ഈ ഭക്ഷണങ്ങള്‍ ഒഴിവാക്കൂ; കാന്‍സര്‍ തടയാം

മൈക്രോവേവ് പോപ്‌കോണ്‍

പോപ്‌കോണ്‍ തയ്യാറാക്കുന്ന മൈക്രോവേവ് ബാഗില്‍ പി.എഫ്.ഒ.എ എന്ന ഘടകം നിറഞ്ഞിട്ടുണ്ട്. ഇത് പാന്‍ക്രിയാസ്, വൃക്ക, കരള്‍, മൂത്രസഞ്ചി എന്നിവയുമായി ബന്ധപ്പെട്ട കാന്‍സറിന് കാരണമാണെന്ന് തെളിയിക്കപ്പെട്ടിട്ടുണ്ട്. ബാഗില്‍ പാകം ചെയ്യുമ്പോള്‍, PFOA കോട്ടിങ് പോപ്‌കോണുകളില്‍ പറ്റിപ്പിടിക്കുകയും കഴിക്കുമ്പോള്‍ അത് നമ്മുടെ ശരീരത്തില്‍ എത്തുകയും ചെയ്യുന്നു. മറ്റ് രീതിയില്‍ തയാറാക്കുന്ന പോപ്‌കോണ്‍ എന്നാല്‍ ഈ പ്രശ്‌നത്തിന് കാരണമാകുന്നില്ല.

മദ്യം

മദ്യം അമിതമായാല്‍ ശരീരത്തിന് ഹാനികരമാണെന്ന് അറിയാമല്ലോ? അമിതമായ മദ്യപാനം നിങ്ങളുടെ കരളിനെ നശിപ്പിക്കുകയും വൃക്കകളില്‍ സമ്മര്‍ദ്ദം വര്‍ദ്ധിപ്പിക്കുകയും ചെയ്യുന്നു. അമിതമായ മദ്യപാനം വായ, അന്നനാളം, കരള്‍, വന്‍കുടല്‍, മലാശയം എന്നിവയുടെ കാന്‍സര്‍ സാധ്യത വര്‍ദ്ധിപ്പിക്കുന്നതായി കണ്ടെത്തിയിട്ടുണ്ട്.

പൊട്ടാറ്റോ ചിപ്‌സ്

പൊട്ടാറ്റോ ചിപ്‌സ്, ഫ്രഞ്ച് ഫ്രൈസ് പോലുള്ള ലഘുഭക്ഷണങ്ങള്‍ പലര്‍ക്കും ഇഷ്ടമാണ്. എന്നാല്‍ മനുഷ്യ ശരീരത്തിന് പ്രശ്‌നം സൃഷ്ടിക്കുന്ന ഉപ്പും പൂരിത കൊഴുപ്പും അടങ്ങിയതാണ് ഇവ. ഉയര്‍ന്ന താപനിലയില്‍ വേവിച്ച ഈ ഭക്ഷണത്തില്‍ അര്‍ബുദത്തിന് കാരണമാകുന്ന രാസവസ്തുവായ അക്രിലാമൈഡ് അടങ്ങിയിട്ടുണ്ട്. ഈ രാസവസ്തു സിഗരറ്റിലും കാണപ്പെടുന്നു എന്നും മനസിലാക്കുക.

പ്രോസസ്സ് ചെയ്ത മാംസം

പുകയില്‍ വേവിക്കുന്നതും സംസ്‌കരിച്ചതുമായ മാംസവും കാന്‍സറിനു കാരണമാകുന്ന ഭക്ഷണമാണ്. ഇത്തരം മാംസത്തില്‍ ധാരാളം നൈട്രേറ്റുകള്‍ ഉപയോഗിക്കുന്നതിനാല്‍ അവ കാന്‍സറുമായി ബന്ധപ്പെട്ടിരിക്കുന്നു. ഇവയിലെ ഉയര്‍ന്ന കൊഴുപ്പ് നിങ്ങളുടെ ഹൃദയത്തിനും ദഹനവ്യവസ്ഥയ്ക്കും ദോഷകരമായി കണക്കാക്കപ്പെടുന്നു. ചെറിയ അളവില്‍ നല്ല രീതിയില്‍ പാകം ചെയ്ത മാംസം കഴിക്കുന്നതാണ് ആരോഗ്യത്തിന് ഉത്തമം.

