ഉറക്ക തകരാറുകള്‍ പലവിധം; കണ്ടറിഞ്ഞ് ചികിത്സിച്ചില്ലെങ്കില്‍ അപകടം

ഉറക്ക പ്രശ്‌നങ്ങള്‍ എന്നത് സാധാരണയായുള്ള ഉറക്കത്തെ തടസ്സപ്പെടുത്തുകയും സ്ഥിരമായി ഉറങ്ങാനുള്ള കഴിവിനെ ബാധിക്കുകയും ചെയ്യുന്ന അവസ്ഥകളുടെ ഒരു വിഭാഗമാണ്. ആരോഗ്യപ്രശ്നങ്ങള്‍ മൂലമോ അമിത സമ്മര്‍ദ്ദം മൂലമോ ഇന്ത്യയില്‍ ഉറക്കപ്രശ്നങ്ങള്‍ കൂടുതലായിക്കൊണ്ടിരിക്കുകയാണ്. ഒരു സര്‍വേയില്‍ കണ്ടെത്തിയത് 93% ഇന്ത്യക്കാരെയും ഉറക്ക തകരാറുകള്‍ ബാധിക്കുന്നു എന്നാണ്. സമ്മര്‍ദ്ദം, തിരക്കേറിയ ജീവിതശൈലി, മറ്റ് ബാഹ്യശക്തികള്‍ എന്നിവ മിക്ക വ്യക്തികളിലും ഉറക്ക പ്രശ്‌നങ്ങള്‍ക്ക് കാരണമാകുന്നു. ഉറക്ക തകരാറുകളുള്ള ആളുകള്‍ക്ക് ദിവസവും ഉറങ്ങാന്‍ ബുദ്ധിമുട്ട് അനുഭവപ്പെടുന്നു, ഇത്തരക്കാര്‍ക്ക് പകല്‍ സമയത്ത് അത്യധികം ക്ഷീണവും അനുഭവപ്പെടാം.

നിങ്ങളുടെ വികാരങ്ങള്‍, ശ്രദ്ധ, ആരോഗ്യം എന്നിവയെയും ഉറക്ക പ്രശ്‌നങ്ങള്‍ പ്രതികൂലമായി ബാധിക്കും. പല തരത്തിലുള്ള ഉറക്ക തകരാറുകളുണ്ട്. അവയില്‍ ചിലത് ആരോഗ്യപരമായ അവസ്ഥകള്‍ മൂലമാകാം. സാധാരണ ഉറക്ക തകരാറുകളും അവ പരിഹരിക്കേണ്ട ചില വഴികളും വായിച്ചറിയൂ.

ഉറക്കമില്ലായ്മ

ഉറങ്ങാനുള്ള കഴിവില്ലായ്മ കാരണം വരുന്ന ഏറ്റവും സാധാരണമായ ഉറക്ക പ്രശ്‌നങ്ങളില്‍ ഒന്നാണിത്. സമ്മര്‍ദ്ദം, ഉത്കണ്ഠ, ദഹനപ്രശ്‌നങ്ങള്‍, ഹോര്‍മോണുകള്‍ എന്നിവയാല്‍ ഉറക്കമില്ലായ്മ ഉണ്ടാകാം. ഇത് നിങ്ങളുടെ ആരോഗ്യത്തിനും ജീവിത നിലവാരത്തിനും പ്രശ്നമുണ്ടാക്കും. വിഷാദം, ക്ഷോഭം, ശരീരഭാരം കൂടല്‍, ഏകാഗ്രതക്കുറവ് എന്നിവയ്ക്ക് ഇത് കാരണമാകും.

സ്ലീപ്പ് അപ്നിയ

ഒരു വ്യക്തി ഉറങ്ങുമ്പോള്‍ ശ്വാസോച്ഛ്വാസം തടസ്സപ്പെടുന്ന അപകടകരമായ അവസ്ഥയാണ് സ്ലീപ്പ് അപ്‌നിയ. ചികില്‍സിച്ചില്ലെങ്കില്‍, സ്ലീപ് അപ്നിയ ഹൈപ്പര്‍ടെന്‍ഷന്‍, സ്‌ട്രോക്ക്, ഹൃദയപേശികളിലെ കോശങ്ങളുടെ വര്‍ദ്ധനവ്, ഹൃദയസ്തംഭനം, പ്രമേഹം, ഹൃദയാഘാതം എന്നിവയിലേക്ക് നയിച്ചേക്കാം. പ്രധാനമായും രണ്ട് തരത്തിലുള്ള സ്ലീപ് അപ്നിയ ഉണ്ട്. ഒബ്സ്ട്രക്റ്റീവ് സ്ലീപ് അപ്‌നിയയും സെന്‍ട്രല്‍ സ്ലീപ് അപ്‌നിയയും.

റെസ്റ്റ്‌ലസ്സ് ലെഗ് സിന്‍ഡ്രോം

റെസ്റ്റ്‌ലസ്സ് ലെഗ് സിന്‍ഡ്രോം എന്നത് നിങ്ങളുടെ കാലുകള്‍ ചലിപ്പിക്കാനുള്ള അനിയന്ത്രിതമായ പ്രേരണയാണ്. വൈകുന്നേരമോ രാത്രിയോ നിങ്ങള്‍ ഇരിക്കുമ്പോഴോ കിടക്കുമ്പോഴോ ഇത് സാധാരണയായി സംഭവിക്കുന്നു.

