ചർമ്മത്തിലെ ചെറിയ മാറ്റങ്ങൾ പോലും ഗുരുതരമാണ്

ചുണങ്ങ്

‌ചർമ്മത്തില്‍ ചുണങ്ങ് ഉണ്ടാവുന്നത് പലരേയും ബാധിക്കുന്ന ഒന്നാണ്. പ്രത്യേകിച്ച് പ്രമേഹ രോഗികളിൽ ഇത് കാണപ്പെടുന്നുണ്ട്. പ്രതിരോധ ശേഷി കുറഞ്ഞവരിൽ ആണ് ചുണങ്ങിനുള്ള സാധ്യത വളരെ കൂടുതൽ. ചൂടുള്ള കാലാവസ്ഥ, ചർമ്മത്തിന്റെ ഗുണം, അമിതമായുള്ള വിയർപ്പ് എന്നിവയെല്ലാം ഇത്തരം ചർമ്മ രോഗങ്ങൾക്കുള്ള സാധ്യത വർദ്ധിപ്പിക്കുകയാണ് ചെയ്യുന്നത്. നെഞ്ചിലും, പുറത്തും, കഴുത്തിലുമാണ് പ്രധാനമായും ചുണങ്ങ് കാണപ്പെടുന്നത്. ചെറിയ ചൊറിച്ചിലോട് കൂടി കാണപ്പെടുന്ന ഈ രോഗം ചുവന്ന നിറത്തിലും ബ്രൗൺ നിറത്തിലും കാണപ്പെടുന്നു. നിറം മങ്ങിയാണ് ഇത് കാണപ്പെടുക എന്നത് കൊണ്ട് തന്നെ പലരും ശ്രദ്ധിക്കാതെ വിടുന്നതാണ് ഇത്തരം രോഗാവസ്ഥകൾ. അതുകൊണ്ട് തന്നെ ചെറിയ മാറ്റങ്ങൾ ശരീരത്തില്‍ കണ്ടാൽ ഉടൻ തന്നെ ഡോക്ടറെ കാണുന്നതിന് ശ്രദ്ധിക്കണം.‌

പുഴുക്കടി‌

പുഴുക്കടിയാണ് മറ്റൊരു പ്രതിസന്ധി. ഇതിന് പ്രധാന കാരണം എന്ന് പറയുന്നത് ഫംഗസ് ആണ്. തൊലിപ്പുറച്ച് ചുവന്ന നിറത്തിൽ വട്ടത്തിലാണ് പുഴുക്കടി തുടങ്ങുന്നത്. തുടയിടുക്കുകൾ, കാലിന്റെ വിരലിടുക്കുകൾ, നാഭി, കക്ഷം എന്നീ ഭാഗങ്ങളിലാണ് പ്രധാനമായും പുഴുക്കടി കാണപ്പെടുന്നത്. നല്ല ചൊറിച്ചിലായിരിക്കും ഇതിന്റെ ഏറ്റവും വലിയ വെല്ലുവിളി. വ്യക്തിശുചിത്വം പാലിക്കാത്തതാണ് പ്രധാന കാരണം. കൂടാതെ അമിതമായുണ്ടാവുന്ന വിയർപ്പ്, ചർമ്മത്തിലെ മുറിവുകൾ എന്നിവയെല്ലാം ഈ പ്രതിസന്ധിയെ വർദ്ധിപ്പിക്കുകയാണ് ചെയ്യുന്നത്. ഫംഗസ് ആണ് ഈ രോഗം പരത്തുന്നത്. ചർമ്മത്തിന്റെ മൊത്തത്തിലുള്ള അവസ്ഥക്ക് വളരെയധികം വില്ലനായി മാറുന്നു ഈ രോഗം.

അരിമ്പാറ

നാം സ്ഥിരമായി കേൾക്കാറുള്ള ഒന്നാണ് അരിമ്പാറ. ഇത് ഒരു വൈറസ് രോഗമാണ്. ചർമ്മത്തിന്റെ പുറത്ത് വളരെ വേഗത്തിലാണ് ഇത് പടർന്ന് പിടിക്കുന്നത്. പ്രായവ്യത്യാസമില്ലാതെ എല്ലാവരിലും ഇത് എത്തുന്നു. വിരലിൽ കഴുത്തിൽ കാലിൻറെ അടിയിൽ, ചിലരിൽ ജനനേന്ദ്രിയങ്ങളിൽ എന്നീ സ്ഥലങ്ങളിലെല്ലാം അരിമ്പാറ ഉണ്ടാവുന്നുണ്ട്. ഇത്തരം അവസ്ഥകളിൽ വളരെയധികം ശ്രദ്ധിക്കേണ്ടതായുണ്ട്. അല്ലെങ്കിൽ അത് ചർമ്മത്തിൽ പെട്ടെന്ന് വ്യാപിക്കുന്നു.‌

