ബദാം കുതിര്‍ത്തു കഴിയ്ക്കണമോ?

ആരോഗ്യകരമായ നട്‌സില്‍ ബദാമിന് പ്രധാന സ്ഥാനമുണ്ട്. നല്ല കൊഴുപ്പിന്റെ ഒരു മുഖ്യ ഉറവിടമാണിത്. വൈറ്റമിന്‍ ഇ, ഒമേഗ ത്രീ ഫാറ്റി ആസിഡ്, പ്രോട്ടീന്‍ തുടങ്ങിയ ധാരാളം പോഷകങ്ങള്‍ ഇതില്‍ അടങ്ങിയിട്ടുണ്ട്.

ബദാം സാധാരണ ഗതിയില്‍ ആളുകള്‍ വെള്ളത്തിലിട്ടു കുതിര്‍ത്തി കഴിയ്ക്കുന്നതു കണ്ടിട്ടില്ലേ. ബദാം വെള്ളത്തിലിട്ടു കുതിര്‍ത്തി കഴിയ്ക്കുന്നതു കൊണ്ട് ഗുണമുണ്ടോയെന്ന സംശയം പലര്‍ക്കുമുണ്ടാകാം.

ബദാം വെള്ളത്തിലിട്ടു കുതിര്‍ത്തി കഴിയ്ക്കുന്നതിന് പല കാരണങ്ങളുമുണ്ട്. ഇവയുടെ പോഷകാംശം പൂര്‍ണമായും ലഭിയ്ക്കുവാന്‍ ഇങ്ങനെ ചെയ്യേണ്ടത് ആവശ്യവുമാണ്. ഇതു മാത്രമല്ല, കുതിര്‍ന്ന ബദാമിന്റെ തൊലി നീക്കിയാണ് കഴിയ്‌ക്കേണ്ടതും.

ബദാമിന്റെ തൊലിയില്‍ ടാനില്‍ ആസിഡ് അടങ്ങിയിട്ടുണ്ട്. ബദാമിനെ സൂര്യനില്‍ നിന്നും സംരക്ഷിയ്ക്കുന്നത് ഇതാണ്. ഇൗ തൊലി നീക്കാതെ കഴിയ്ക്കുമ്പോള്‍ പോഷകങ്ങള്‍ ശരീരത്തില്‍ എത്തുന്നതിനെ തൊലി തടയുന്നു. ബദാം കുതിര്‍ത്തിക്കഴിയുമ്പോള്‍ തൊലി എളുപ്പത്തില്‍ പൊളിഞ്ഞു പോകുന്നു. ശരീരത്തിന് പോഷകങ്ങള്‍ എളുപ്പം ലഭിയ്ക്കുന്നു.

വെള്ളത്തിലിട്ട ബദാമിന് രുചിയേറുന്നു. ഇത് പെട്ടെന്ന് ദഹിയ്ക്കുകയും ചെയ്യും. കുതിര്‍ത്ത ബദാം എളുപ്പത്തില്‍ ചവച്ചരയ്ക്കാനും സാധിയ്ക്കും.

ബദാം എട്ടു മണിക്കൂറെങ്കിലും വെള്ളത്തിലിട്ടു കുതിര്‍ത്തുന്നത് നന്നായിരിയ്ക്കും. ഒരു പിടി ബദാം അരക്കപ്പ് വെള്ളത്തിലിട്ടു കുതിര്‍ത്തിയാല്‍ മതിയാകും. ഇത് തൊലി കളഞ്ഞ് പ്ലാസ്റ്റിക് കവറിലാക്കി ഫ്രിഡ്ജില്‍ സൂക്ഷിയ്ക്കുകയും ചെയ്യാം.

ബദാം മുളപ്പിച്ചും കഴിയ്ക്കാം. ഇങ്ങനെ ചെയ്യുമ്പോള്‍ ആരോഗ്യഗുണം ഇരട്ടിയാകും. ഇതിനായി ബദാം 12 മണിക്കൂര്‍ വെള്ളത്തിലിട്ടു വയ്ക്കുക. പിന്നീട് വെള്ളം ഊറ്റിക്കളഞ്ഞ് ഒരു ഗ്ലാസ് പാത്രത്തില്‍ ഇട്ട് ഫ്രിഡ്ജില്‍ വയ്ക്കാം. ഇത് മുളച്ചു വരാന്‍ നാലഞ്ചു ദിവസം പിടിയ്ക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.