പാരസോംനിയ

പാരാസോമ്‌നിയ എന്നത് ഒരു ഉറക്ക തകരാറാണ്. ഉറക്കത്തിന്റെ ഏത് ഘട്ടത്തിലും ഇത് സംഭവിക്കാം.

ഹൈപ്പര്‍സോമ്‌നിയ

ഒരു വ്യക്തി മിക്ക സമയത്തും ഉറങ്ങാനുള്ള പ്രവണത കാണിക്കുന്ന ഒരു അവസ്ഥയാണ് ഹൈപ്പര്‍സോമ്‌നിയ. അമിതമായ പകല്‍ ഉറക്കം അല്ലെങ്കില്‍ അമിതമായ ഉറക്കസമയം എന്നിവയാണ് ലക്ഷണം. ഹൈപ്പര്‍സോമ്‌നിയ അനുഭവിക്കുന്ന ആളുകള്‍ക്ക് ജോലിസ്ഥലത്തോ വാഹനമോടിക്കുമ്പോഴോ എപ്പോള്‍ വേണമെങ്കിലും ഉറങ്ങാം. ഊര്‍ജക്കുറവ്, ഫലപ്രദമായി ചിന്തിക്കാനുള്ള ബുദ്ധിമുട്ട് തുടങ്ങിയ പ്രശ്‌നങ്ങളും അവര്‍ അനുഭവിച്ചേക്കാം.

സര്‍ക്കാഡിയന്‍ റിഥം ഡിസോര്‍ഡര്‍

ഉറക്കം-ഉണര്‍വ് പ്രശ്‌നങ്ങളില്‍ സംഭവിക്കുന്ന ഉറക്ക തകരാറുകളുടെ കൂട്ടമാണിത്. കൃത്യസമയത്ത് ഉറങ്ങാനും എഴുന്നേല്‍ക്കാനും കഴിയാതെ വരുന്നതാണിത്.

രോഗനിര്‍ണയം

ഉറക്ക തകരാറുകള്‍ നിര്‍ണ്ണയിക്കാന്‍ ഉപയോഗിക്കുന്ന വിവിധ പരിശോധനകളാണ്:
പോളിസോംനോഗ്രാഫി - ഓക്‌സിജന്റെ അളവ്, ശരീര ചലനങ്ങള്‍, മസ്തിഷ്‌ക തരംഗങ്ങള്‍, ഹൃദയമിടിപ്പും ശ്വസനവും, കണ്ണിന്റെയും കാലിന്റെയും ചലനം എന്നിവ ഇതില്‍ വിലയിരുത്തുന്നു.
ഇലക്ട്രോഎന്‍സെഫലോഗ്രാം - നിങ്ങള്‍ ഉറങ്ങുന്നതിനേക്കാള്‍ ഉണര്‍ന്നിരിക്കുമ്പോള്‍ തലച്ചോറിന്റെ വൈദ്യുത പ്രവര്‍ത്തനത്തിന്റെ റെക്കോര്‍ഡിംഗാണ് ഇത്.
മള്‍ട്ടിപ്പിള്‍ സ്ലീപ് ലേറ്റന്‍സി ടെസ്റ്റുകള്‍ - പകല്‍ സമയത്ത് സമാധാനപരമായ അന്തരീക്ഷത്തില്‍ എത്ര വേഗത്തില്‍ ഉറങ്ങാന്‍ കഴിയുമെന്ന് നിര്‍ണയിച്ച് അമിതമായ പകല്‍ ഉറക്കം പരിശോധിക്കാന്‍ ഇത് സഹായിക്കുന്നു.

ഉറക്ക തകരാറ് പരിഹരിക്കാന്‍ ജീവിതശൈലി മാറ്റങ്ങള്‍

* വൈദ്യചികിത്സയ്ക്കൊപ്പം ജീവിതശൈലിയിലെ നല്ല മാറ്റങ്ങളും ഉറക്കത്തിന്റെ ഗുണനിലവാരം ഗണ്യമായി മെച്ചപ്പെടുത്തും.
* സമ്മര്‍ദ്ദവും ഉത്കണ്ഠയും കുറയ്ക്കാനും ഉറക്കം മെച്ചപ്പെടുത്താനും പതിവ് വ്യായാമം നിങ്ങളെ സഹായിക്കും.
* ഉറങ്ങാന്‍ സൗകര്യപ്രദമാക്കുന്നതിന് നിങ്ങളുടെ കിടപ്പുമുറിയില്‍ അനുയോജ്യമായ ഉറക്ക അന്തരീക്ഷം സൃഷ്ടിക്കുക
* ഒരേ സമയത്ത് ഉറങ്ങുകയും ഉണരുകയും ചെയ്യുക, നേരത്തേ ഉറങ്ങി നേരത്തേ എഴുന്നേല്‍ക്കുക.
* വൈകുന്നേരങ്ങളില്‍ കഫീന്‍ ഉപഭോഗം പരിമിതപ്പെടുത്തുക
* ആരോഗ്യകരമായ ശരീരഭാരം നിലനിര്‍ത്തുന്നു
* പുകയില, മദ്യം എന്നിവയുടെ ഉപയോഗം ഒഴിവാക്കുക

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.