സോഡ/ സോഫ്റ്റ് ഡ്രിങ്ക്

സോഡ ആരോഗ്യത്തിന് ദോഷകരമാണെന്ന് എല്ലാവര്‍ക്കും അറിയാം. അമിതമായി കഴിക്കുമ്പോള്‍ അത് കൊലയാളിയായി മാറുന്നു. സോഡയിലും സോഫ്റ്റ് ഡ്രിങ്കുകളിലും അമിതമായ അളവില്‍ പഞ്ചസാര അടങ്ങിയിട്ടുണ്ട്. ഇത് കാന്‍സര്‍ കോശങ്ങള്‍ വളര്‍ത്തുകയും അപകടസാധ്യത വര്‍ദ്ധിപ്പിക്കുകയും ചെയ്യുന്നു. പോഷകമൂല്യങ്ങള്‍ ഒട്ടുമില്ലാത്ത ഇത്തരം പാനീയങ്ങളില്‍ കൃത്രിമ രാസവസ്തുക്കളും കളറും അടങ്ങിയിട്ടുള്ളതിനാല്‍ ഇവ കഴിക്കുന്നത് നിങ്ങളെ കൂടുതല്‍ അപകടത്തിലാക്കുന്നു.

ടിന്നിലടച്ച ഭക്ഷണം

ടിന്നിലടച്ച ഭക്ഷണം നിങ്ങളുടെ ആരോഗ്യത്തെ മോശമായി ബാധിക്കുന്നു. ഇവയില്‍ അപകടകരമായ കെമിക്കലായ ബി.പി.എ അടങ്ങിയിട്ടുണ്ട്. ഇവ കാന്‍സറുമായി നേരിട്ട് ബന്ധപ്പെട്ടിരിക്കുന്നുവെന്ന് തെളിയിക്കപ്പെട്ടിട്ടുണ്ട്. ഈ ബി.പി.എ പതുക്കെ ശരീരത്തിന് കാന്‍സര്‍ വളര്‍ത്താനുള്ള കാരണമാവുകയും ചെയ്യുന്നു.

അച്ചാര്‍

അച്ചാറിലെ നൈട്രേറ്റ്, ഉപ്പ്, കൃത്രിമ കളറിംഗ് എന്നിവ ആമാശയത്തെയും വന്‍കുടലിനെയും ബാധിക്കുന്ന ദഹനനാള കാന്‍സറുമായി നേരിട്ട് ബന്ധപ്പെട്ടിരിക്കുന്നുവെന്നു കണ്ടെത്തിയിട്ടുണ്ട്. ഇവ നെഞ്ചെരിച്ചിലിനും അള്‍സറിനും കാരണമാകുന്നു. അച്ചാര്‍ വളരെയധികം ഇഷ്ടപ്പെടുന്നുവെങ്കില്‍, സുരക്ഷിതമായിരിക്കാന്‍ വീട്ടില്‍ തന്നെ തയ്യാറാക്കിയവ കഴിക്കുക.

വളര്‍ത്തിയെടുത്ത സാല്‍മണ്‍

സാല്‍മണ്‍ കഴിക്കുന്നത് ആരോഗ്യത്തിന് നല്ലതുതന്നെ. എന്നാല്‍ വളര്‍ത്തിയെടുത്ത സാല്‍മണ്‍ കാന്‍സര്‍ വരാനുള്ള സാധ്യത വര്‍ദ്ധിപ്പിക്കുന്നുവെന്ന് പഠനങ്ങള്‍ തെളിയിച്ചിട്ടുണ്ട്. ഇത്തരം സാല്‍മണില്‍ നിങ്ങളെ കാന്‍സറിനു വിധേയമാക്കുന്ന അര്‍ബുദ രാസവസ്തുക്കള്‍ അടങ്ങിയിട്ടുണ്ട്. ഇവ മാസത്തില്‍ ഒന്നില്‍ കൂടുതല്‍ കഴിക്കരുതെന്നും ആരോഗ്യ വിദഗ്ധര്‍ നിര്‍ദ്ദേശിക്കുന്നു.