സ്കേബിസ്

പാരസൈറ്റുകളാണ് ചർമ്മത്തിന് വില്ലനാവുന്ന ഈ രോഗത്തെ പരത്തുന്നത്. അതി കഠിനമായ ചൊറിച്ചിലാണ് ഇതിന്റെ പ്രധാന കാരണം. സാർക്കോപ്റ്റസ് സ്കാബി എന്ന പാരസൈറ്റാണ് ഇത് പരത്തുന്നത്. രോഗിയുമായുള്ള അടുത്തിടപഴകലാണ് ഇത്തരം രോഗം പെട്ടെന്ന് പകരുന്നതിന് കാരണം. ലൈംഗിക ബന്ധത്തിലൂടെയും ഈ രോഗം പകരാവുന്നതാണ്. കൈവിരലുകൾക്കിടയിലും സ്വകാര്യഭാഗത്തും കൈമുട്ടിലും എല്ലാം ഈ അവസ്ഥ കാണപ്പെടുന്നുണ്ട്. ചുവന്ന നിറത്തിലുള്ള തിണർത്ത പാടാണ് ഇത്തരം രോഗത്തിന്റെ ആദ്യ ലക്ഷണം. രാത്രിയിലാണ് ചൊറിച്ചിൽ വർദ്ധിക്കുന്നത്. ഉടൻ തന്നെ ഡോക്ടറെ കണ്ട് കൃത്യമായ ചികിത്സ തേടേണ്ടത് അത്യാവശ്യമാണ്.‌‌‌

വെള്ളപ്പാണ്ട്

ഇതും ഒരു ചര്‍മ്മ രോഗമാണ്. ശരീരത്തിൽ മെലാനിൻ നഷ്ടമാകുന്ന അവസ്ഥയാണ് വെള്ളപ്പാണ്ടിലേക്ക് നയിക്കുന്നത്. പൂർണമായും ചികിത്സിച്ച് മാറ്റാൻ ആവില്ല എന്നതാണ് ഇതിന്റെ സത്യം. പ്രതിരോധ ശേഷി കുറയുന്നവരിലും, ജനിതകകാരണങ്ങൾ കൊണ്ടും ഇത്തരം അവസ്ഥകൾ ഉണ്ടാവുന്നു. ചില പ്രത്യേക രാസ വസ്തുക്കൾ ഉപയോഗിക്കുന്നതിലൂടെയും ഇത്തരം അവസ്ഥ നിങ്ങളിൽ ഉണ്ടാവുന്നു. അതുകൊണ്ട് തന്നെ വളരെയധികം ശ്രദ്ധിക്കേണ്ടതാണ്. ചർമ്മത്തിൽ എന്തെങ്കിലും തരത്തിലുള്ള മാറ്റങ്ങൾ കണ്ടാൽ ഉടൻ തന്നെ നല്ലൊരു ചർമ്മ രോഗവിദഗ്ധനെ കാണേണ്ടത് അത്യാവശ്യമാണ്.

സോറിയാസിസ്

ചർമരോഗങ്ങളിൽ പലരേയും വെട്ടിലാക്കുന്ന ഒന്നാണ് സോറിയാസിസ്. സോറിയാസിസ് ഒരിക്കലും ഒരു പകർച്ച വ്യാധിയല്ല എന്നതാണ് ആദ്യം മനസ്സിലാക്കേണ്ടത്. ചർമ്മത്തിന്റെ പുറത്ത് ചുവന്ന് തടിച്ച ശൽക്കങ്ങളായാണ് ഇത് കാണപ്പെടുന്നത്. പുറം, തല, കൈകാൽ മുട്ടുകൾ എന്നീ സ്ഥലങ്ങളിലാണ് ഇത്തരം അവസ്ഥകൾ കാണപ്പെടുന്നത്. മദ്യപിക്കുന്നവരിലും മാനസിക സമ്മർദ്ദമുള്ളവരിലും സോറിയാസിസിനുള്ള സാധ്യത വളരെ കൂടുതലാണ്. മാത്രമല്ല ഭക്ഷണ രീതിയും ഈ രോഗത്തെ സ്വാധീനിക്കുന്നുണ്ട്. അതുകൊണ്ട് വളരെയധികം ശ്രദ്ധിക്കണം. ചർമ്മത്തിൽ മാറ്റങ്ങൾ കണ്ടാൽ ഉടനേ തന്നെ ഡോക്ടറെ കാണുന്നതിന് വേണ്ടി ശ്രദ്ധിക്കേണ്ടതാണ്.

പെഫിഗസ്

പേരു കേട്ടാൽ നമുക്കത്ര പരിചയം ഇല്ലെങ്കിലും ചര്‍മ്മത്തെ ബാധിക്കുന്ന രോഗങ്ങളുടെ കൂട്ടത്തിലെ വില്ലൻ തന്നെയാണ് ഇതെന്ന കാര്യത്തിൽ സംശയം വേണ്ട. ചർമ്മത്തിൽ വെള്ളം നിറഞ്ഞ് അത് കുമിളകള്‍ ആയി മാറുന്ന അവസ്ഥയാണ് ഇത്. ഇത് വായിലും ശരീരത്തിന്റെ മറ്റ് ചില ഭാഗങ്ങളിലും ഉണ്ടാവുന്നതിനുള്ള സാധ്യതയുണ്ട്. പലപ്പോഴും അലർജികൾ തന്നെയാണ് ഇത്തരം ചർമ്മാവസ്ഥക്ക് കാരണമാകുന്നത്. എന്നാൽ ഇത് ഒരിക്കലും ഒരു പകരുന്ന രോഗമല്ല എന്നതാണ് സത്യം.