പോഷകാഹാര വാരം: കുട്ടികളുടെ ബുദ്ധിക്കും വളര്‍ച്ചയ്ക്കും വേണം ഈ പോഷണക്രമം

പോഷകാഹാര വാരം

എല്ലാ വര്‍ഷവും ഇന്ത്യയില്‍ സെപ്റ്റംബര്‍ ഒന്ന് മുതല്‍ ഏഴുവരെ ദേശീയ പോഷകാഹാര വാരമായി ആചരിക്കുന്നു. കുട്ടികള്‍, കൗമാരക്കാര്‍, ഗര്‍ഭിണികള്‍, മുലയൂട്ടുന്ന അമ്മമാര്‍ എന്നിവരില്‍ പോഷകത്തിന്റെ പ്രാധാന്യം എത്തിക്കുകയെന്ന ലക്ഷ്യത്തോടെയാണ് ഈ വാരാചരണം നടത്തുന്നത്.

കുട്ടികളുടെ പോഷണം

മുതിര്‍ന്നവര്‍ക്കുള്ള പോഷകാഹാരത്തിന്റെ അതേ തത്വങ്ങളെ അടിസ്ഥാനമാക്കിയുള്ളതാണ് കുട്ടികള്‍ക്കുള്ള പോഷകാഹാരവും. എല്ലാവര്‍ക്കും ഒരേ തരത്തിലുള്ള പോഷകങ്ങള്‍ ആവശ്യമാണ്. വിറ്റാമിനുകള്‍, ധാതുക്കള്‍, കാര്‍ബോഹൈഡ്രേറ്റ്‌സ്, പ്രോട്ടീന്‍, കൊഴുപ്പ് എന്നിവ കുട്ടികള്‍ക്കും പ്രധാനമാണ്. എന്നിരുന്നാലും, വ്യത്യസ്ത പ്രായത്തിലുള്ള കുട്ടികള്‍ക്ക് വ്യത്യസ്ത അളവില്‍ പ്രത്യേക പോഷകങ്ങള്‍ ആവശ്യമാണ്. നിങ്ങളുടെ കുട്ടിയുടെ വളര്‍ച്ചയ്ക്കും വികാസത്തിനും ഉത്തേജനം നല്‍കുന്ന പോഷകാഹാരക്രമം എന്തെന്ന് നമുക്ക് നോക്കാം.

പ്രഭാതഭക്ഷണം

ആരോഗ്യകരമായ പ്രഭാതഭക്ഷണം കഴിക്കുന്നത് പകല്‍ സമയത്ത് കുട്ടികള്‍ക്ക് കൂടുതല്‍ ഊര്‍ജ്ജവും ജാഗ്രതയും നല്‍കുന്നുവെന്ന് ഗവേഷണങ്ങള്‍ പറയുന്നു. പ്രഭാതഭക്ഷണത്തില്‍ കാര്‍ബോഹൈഡ്രേറ്റ്, പനീര്‍, മുട്ട, സാന്‍ഡ് വിച്ച് പോലുള്ള പ്രോട്ടീന്‍ അടങ്ങിയ ഭക്ഷണങ്ങള്‍ ഉള്‍പ്പെടുത്തണം. കുട്ടികള്‍ക്ക് പാലും ധാന്യങ്ങളും പഴങ്ങളും നട്‌സും നല്‍കുക. ഇവ ദിവസം മുഴുവന്‍ ഊര്‍ജ്ജസ്വലത നിലനിര്‍ത്താന്‍ ആവശ്യമായ പോഷകാഹാരമാണ്.

ഉച്ചഭക്ഷണത്തിന്

ഉച്ചഭക്ഷണത്തിലും അത്താഴത്തിലും പരിപ്പ് അല്ലെങ്കില്‍ പയര്‍, നോണ്‍ വെജിറ്റേറിയന്‍ ഭക്ഷണം, റൊട്ടി, ചപ്പാത്തി, അരി, പച്ചക്കറികള്‍, സാലഡ്, തൈര് എന്നിവ ഉള്‍പ്പെടുത്തണം. ഈ ഭക്ഷണത്തില്‍ കാര്‍ബോഹൈഡ്രേറ്റുകള്‍, പ്രോട്ടീന്‍, വിറ്റാമിനുകള്‍, ഇരുമ്പ്, മഗ്‌നീഷ്യം തുടങ്ങിയ അവശ്യ ധാതുക്കള്‍ അടങ്ങിയിട്ടുണ്ട് ഇത് കുട്ടിയുടെ വളര്‍ച്ചയ്ക്കും മൊത്തത്തിലുള്ള ആരോഗ്യത്തിനും നല്ലതാണ്.

