭിയ്ക്കാനും ചെറുപയര്‍ ഏറെ നല്ലതാണ്.

പിസ്ത

പിസ്തയിലും ധാരാളം പ്രോട്ടീന്‍ അടങ്ങിയിട്ടുണ്ട്. 100 ഗ്രാം പിസ്തയില്‍ 20 ഗ്രാം പ്രോട്ടീനുണ്ട്. ധാരാളം ഊര്‍ജം നല്‍കുന്ന ഇത് വൈറ്റമിനുകളുടേയും ഡയറ്റെറി ഫൈബറിന്റേയും നല്ലൊരു ഉറവിടാണ്. കുട്ടികള്‍ക്ക് ഊര്‍ജസ്വലത നല്‍കുന്ന ഒന്നു കൂടിയാണ് ഇത്. പ്രതിരോധ ശേഷിയ്ക്കും നല്ലതാണ്.

കടലയും കടലപ്പരിപ്പുമെല്ലാം

ഇതുപോലെ കടലയും കടലപ്പരിപ്പുമെല്ലാം പ്രോട്ടീന്‍, വൈറ്റമിന്‍ സമ്പുഷ്ടമാണ്. ആരോഗ്യകരമായ തൂക്കം നില നിര്‍ത്തുന്നവയാണ് ഇവ. ശരീരത്തിനു മറ്റു പല ഗുണങ്ങള്‍ നല്‍കുന്നവയും

കപ്പലണ്ടി

കപ്പലണ്ടി അഥവാ നിലക്കടലയും പ്രോട്ടീന്‍, വൈറ്റമിന്‍ സമ്പുഷ്ടമാണ്. ഇതിന്റെ തൊലി കളഞ്ഞു വേണം, കുട്ടികള്‍ക്കുള്ള ഈ കുറക്കില്‍ ഉപയോഗിയ്ക്കാന്‍. കപ്പലണ്ടിയില്‍ 2.5 ഗ്രാം നാരുകളുണ്ട്‌. നമ്മുടെ ശരീരത്തിന്‌ ഒരു ദിവസം വേണ്ട നാരിന്റെ 10 ശതമാനം.ആന്റിഓക്‌സിഡന്റുകള്‍, വൈറ്റമിന്‍ ഇ എന്നിവയുടെ നല്ലൊരു ഉറവിടമാണ്‌ പുഴുങ്ങിയ കപ്പലണ്ടി.

കുരുമുളക്

ബാക്കിയുള്ള കുരുമുളക്, അയമോദകം, ജീരകം, കറിവേപ്പില, ഇഞ്ചി തുടങ്ങിയ ചേരുവകള്‍ ദഹനത്തിനും പ്രതിരോധ ശേഷി വര്‍ദ്ധിപ്പിയ്ക്കാനും മറ്റ് ഒരു പിടി ആരോഗ്യ ഗുണങ്ങള്‍ നല്‍കാനും ഏറെ നല്ലതാണ്.

ഇവയെല്ലാം

ഇവയെല്ലാം കൂടി ഉണക്കുക. വെയിലില്‍ വച്ചും ഉണക്കാം. നല്ല പോലെ ഉണക്കിപ്പൊടിച്ച് വായു കടക്കാത്ത ടിന്നില്‍ അടച്ചു വയ്ക്കാം. ഇതില്‍ നിന്നും ആവശ്യത്തിന് എടുത്ത് പാലിലോ അല്ലെങ്കില്‍ വെള്ളത്തിലോ പനംചക്കരയോ കല്‍ക്കണ്ടമോ ചേര്‍ത്തു കുറുക്കി നല്‍കാം. വെള്ളമാണ് നല്ലത്. പാലാണ് ഉപയോഗിയ്ക്കുന്നതെങ്കില്‍ ഇതിനിരട്ടി വെള്ളം കൂടി ചേര്‍ത്തു വേണം, കുറുക്കുണ്ടാക്കാന്‍.

ഈ പ്രത്യേക ചേരുവ

ഈ പ്രത്യേക ചേരുവ കുട്ടിയുടെ ശരീരത്തിന്റെ മാത്രമല്ല, തലച്ചോറിന്റെ വളര്‍ച്ചയ്ക്കും ഏറെ പ്രധാനമാണ്. പ്രതിരോധ ശേഷിയ്ക്കും ഊര്‍ജത്തിനുമെല്ലാം സഹായിക്കുന്ന പ്രത്യേക കുറുക്കു പൗഡറാണിത്.