വ്യായാമം ചെയ്യാതെ വയര്‍ കുറയ്ക്കാം, അറിയൂ

വെള്ളം

വെള്ളം ശരീരത്തിലെയും വയറ്റിലെയും കൊഴുപ്പു കുറയ്ക്കാന്‍ പറ്റിയ നല്ലൊരു വഴിയാണ്. ധാരാളം വെള്ളം കുടിയ്ക്കുക. ഇതു വഴി ശരീരത്തിലെ അമിതമായ കൊഴുപ്പു പുറന്തള്ളപ്പെടുന്നു. ഇതു വയറു കുറയാനും നല്ലതാണ്. നല്ല ശോധന നല്‍കുന്നു, ദഹനം നല്‍കുന്നു, വയറ്റിലെ ടോക്‌സിനുകള്‍ പുറന്തള്ളപ്പെടുന്നു. ഇതെല്ലാം തന്നെ വയര്‍ കുറയാന്‍ സഹായിക്കുന്ന വഴികളാണ്. ഇതുപോലെ ഭക്ഷണത്തിന് അര മണിക്കൂര്‍ മുന്‍പ് അര ലിറ്റര്‍ വെള്ളം കുടിയ്ക്കുന്നത് ഭക്ഷണത്തിന്റെ അളവും വിശപ്പുമെല്ലാം കുറയ്ക്കും. ഇതും വയര്‍ കുറയ്ക്കാന്‍ സഹായിക്കുന്ന ഒന്നാണ്.

ചെറുചൂടുള്ള നാരങ്ങാവെള്ളം

ചെറുചൂടുള്ള നാരങ്ങാവെള്ളം വെറുംവയറ്റില്‍ കുടിച്ചു ദിവസം തുടങ്ങാം. നാരങ്ങയിലെ വൈറ്റമിന്‍ സി, പെക്ടിന്‍, സിട്രിക് ആസിഡ് എന്നിവയെല്ലാം തന്നെ വയറ്റിലെ കൊഴുപ്പു പുറന്തള്ളുവാന്‍ സഹായിക്കുന്ന ഒന്നാണ്. നാരങ്ങാവെള്ളം കുടിയ്ക്കുവാന്‍ മടിയെങ്കില്‍ ഒരു ഗ്ലാസ് ചൂടുവെള്ളം കുടിച്ചു ദിവസം തുടങ്ങുക. ചൂടുവെള്ളം ശരീരത്തിലെ ഊഷ്മാവ് വര്‍ദ്ധിപ്പിയ്ക്കും, ഇത് അപചയ പ്രക്രിയ ശക്തിപ്പെടുത്തി കൊഴുപ്പു കത്തിച്ചു കളയാന്‍ സഹായിക്കും. ഇതെല്ലാം തന്നെ വയര്‍ കുറയ്ക്കാന്‍ സഹായിക്കുന്ന ഘടകങ്ങളാണ്.

വയര്‍ കൂടാന്‍ പ്രധാന കാരണം

വയര്‍ കൂടാന്‍ പ്രധാന കാരണം പലരുടേയും അത്താഴ ശീലമാണ്. വൈകി അത്താഴം കഴിയ്ക്കുന്നത്, വയര്‍ വല്ലാതെ നിറയും വിധത്തില്‍ കഴിയ്ക്കുന്നത്, കാര്‍ബോഹൈഡ്രേറ്റുകളും കൊഴുപ്പും അടങ്ങിയ ഭക്ഷണം രാത്രി കഴിയ്ക്കുന്നത് എല്ലാം തന്നെ വയര്‍ ചാടാന്‍ വഴിയൊരുക്കും. അത്താഴം കഴിവതും നേരത്തേയാക്കുക. പറ്റുമെങ്കില്‍ 7-8നുള്ളില്‍ തന്നെ. പിന്നീട് യാതൊന്നും കഴിയ്ക്കരുത്. അത്താഴം കഴിഞ്ഞയുടന്‍ പല്ലു തേയ്ക്കുന്നത് വീണ്ടും ഭക്ഷണം കഴിയ്ക്കുന്നതു തടയാനുള്ള സൈക്കോളജിക്കള്‍ മാര്‍ഗമാണ്. അരവയര്‍ അത്താഴം ശീലമാക്കുക. ഇതിനു ശേഷം ഒരു മണിക്കൂറെങ്കിലും കഴിഞ്ഞുറങ്ങുക. അത്താഴ ശേഷം നടക്കുന്നതു പോലുള്ള വ്യായാമങ്ങള്‍ ചെയ്യുക. വളരെ ലഘുവായി മാത്രം രാത്രി കഴിയ്ക്കുക. ചോറു പോലുള്ളവ ഒഴിവാക്കുക.

വെളുത്തുള്ളി

ചില ഭക്ഷണ വസ്തുക്കള്‍ ശീലമാക്കുന്നത് വയര്‍ കുറയ്ക്കാന്‍ സഹായിക്കും. ഉദാഹരണത്തിന് വെളുത്തുള്ളി. ഇതു കൊഴുപ്പു കളയാന്‍ പ്രധാനപ്പെട്ട ഒന്നാണ്. വെളുത്തുള്ളി വെറുംവയറ്റില്‍ കടിച്ചു ചവച്ചു കഴിയ്ക്കാം. ഗ്യാസ്, അസിഡിറ്റി പ്രശ്‌നങ്ങള്‍ക്കുള്ള പരിഹാരം കൂടിയാണിത്. ഇതുപോലെ ഇഞ്ചി, കറുവാപ്പട്ട, ജീരകം തുടങ്ങിയവയെല്ലാം തന്നെ വയറ്റിലെ കൊഴുപ്പു കുറയ്ക്കാന്‍ സഹായിക്കുന്നവയാണ്. ഇവെയല്ലാം ഭക്ഷണത്തില്‍ ഉള്‍പ്പെടുത്തുക.

മധുരം.

വയര്‍ ചാടുന്നതിനുള്ള പ്രധാനപ്പെട്ട ഒരു കാരണമാണ് മധുരം. പ്രത്യേകിച്ചും കൃത്രിമ മധുരം. ഇവ കഴിവതും ഒഴിവാക്കുക. ആവശ്യമെങ്കില്‍ തേന്‍ പോലുള്ള സ്വാഭാവിക മധുരം മാത്രം കഴിയ്ക്കുക. ഇതുപോലെ മധുരമുള്ള പാനീയങ്ങളും ഒഴിവാക്കുക. ഇതു വയര്‍ ചാടുവാന്‍ കാരണമാകുന്ന ഒന്നാണ്.