കുട്ടികളിലെ കഫക്കെട്ടിന് ഈ ഇലക്കിഴി മരുന്ന്‌

തുളസി

തുളസി കഫക്കെട്ടിനും ചുമയ്ക്കുമുളള പ്രകൃതിദത്ത മരുന്നാണ്. തുളസിയുടെ നീര് പിഴിഞ്ഞെടുത്ത് അല്‍പം തേനും ചേര്‍ത്ത് ദിവസവും രണ്ടു മൂന്നു നേരം അടുപ്പിച്ചു കൊടുക്കുന്നത് ഏറെ നല്ലതാണ്. ഇത് ചുമയില്‍ നിന്നും കഫക്കെട്ടില്‍ നിന്നും ആശ്വാസം നല്‍കുന്ന ഒന്നാണ്. തുളസിയും തേനുമെല്ലാം അണുബാധകളെ ചെറുക്കാന്‍ ഏറെ നല്ലതാണ്.

പനിക്കൂര്‍ക്ക

ഇതുപോലെയാണ് പനിക്കൂര്‍ക്കയും. കുട്ടികളുളള വീട്ടില്‍ നിര്‍ബന്ധമായും ഉണ്ടായിരിയ്‌ക്കേണ്ട ഒരു സസ്യമാണിത്. പനിക്കൂര്‍ക്ക വാട്ടിപ്പിഴിഞ്ഞു നീരെടുത്ത് ഇതില്‍ തേനും ചേര്‍ത്തു കുഞ്ഞുങ്ങള്‍ക്കും കുട്ടികള്‍ക്കും നല്‍കാം. ഇതും കഫക്കെട്ടും ചുമയും മാറുന്നതിന് ഏറെ നല്ലതാണ്. ഇതും മൂന്നു നേരം നല്‍കുന്നതു ഗുണം ചെയ്യും. പനിക്കൂര്‍ക്കയുടെ ഇല വാട്ടി കുട്ടികളുടേയും കുഞ്ഞുങ്ങളുടേയും നിറുകയില്‍ ഇടുന്നത് പനിയും ജലദോഷവുമെല്ലാം ശമിപ്പിയ്ക്കാനുളള നല്ലൊരു വഴി കൂടിയാണ്പനിക്കൂര്‍ക്കയുടെ ഇല ഇടിച്ചു പിഴിഞ്ഞ് ഈ നീരില്‍ കല്‍ക്കണ്ടം പൊടിച്ചു ചേര്‍ത്ത് കുട്ടികള്‍ക്കു നല്‍കാം. ഇത് കോള്‍ഡ്, ചുമ തുടങ്ങിയ പല പ്രശ്‌നങ്ങള്‍ക്കുമുളള നല്ലൊരു പരിഹാരമാണ്.

തേന്‍

തേന്‍ ഉപയോഗിയ്ക്കുമ്പോള്‍ ചെറുതേനാണ് കൂടുതല്‍ നല്ലത്. ഇതിനാണ് ഔഷധ ഗുണം കൂടുതല്‍. ചെറിയ തേനീച്ചയില്‍ നിന്നെടുക്കുന്നതാണ് ചെറുതേന്‍, വലിയ തേനീച്ചയുടേത് വന്‍തേനും. മരുന്നു ഗുണം കൂടുതല്‍ ചെറുതേനാണ്. ഇതുപോലെ ശുദ്ധമായ തേന്‍ ഉപയോഗിയ്ക്കുക. ഇത് ഗുണം ലഭിയ്ക്കാന്‍ ഏറെ പ്രധാനമാണ്. കൃത്രിമ തേന്‍ ഗുണം നല്‍കില്ല. ശര്‍ക്കര പാനിയും മറ്റുമായി പല തരത്തിലെ തേനുകളും ഇന്നു വിപണിയില്‍ വരുന്നുണ്ട്.

തുളസിയുടെ നീരും പനിക്കൂര്‍ക്കയുടെ നീരും

തുളസിയുടെ നീരും പനിക്കൂര്‍ക്കയുടെ നീരും തുല്യ അളവില്‍ എടുത്തു കലര്‍ത്തി ഇതില്‍ തേനും ചേര്‍ത്തു നല്‍കുന്നതും ഏറെ നല്ലതാണ്. ഇത്തരം വഴികള്‍ യാതൊരു ദോഷവും വരുത്തില്ല. കുഞ്ഞുങ്ങള്‍ക്കും കുട്ടികള്‍ക്കും മുതിര്‍ന്നവര്‍ക്കുമെല്ലാം ഫലപ്രദവുമാണ്.

