പല്ലു വൃത്തിയാക്കുമ്പോള്‍ ശ്രദ്ധിക്കുക

പല്ലു നന്നായി തേച്ചാല്‍ പോരേ, ഇതിത്ര പറയാനെന്തിരിക്കുന്നുവെന്നായിരിക്കും. പല്ലു തേപ്പിലും ശ്രദ്ധിക്കേണ്ട ചില കാര്യങ്ങളുണ്ട്. വായയുടേയും പല്ലിന്റെയും ആരോഗ്യത്തിന് പ്രധാനം.

സമയത്തിനും പല്ലുതേപ്പില്‍ പ്രാധാന്യമുണ്ട്. കൂടുതല്‍ സമയം പല്ലു തേയ്ക്കുന്നതും തീരെ കുറവു സമയം പല്ലു തേയ്ക്കുന്നതും നല്ലതല്ല.

ദിവസവും രാവിലെയും രാത്രിയിലും പല്ലു തേയ്ക്കുന്നത് ശീലമാക്കുക. എന്നാല്‍ മൂന്നു പ്രാവശ്യത്തിലും കൂടുതല്‍ പല്ലു തേയ്ക്കുകയുമരുത്.

ബ്രഷിന്റെ വലിപ്പവും പ്രധാനം. വായുടെയും പല്ലിന്റെയും വലിപ്പമനുസരിച്ച് സൗകര്യപ്രദമായ ബ്രഷ് തെരഞ്ഞെടുക്കുക. ബ്രഷിന്റെ വലിപ്പം കുറയാനോ കൂടാനോ പാടില്ല. കൂടുതല്‍ കട്ടി കൂടുതലുള്ളതും തീരെ കട്ടി കുറഞ്ഞതുമായ പല്ലുകളുള്ള ബ്രഷും തെരഞ്ഞെടുക്കരുത്.

കൃത്യസമയത്ത് ബ്രഷ് മാറ്റേണ്ടതും അത്യാവശ്യം. ബ്രഷിന്റ പല്ലുകള്‍ കേടായില്ലെങ്കിലും രണ്ടുമൂന്നു മാസമെങ്കിലും കൂടുമ്പോള്‍ ബ്രഷ് മാറ്റുന്നത് നന്നായിരിക്കും.

ബ്രഷ് ഉപയോഗിക്കുന്ന രീതിയും പ്രധാനമാണ്. ബ്രഷ് കൊണ്ട് വട്ടത്തില്‍ പല്ലു തേയ്ക്കണം. മുകളില്‍ നിന്നും താഴേക്കും താഴെ നിന്നും മുകളിലേക്കും ബ്രഷ് ചെയ്യുക. പല്ലുകള്‍ക്ക് കുറുകെ തേയ്ക്കരുത്.

പല്ലുകളുടെ പുറംഭാഗം മാത്രമല്ലാ, ഉള്ളില്‍ നിന്നും വൃത്തിയാക്കാനും ശ്രദ്ധിക്കുക. പല്ലകളില്‍ ബാക്ടീരിയ വളരാന്‍ സാധ്യതയുള്ള സ്ഥലങ്ങളാണിത്.

പല്ലു തേയ്ക്കാന്‍ പേസ്റ്റ് തെരഞ്ഞെടുക്കുമ്പോള്‍ അധികം രാസവസ്തുക്കള്‍ അടങ്ങിയവ തെരഞ്ഞെടുക്കരുത്. മാത്രമല്ലാ, പല്ലു തേച്ചു കഴിഞ്ഞാല്‍ വായ നല്ലപോലെ കഴുകി പേസ്റ്റ് മുഴുവന്‍ കളയുകയും വേണം.

പല്ലുതേച്ച ശേഷം നാക്കും വൃത്തിയാക്കണം. അധികം മൂര്‍ച്ചയില്ലാത്ത ടംഗ് ക്ലീനര്‍ ഉപയോഗിക്കാം. കൂടുതല്‍ അമര്‍ത്തി ഇത് ഉപയോഗിക്കുകയുമരുത്.