വയറ് ശരിയാക്കി ആരോഗ്യം കാക്കും; കഴിക്കണം ഈ സാധനങ്ങള്‍

ഏലം

ദഹന ആരോഗ്യം വര്‍ദ്ധിപ്പിക്കുന്നതിനുള്ള ഒരു മികച്ച സുഗന്ധവ്യഞ്ജനമാണ് ഏലം. ഇതിലെ ആന്റിഓക്സിഡന്റ്, ഡൈയൂററ്റിക്, ആന്റിസ്പാസ്മോഡിക്, ആന്റി-ഇന്‍ഫ്‌ളമേറ്ററി ഗുണങ്ങള്‍ നിങ്ങളുടെ ദഹന പ്രശ്‌നങ്ങള്‍ക്ക് ഒരു പരിഹാരമായി പ്രവര്‍ത്തിക്കുന്നു, ഇത് നിങ്ങളുടെ ഗ്യാസ്, മലബന്ധം, ഓക്കാനം എന്നീ പ്രശ്‌നങ്ങള്‍ കുറയ്ക്കുന്നു.

ഇഞ്ചി

ഓക്കാനം, വയറിളക്കം, വയറുവേദന, മറ്റ് കുടല്‍ പ്രശ്‌നങ്ങള്‍ എന്നിവ ചികിത്സിക്കുന്നതിനുള്ള ഒരു ആയുര്‍വേദ പരിഹാരമായി പണ്ടുകാലം മുതല്‍ക്കേ ഇഞ്ചി ഉപയോഗിച്ചുവരുന്നു. ഈ സുഗന്ധവ്യഞ്ജനം നെഞ്ചെരിച്ചില്‍ നീക്കാനും സഹായിക്കുന്നു. അത് ഉപയോഗിക്കാനുള്ള ഏറ്റവും നല്ല മാര്‍ഗം, ഒരു കപ്പ് ഇഞ്ചി ചായ ഉണ്ടാക്കി കഴിക്കുക എന്നതാണ്. ഇത് നിങ്ങളുടെ സമ്മര്‍ദ്ദവും ഉത്കണ്ഠയും അകറ്റുകയും ചെയ്യും.

മഞ്ഞള്‍

ഭക്ഷണത്തില്‍ മഞ്ഞള്‍ ഉള്‍പ്പെടുത്തുന്നത് ദഹനക്കേടും വീക്കവും തടയാന്‍ സഹായിക്കും. പ്രമേഹം, അലര്‍ജികള്‍, സന്ധിവാതം, അല്‍ഷിമേഴ്സ് രോഗങ്ങള്‍ എന്നിവയ്ക്കെതിരെ പോരാടുന്ന ആന്റി ഓക്സിഡന്റ്, ആന്റി-ഇന്‍ഫ്‌ളമേറ്ററി, ആന്റിഫംഗല്‍, ആന്റി ബാക്ടീരിയല്‍, ആന്റിവൈറല്‍ ഗുണങ്ങള്‍ മഞ്ഞളിന് ഉണ്ട്.

ജീരകം

വയറു വീര്‍ക്കുന്നതിന് ഒരു ഉത്തമ പരിഹാരമാണ് ജീരകം. ഇത് ദഹനക്കേടും അസിഡിറ്റിയും നേരിടാന്‍ സഹായിക്കുക മാത്രമല്ല, നിങ്ങളുടെ രോഗപ്രതിരോധ ശേഷി വര്‍ദ്ധിപ്പിക്കുകയും ചെയ്യും. ഇത് മിതമായ അളവില്‍ വേണം കഴിക്കാന്‍, അല്ലാത്തപക്ഷം നിങ്ങള്‍ക്ക് ചില ഗുരുതരമായ പാര്‍ശ്വഫലങ്ങള്‍ നേരിടേണ്ടിവരും.

