കോവിഡിനെ ചെറുക്കാന്‍ ആയുഷ് മന്ത്രാലയം നിര്‍ദേശിക്കുന്നത്

Published: Wednesday, May 5, 2021, 12:21 [IST]

കൊറോണവൈറസിന്റെ രണ്ടാം തരംഗം ഏവരിലും ഭീതി വളര്‍ത്തി പടരുകയാണ്. ഈ ഘട്ടത്തില്‍ ഓരോരുത്തര്‍ക്കും ചെയ്യാവുന്ന കാര്യം എന്തെന്നാല്‍ അവരവരുടെ ആരോഗ്യം ശ്രദ്ധിക്കുക എന്നതാണ്. അതിനായി നിങ്ങള്‍ക്കാവുന്ന വിധം ചില പ്രതിരോധ നടപടികള്‍ കൈക്കൊള്ളുക. അണുബാധ തടയുന്നതിനായി വ്യക്തമായ പ്രതിരോധശേഷി ശക്തിപ്പെടുത്തുന്നതിന്റെ പ്രാധാന്യം ആരോഗ്യ വിദഗ്ധര്‍ വീണ്ടും വീണ്ടും ഊന്നിപ്പറയുന്നു. അതിനായി കേന്ദ്രസര്‍ക്കാരിന്റെ ആയുഷ് മന്ത്രാലയം നിങ്ങള്‍ക്കായി ചില നിര്‍ദേശങ്ങള്‍ മുന്നോട്ടു വയ്ക്കുന്നുണ്ട്. രോഗപ്രതിരോധ ശേഷി വര്‍ദ്ധിപ്പിക്കുന്നതിനായി ആയുഷ് മന്ത്രാലയം ചില ആയുര്‍വേദ സ്വയം പരിചരണ ടിപ്പുകള്‍ പങ്കുവച്ചിട്ടുണ്ട്, ഇതാ നോക്കൂ:

പൊതുവായ നിര്‍ദേശങ്ങള്‍

* ഇടയ്ക്കിടെ ഇളം ചൂടുവെള്ളം കുടിക്കുക

* മഞ്ഞള്‍, ജീരകം, മല്ലി, ഇഞ്ചി, വെളുത്തുള്ളി തുടങ്ങിയ സുഗന്ധവ്യഞ്ജനങ്ങള്‍ ഭക്ഷണത്തില്‍ ചേര്‍ക്കുക.

* നെല്ലിക്ക കഴിക്കുക.

* ഒരു നുള്ള് മഞ്ഞളും ഉപ്പും ചേര്‍ത്ത് ചെറുചൂടുള്ള വെള്ളം കവിള്‍കൊള്ളുക

പൊതുവായ നിര്‍ദേശങ്ങള്‍

* ഫ്രഷ് ആയി പാകം ചെയ്തതോ അല്ലെങ്കില്‍ ദഹിക്കാന്‍ എളുപ്പമുള്ളതോ ആയ ഭക്ഷണങ്ങള്‍ കഴിക്കുക.

* കോവിഡ് 19 രോഗപ്രതിരോധത്തിനായി ആയുഷ് നാഷണല്‍ ക്ലിനിക്കല്‍ മാനേജ്മെന്റ് പ്രോട്ടോക്കോള്‍ മന്ത്രാലയം നിര്‍ദ്ദേശിച്ച പ്രകാരം ദിവസവും 30 മിനിറ്റെങ്കിലും യോഗ, പ്രാണായാമം, ധ്യാനം എന്നിവ പരിശീലിക്കുക.

* ഏഴ് മുതല്‍ എട്ട് മണിക്കൂര്‍ വരെ മതിയായ ഉറക്കം നേടുക, പകല്‍ ഉറക്കം ഒഴിവാക്കുക

രോഗപ്രതിരോധശേഷിക്ക് ആയുര്‍വേദ വഴികള്‍

* വെറും വയറ്റില്‍ 20 ഗ്രാം ച്യവനപ്രാശം ഇളം ചൂടുള്ള വെള്ളത്തോടൊപ്പം കഴിക്കുക

* 150 മില്ലി ചൂടുള്ള പാലില്‍ അര ടീസ്പൂണ്‍ മഞ്ഞള്‍പ്പൊടി ചേര്‍ത്ത് ദിവസത്തില്‍ ഒന്നോ രണ്ടോ തവണ കഴിക്കുക

ഹെര്‍ബല്‍ ടീ

* 3 ഗ്രാം പൊടിയിട്ട് നിര്‍മ്മിച്ച ഹെര്‍ബല്‍ ടീ കുടിക്കുക:

4 ഭാഗം - തുളസി

2 ഭാഗം - കറുവപ്പട്ട

2 - ചുക്ക്

1 ഭാഗം - കുരുമുളക്

* 150 മില്ലി ചൂടുവെള്ളത്തില്‍ ഈ ചേരുവകള്‍ ചേര്‍ത്ത് ദിവസത്തില്‍ ഒന്നോ രണ്ടോ തവണ കഴിക്കുക. രുചി മെച്ചപ്പെടുത്താന്‍ വെല്ലം, ഉണക്കമുന്തിരി, ഏലം എന്നിവ ചേര്‍ക്കാം.

മൂക്കൊലിപ്പ് തടയാന്‍

* രാവിലെയും വൈകുന്നേരവും നാസാരന്ധ്രങ്ങളില്‍ എള്ള് എണ്ണ അല്ലെങ്കില്‍ വെളിച്ചെണ്ണ അല്ലെങ്കില്‍ പശു നെയ്യ് പുരട്ടുക.

* ഓയില്‍ പുള്ളിംഗ് തെറാപ്പി - 1 ടീസ്പൂണ്‍ എള്ള് എണ്ണ അല്ലെങ്കില്‍ വെളിച്ചെണ്ണ വായില്‍ എടുക്കുക. കുടിക്കരുത്, രണ്ട് മൂന്ന് മിനിറ്റ് വായില്‍ കുലുക്കി അത് തുപ്പുകയും തുടര്‍ന്ന് ചൂടുവെള്ളം ഉപയോഗിച്ച് വായ കഴുകുകയും ചെയ്യുക. ദിവസത്തില്‍ ഒന്നോ രണ്ടോ തവണ ഇത് ചെയ്യാം.

വരണ്ട ചുമ, തൊണ്ടവേദന

* പ്ലെയിന്‍ വാട്ടര്‍, പുതിന ഇലകള്‍, അയമോദകം, കര്‍പ്പൂരം എന്നിവയില്‍ ഏതെങ്കിലും ഉപയോഗിച്ച് ദിവസത്തില്‍ ഒരിക്കല്‍ ആവിപിടിക്കുക.

* ചുമ അല്ലെങ്കില്‍ തൊണ്ടവേദന ഉണ്ടെങ്കില്‍ ഒരു ദിവസം രണ്ട് മൂന്ന് തവണ ഗ്രാമ്പൂ അല്ലെങ്കില്‍ ഇരട്ടിമധുരം പൊടിയില്‍ പഞ്ചസാരയോ തേനോ ചേര്‍ത്ത് കഴിക്കുക.

* ഈ നടപടികള്‍ സാധാരണ വരണ്ട ചുമയ്ക്കും തൊണ്ടവേദനയ്ക്കും ഫലപ്രദമാണ്. എന്നിരുന്നാലും, ഈ ലക്ഷണങ്ങള്‍ തുടരുകയാണെങ്കില്‍ ഡോക്ടര്‍മാരെ സമീപിക്കുന്നത് നല്ലതാണ്.