ടൊറന്റോ വിമാനം പറത്താന്‍ പെണ്‍പട

By Lakshmi

| Published: Tuesday, March 8, 2011, 10:58 [IST]

ദില്ലി: വനിതാ ദിനത്തോടനുബന്ധിച്ച് പുരുഷ സഹായമില്ലാതെ വനിതകള്‍ വിമാനം പറത്തുന്നു. ദില്ലിയിലെ ഇന്ദിരാഗാന്ധി വിമാനത്താവളത്തില്‍ നിന്നും ടൊറന്റോയിലേയ്ക്കുള്ള എയര്‍ ഇന്ത്യയുടെ ബോയിങ് ബി 777-300 ഇആര്‍ വിമാനമാണ് വനിതകളുടെ നേതൃത്വത്തില്‍ യാത്രതിരിക്കുക.

പതിനഞ്ചുമണിക്കൂര്‍ തുടര്‍ച്ചയായി പറക്കുന്ന വിമാനത്തിലെ ജീവനക്കാരെല്ലാം സ്ത്രീകളാണ്. ക്യാപ്റ്റന്‍ രശ്മി മിരാന്റ, ക്യാപ്റ്റന്‍ സുനിത നെരുള എന്നിവരുടെ നേതൃത്വത്തിലുള്ള ജോലിക്കാരാണ് വിമാനത്തിലുള്ളത്. സുരക്ഷാ സംവിധാനത്തിന്റെ ചുമതല ഹര്‍പ്രീത് എ ഡി സിങിനാണ്. രശ്മി വര്‍മ്മയാണ് പ്രധാന പൈലറ്റ്.

ഇതുകൂടാതെ വനിതാ ദിനത്തിന്റെ ഭാഗമായി എയര്‍ഇന്ത്യയുടെ ഒട്ടേറെ ആഭ്യന്തര സര്‍വ്വീസുകളും വനിതാ ഉദ്യോഗസ്ഥരുടെ നേതൃത്വത്തില്‍ ചൊവ്വാഴ്ച സര്‍വ്വീസ് നടത്തുന്നുണ്ട്.

ദില്ലി-പട്‌ന, ദില്ലി-റായ്പൂര്‍-നാഗ്പൂര്‍, ദില്ലി-ലഖ്‌നൊ, മുംബൈ-ബാംഗ്ലൂര്‍, ചെന്നൈ-മുംബൈ, ബാംഗ്ലൂര്‍-ദില്ലി എന്നീ വിമാനങ്ങളാണ് വനിതാ പൈലറ്റുമാര്‍ പറത്തുക. എയര്‍ഇന്ത്യയില്‍ മൊത്തത്തില്‍ 157 വനിതാ പൈലറ്റുമാരാണുള്ളത്. എല്ലാവിഭാഗങ്ങളിലുമായി എയര്‍ഇന്ത്യയില്‍ 5,300 സ്ത്രീകളാണ് ജോലിചെയ്യുന്നത്.