ഹാന്റ് വാഷ് മസിലുകളെ ബാധിക്കും

ഹാന്റ് വാഷ്, മൗത്ത് വാഷ് തുടങ്ങിയവ ഉപയോഗിക്കുന്നത് മസില്‍ പ്രവര്‍ത്തനങ്ങളെ ബാധിക്കുമെന്ന് പഠനറിപ്പോര്‍ട്ട്. കാലിഫോര്‍ണിയ സര്‍വകലാശാലയിലെ ഒരു വിഭാഗം ശാസ്ത്രജ്ഞര്‍ നടത്തിയ പഠനത്തിലാണ് ഇക്കാര്യം തെളിഞ്ഞത്.

ഇവയില്‍ അടങ്ങിയിരിക്കുന്ന ട്രൈക്ലോസാന്‍ എന്ന ഉല്‍പന്നമാണ് ഈ പ്രശ്‌നമുണ്ടാക്കുന്നത്. മൗത്ത് വാഷ്, ഹാന്റ് വാഷ് എന്നിവയ്ക്കു പുറമെ ടൂത്ത് പേസ്റ്റ്, വസ്ത്രങ്ങള്‍, കാര്‍പെറ്റ്, കളിപ്പാട്ടങ്ങള്‍ എന്നിവയിലും ഈ പദാര്‍ത്ഥമടങ്ങിയിട്ടുണ്ട്. ഇതിന് പുറമെ വെള്ളത്തില്‍ വളരുന്ന പൂപ്പല്‍, മത്സ്യങ്ങള്‍ എന്നിവയിലും ട്രൈക്ലോസാന്‍ അടങ്ങിയിട്ടുണ്ട്.

മസില്‍ സെല്ലുകളേയും മസില്‍ ഫൈബറുകളേയും കേടു വരുത്താന്‍ ഈ പദാര്‍ത്ഥത്തിനു കഴിയുമെന്ന് എലികളിലും ഒരിനം മത്സ്യങ്ങളിലും നടത്തിയ പഠനങ്ങള്‍ തെളിയിച്ചിട്ടുണ്ട്. മസില്‍ സെല്ലുകളുടെ കാല്‍സ്യത്തിന്റെ അളവ് കുറച്ച് മസിലുകളെ സങ്കോചിപ്പിക്കുകയാണ് ഈ പദാര്‍ത്ഥം ചെയ്യുന്നത്. ഇത് ശരീരത്തിന്റെ ആകെയുള്ള പ്രവര്‍ത്തനത്തെ ബാധിക്കുകയും ചെയ്യുന്നു. ഹൃദയ മസിലുകളുടെ പ്രവര്‍ത്തനത്തെ വരെ ഇത് ബാധിക്കാം..

മസിലുകളെ ബാധിക്കുന്നതിന് പുറമെ പ്രത്യുല്‍പാദനത്തെ സഹായിക്കുന്ന ഹോര്‍മോണുകളേയും തലച്ചോര്‍ പുറപ്പെടുവിക്കുന്ന സിഗ്നലുകളേയും ഈ പദാര്‍ത്ഥം കേടു വരുത്തുന്നുണ്ട്.