ലഘുഭക്ഷണം

വീട്ടില്‍ നില്‍ക്കുമ്പോള്‍ കുട്ടികള്‍ക്ക് ഇടയ്ക്കിടെ വിശപ്പ് അനുഭവപ്പെടുകയും ലഘുഭക്ഷണം കഴിക്കുകയും ചെയ്യുന്നത് പതിവാണ്. ഇത്തരം അവസരത്തില്‍ എണ്ണമയമുള്ളതോ വറുത്തതോ ആയ ഭക്ഷണ ഇനങ്ങള്‍ ഒഴിവാക്കുക. അവ കുട്ടികള്‍ക്ക് ദഹിക്കാന്‍ പ്രയാസമാണ്, കൂടാതെ ഇത്തരം ലഘുഭക്ഷണങ്ങള്‍ കൂടുതല്‍ കഴിച്ചാല്‍ അനാവശ്യമായി ശരീരഭാരവും വര്‍ദ്ധിപ്പിക്കും. വളരെയധികം പഞ്ചസാര അടങ്ങിയ ഭക്ഷണങ്ങള്‍, മധുരപലഹാരങ്ങള്‍, ചോക്ലേറ്റുകള്‍ എന്നിവയും ഒഴിവാക്കണം.

കൊഴുപ്പ്

കൊഴുപ്പുകള്‍ ശരീരത്തിന് ഊര്‍ജ്ജം നല്‍കുന്നു. പ്രത്യേകിച്ച്, തലച്ചോറും നാഡീവ്യവസ്ഥയും സാധാരണഗതിയില്‍ വികസിക്കാന്‍ സഹായിക്കുന്നതിന് കുട്ടികളുടെ ഭക്ഷണത്തില്‍ അവ ആവശ്യമാണ്. ശരീരത്തിന് ഇന്ധനം നല്‍കുന്നതിനു പുറമേ, ചില വിറ്റാമിനുകള്‍ ആഗിരണം ചെയ്യാനും അവ ശരീരത്തെ സഹായിക്കുന്നു. എന്നാല്‍ എണ്ണ, നെയ്യ്, ചീസ്, വെണ്ണ എന്നിവ മിതമായ അളവില്‍ മാത്രം കഴിക്കണം. കുട്ടികള്‍ക്ക് ഒരു ദിവസം രണ്ട് തരം പഴങ്ങള്‍ നല്‍കണം. എല്ലാ ഭക്ഷണത്തിലും പച്ചക്കറികള്‍ ഉള്‍പ്പെടുത്തണം.

പ്രോട്ടീന്‍

സീഫുഡ്, ലീന്‍ മീറ്റ്, കോഴി, മുട്ട, ബീന്‍സ്, കടല, സോയ ഉല്‍പന്നങ്ങള്‍, ഉപ്പിടാത്ത നട്‌സ്, വിത്തുകള്‍ എന്നിവ കുട്ടികള്‍ക്ക് നല്‍കുക.

ധാന്യങ്ങള്‍

കുട്ടികള്‍ക്ക് ഗോതമ്പ് റൊട്ടി, ഓട്‌സ്, ക്വിനോവ എന്നിവ പോലുള്ള ധാന്യങ്ങള്‍ കഴിക്കാന്‍ നല്‍കുക.

പാല്‍, പാല്‍ ഉല്‍പന്നങ്ങള്‍

പാല്‍, തൈര്, ചീസ് അല്ലെങ്കില്‍ സോയ പാനീയങ്ങള്‍ പോലുള്ള കൊഴുപ്പില്ലാത്ത അല്ലെങ്കില്‍ കൊഴുപ്പ് കുറഞ്ഞ പാലുല്‍പ്പന്നങ്ങള്‍ കഴിക്കാന്‍ നിങ്ങളുടെ കുട്ടിയെ പ്രോത്സാഹിപ്പിക്കുക.

കൃത്രിമ പഞ്ചസാര ഒഴിവാക്കുക

കൃത്രിമ പഞ്ചസാര അടങ്ങിയ ആഹാര സാധനങ്ങള്‍ കഴിക്കുന്നത് കുറയ്ക്കുക. ആഡഡ് ഷുഗറിന് ഉദാഹരണങ്ങളാണ് ബ്രൗണ്‍ ഷുഗര്‍, കോണ്‍ സ്വീറ്റ്‌നര്‍, കോണ്‍ സിറപ്പ്, തേന്‍ തുടങ്ങിയവ. സോഡ, സ്‌പോര്‍ട്‌സ്, എനര്‍ജി ഡ്രിങ്കുകള്‍ തുടങ്ങിയ പഞ്ചസാര ചേര്‍ത്ത പാനീയങ്ങള്‍ ഒഴിവാക്കുക.

സോഡിയം കുറയ്ക്കുക

കുട്ടികള്‍ക്ക് ചെറുപ്പത്തില്‍ തന്നെ വളരെയധികം ഉപ്പ് അടങ്ങിയ ഭക്ഷണങ്ങള്‍ നല്‍കരുത്. പാക്കറ്റ് ഭക്ഷണങ്ങളില്‍ സാധാരണയായി ഉപ്പ് കൂടുതലായിരിക്കും. ഇവയ്ക്ക് പകരം പഴങ്ങളും പച്ചക്കറികളും ലഘുഭക്ഷണമായി നല്‍കുക. കടകളില്‍ നിന്ന് പോഷകാഹാര ലേബലുകള്‍ പരിശോധിച്ച് സോഡിയം കുറഞ്ഞ ഉല്‍പ്പന്നം നോക്കി വാങ്ങുക.