തുളസിയും പനീക്കൂര്‍ക്കയും

തുളസിയും പനീക്കൂര്‍ക്കയും ചതച്ച് വൃത്തിയുള്ള തുണിയില്‍ കിഴി കെട്ടുക. ഈ കിഴി ചെറുതായി ചൂടാക്കി കുഞ്ഞിന്റെ നെഞ്ചിലും പുറത്തുമെല്ലാം വയ്ക്കുന്നതും ഏറെ നല്ലതാണ്. ഇത് 2 വയസിനു മേല്‍ പ്രായമുളള കുഞ്ഞുങ്ങളില്‍ മാത്രം പരീക്ഷിയ്ക്കുക. ഇതും കഫക്കെട്ടു മാറാന്‍ സഹായിക്കുന്ന ഒന്നാണ്.

അയമോദകം

അയമോദകം അഥവാ അജ്‌വെയ്ന്‍ കഫക്കെട്ടു മാറാന്‍ സഹായിക്കുന്ന മറ്റൊരു മരുന്നാണ്. ഇത് അല്‍പമെടുത്തു തവയിലിട്ടു ചൂടാക്കുക. ഇത് വൃത്തിയുള്ള കോട്ടന്‍ തുണിയില്‍ കിഴി കെട്ടി കുഞ്ഞുങ്ങളുടെ പുറത്തും നെഞ്ചിലും വച്ചു കൊടുക്കാം. ഇതുപോലെ ഇത് മൂക്കിനടുത്തു പിടിച്ച് ഇതിന്റെ മണം ശ്വസിയ്ക്കുന്നതും നല്ലതാണ്. കുട്ടികള്‍ ഇതിന്റെ മണം ശ്വ്‌സിയ്ക്കാന്‍ വിസമ്മതിയ്ക്കുകയാണെങ്കില്‍ ഉറങ്ങുമ്പോള്‍ ശ്വാസമെടുക്കുമ്പോള്‍ മൂക്കിനടത്തു പിടിയ്ക്കുക. ഇത് കഫക്കെട്ടില്‍ നിന്നും മോചനം നല്‍കും. ശ്വാസകോശം ക്ലിയറായി ശ്വസന തടസവും മാറും.

നാരങ്ങ

2 വയസു കഴിഞ്ഞ കുട്ടികളെങ്കില്‍ ഒരു ഗ്ലാസ് ചൂടുവെള്ളത്തില്‍ നാലു തുളളി നാരങ്ങനീരും അര ടീസ്പൂണ്‍ തേനും കലര്‍ത്തി കുടിയ്ക്കാന്‍ കൊടുക്കുക. ഇത് കഫക്കെട്ടില്‍ നിന്നും ആശ്വസം നല്‍കാന്‍ ഏറെ നല്ലതാണ്. കോള്‍ഡ് മാറാന്‍ സഹായിക്കുന്ന ഒരു വഴി കൂടിയാണ് ചെറുചൂടുള്ള ഈ പ്രത്യേക നാരങ്ങാ, തേന്‍ വെള്ളം.

പാലില്‍ ഒരു ടീസ്പൂണ്‍ മഞ്ഞള്‍

പാലില്‍ ഒരു ടീസ്പൂണ്‍ മഞ്ഞള്‍ ചേര്‍ത്ത് കുടിക്കുക. അണുബാധക്കെതിരെ പ്രവര്‍ത്തിക്കാനുള്ള മഞ്ഞളിന്റെ ശേഷിയാണ് കഫക്കെട്ട് ഇല്ലാതാക്കാന്‍ സഹായിക്കുന്നത്.പാലുംവെള്ളമായും ഇതു നല്‍കാം. ഇതുപോലെ തീരെ ചെറിയ കുട്ടിയെങ്കില്‍ കുറുക്കില്‍ ഒരു നുള്ളു മഞ്ഞള്‍ ചേര്‍ക്കാം.

ഉരമരുന്ന്

ഉരമരുന്ന് ആയുര്‍വേദ കടകളില്‍ ലഭിയ്ക്കും. ഇത് ചെറിയ കുട്ടികള്‍ക്ക് മുലപ്പാലില്‍ അരച്ചു നല്‍കുകക. എന്നാല്‍ ഇതു ചെയ്യും മുന്‍പ് ഡോക്ടറുടെ നിര്‍ദേശം കൂടി സ്വീകരിയ്്ക്കുക