പെരുംജീരകം

ഇരുമ്പ്, കാല്‍സ്യം, മഗ്‌നീഷ്യം എന്നിവയാല്‍ സമ്പന്നമാണ് പെരുംജീരകം. ഇത് നിങ്ങളുടെ വയറുവേദന, ഗ്യാസ്, മറ്റ് ഉദര പ്രശ്‌നങ്ങള്‍ എന്നിവ കുറയ്ക്കുന്നതിനുള്ള നല്ലൊരു പ്രതിവിധിയാണ്. ഇതോടൊപ്പം, ദഹനനാളത്തിന്റെ പേശികളെ ശമിപ്പിക്കാനും പെരുംജീരകം സഹായിക്കും.

വെളുത്തുള്ളി

ഉയര്‍ന്ന ഔഷധ ഗുണങ്ങളുള്ള ഒന്നാണ് വെളുത്തുള്ളി. വെളുത്തുള്ളിയില്‍ പ്രീബയോട്ടിക് അടങ്ങിയിട്ടുണ്ട്. നല്ല കുടല്‍ ബാക്ടീരിയകളെ പോഷിപ്പിക്കുന്ന ഒരു തരം നാരുകളാണ് ഇവ. ഇറിറ്റബിള്‍ ബവല്‍ സിന്‍ഡ്രോം, ഗ്യാസ്, മലബന്ധം തുടങ്ങിയ വിവിധ ഗ്യാസ്ട്രിക് പ്രശ്‌നങ്ങളെ ചികിത്സിക്കാന്‍ വെളുത്തുള്ളി സഹായിക്കും.

ഗ്രാമ്പൂ

ഗ്രാമ്പൂ നിങ്ങളുടെ ദഹനനാളത്തിന് വളരെ ഗുണം ചെയ്യും, കാരണം ഇത് കുടലിന്റെ പ്രതിരോധശേഷി സംരക്ഷിക്കുന്നു. ഇതോടൊപ്പം വയറിളക്കത്തിന്റെ ലക്ഷണങ്ങളെ ശമിപ്പിക്കാനും നിങ്ങള്‍ക്ക് ഗ്രാമ്പൂ ഉപയോഗിക്കാം.

കറുവപ്പട്ട

പലപ്പോഴും കുടല്‍ അണുബാധയാല്‍ ബുദ്ധിമുട്ടുന്നുണ്ടെങ്കില്‍, കറുവപ്പട്ട നിങ്ങള്‍ക്ക് ഒരു മികച്ച പരിഹാരമാണ്. കാരണം ഇതില്‍ പ്രീബയോട്ടിക് ഗുണങ്ങളുണ്ട്. ഇത് നിങ്ങളുടെ വയറിന് ഗുണം ചെയ്യുന്ന ബാക്ടീരിയകളുടെ വളര്‍ച്ചയെ പ്രോത്സാഹിപ്പിക്കുന്നു.

കുരുമുളക്

വയറുവേദന, ഗ്യാസ്, ഓക്കാനം തുടങ്ങിയ ദഹനക്കേടുകള്‍ ഇല്ലാതാക്കാന്‍ വളരെ ഫലപ്രദമാണ് കുരുമുളക്. ആമാശയത്തെ ശമിപ്പിക്കുന്നതിനും കരളിനെയും കുടലിനെയും ശക്തിപ്പെടുത്തുന്നതിനും ഇത് സഹായിക്കുന്നു.

കര്‍പ്പൂരതുളസി

കര്‍പ്പൂരതുളസി നിങ്ങളുടെ മലബന്ധം, വയറ് വീര്‍പ്പ്, ഗ്യാസ് എന്നിവ ഒഴിവാക്കാന്‍ സഹായിക്കുന്നു, പ്രത്യേകിച്ചും നിങ്ങള്‍ക്ക് ഇറിറ്റബിള്‍ ബവല്‍ സിന്‍ഡ്രോം ഉണ്ടെങ്കില്‍. വയറിലെ പേശികളെ വിശ്രമിക്കാന്‍ ഇത് സഹായിക്കുന്നു. കിടക്കുന്നതിന് 30 മിനിറ്റ് മുമ്പ് കര്‍പ്പൂരതുളസി ചായ കുടിക്കുന്നത് നിങ്ങള്‍ക്ക് നല്ലതാണ്.