ശുഭയോഗങ്ങളുമായി അനന്ത ചതുര്‍ദശി; വിഷ്ണു ആരാധനയിലൂടെ നേടാം ഐശ്വര്യം

Updated: Friday, September 9, 2022, 10:15 [IST]

ഹിന്ദു വിശ്വാസപ്രകാരം ഭദ്രപാദ മാസത്തിലെ ശുക്ലപക്ഷത്തിലെ ചതുര്‍ദശി തിഥിക്ക് വലിയ പ്രാധാന്യമുണ്ട്. ഈ ദിവസമാണ് അനന്ത ചതുര്‍ദശി. പ്രപഞ്ച സംരക്ഷകന്‍ എന്ന് വിളിക്കപ്പെടുന്ന മഹാവിഷ്ണുവിനാണ് ഈ പുണ്യദിനം സമര്‍പ്പിച്ചിരിക്കുന്നത്. ഈ ഉത്സവത്തെ അനന്ത ചതുര്‍ദശി എന്നും അനന്ത ചൗദാസ് എന്നും വിളിക്കുന്നു. ഇത്തവണ സെപ്റ്റംബര്‍ 9നാണ് അനന്ത ചതുദശി ആഘോഷിക്കുന്നത്. ഈ ദിവസം വിഷ്ണുവിനെ ആരാധിക്കുന്നതോടൊപ്പം ഗണപതി ഭഗവാന്റെ വിഗ്രഹങ്ങളും നിമജ്ജനം ചെയ്യുന്നു.

അനന്ത ചതുര്‍ദശി വ്രതം മഹാവിഷ്ണുവിനെ പ്രീതിപ്പെടുത്തുകയും അനന്തമായ ഫലങ്ങള്‍ നല്‍കുകയും ചെയ്യുമെന്ന് വിശ്വസിക്കപ്പെടുന്നു. വിശ്വാസമനുസരിച്ച്, ഈ ദിവസം മഹാവിഷ്ണുവിനെ ധ്യാനിച്ച്‌ വ്രതം അനുഷ്ഠിക്കുകയും ആരാധിക്കുകയും അനന്തസൂത്രം കെട്ടുകയും ചെയ്താല്‍ ഭക്തര്‍ക്ക് എല്ലാ തടസ്സങ്ങളില്‍ നിന്നും മോചനം ലഭിക്കും. അനന്ത ചതുര്‍ദശി ആരാധനാ രീതികള്‍ എന്താണെന്ന് ഇവിടെ നിങ്ങള്‍ക്ക് വായിച്ചറിയാം.

അനന്ത ചതുര്‍ദശിയുടെ പ്രാധാന്യം

മഹാവിഷ്ണു അനന്തന്‍ എന്നും അറിയപ്പെടുന്നു. അനന്ത ചതുര്‍ദശി ദിനത്തില്‍ സാധാരണയായി പുരുഷന്മാര്‍ അവരുടെ എല്ലാ മുന്‍കാല പാപങ്ങളില്‍ നിന്നും മോചനം നേടുന്നതിനും അവരുടെ കുട്ടികളുടെയും കുടുംബത്തിന്റെയും ക്ഷേമത്തിനുമായി അനന്ത ചതുര്‍ദശി വ്രതം അനുഷ്ഠിക്കുന്നു. എന്നാല്‍ പ്രായവും ലിംഗഭേദവും പരിഗണിക്കാതെ ആര്‍ക്കും അനന്ത ചതുര്‍ദശിയുടെ ഈ ശുഭദിനത്തില്‍ ഉപവാസം ആചരിക്കാവുന്നതാണ്. ചതുര്‍ദശി വ്രതം അനുഷ്ഠിക്കുന്ന ഭക്തര്‍ക്ക് ഭഗവാന്‍ വിഷ്ണു ആരോഗ്യം, സമ്പത്ത്, സ്വത്ത്, ധനം എന്നിവ നല്‍കുന്നു. ഗണേശ നിമഞ്ജനത്തിന്റെ ഉത്സവത്തിനും അനന്ത ചതുര്‍ദശി പ്രസിദ്ധമാണ്. പത്ത് ദിവസത്തോളം പൂര്‍ണ്ണ സമര്‍പ്പണത്തോടും ഭക്തിയോടും കൂടി ഗണപതിയെ ആരാധിച്ചതിന് ശേഷം ആളുകള്‍ ഈ ദിവസം ഗണപതി വിഗ്രഹങ്ങളെ നിമഞ്ജനം ചെയ്യുന്നു.

അനന്ത ചതുര്‍ദശി കഥ

ചൂതാട്ടത്തിനിടയില്‍ പാണ്ഡവര്‍ക്ക് അവരുടെ എല്ലാ സമ്പത്തും നഷ്ടപ്പെട്ട് നീണ്ട 12 വര്‍ഷക്കാലം വനവാസത്തിന് പോകേണ്ടിവന്നു. ഈ പ്രശ്നത്തില്‍ നിന്ന് കരകയറാന്‍ ഒരു പരിഹാരം നിര്‍ദ്ദേശിക്കാന്‍ യുധിഷ്ടിരന്‍ കൃഷ്ണനോട് ആവശ്യപ്പെട്ടു. തുടര്‍ന്ന് നഷ്ടപ്പെട്ട രാജ്യവും സമ്പത്തും വീണ്ടെടുക്കുന്നതിനായി ഈ പ്രത്യേക ദിവസം വ്രതം അനുഷ്ഠിക്കാനും അനന്തനെ ആരാധിക്കാനും കൃഷ്ണന്‍ അവരെ ഉപദേശിച്ചു.

അനന്ത ചതുര്‍ദശിയുടെ ആചാരങ്ങള്‍

അനന്ത ദാരം എന്ന ചരട് കെട്ടുന്നതാണ് ഈ ദിവസത്തെ പ്രധാന ആചാരം. ഇത് യഥാര്‍ത്ഥത്തില്‍ പതിനാല് ത്രെഡുകളുള്ള ഒരു കോട്ടണ്‍ ബാന്‍ഡാണ്, കൂടാതെ ത്രെഡ് ബാന്‍ഡിന്റെ പ്രത്യേക സ്ഥലങ്ങളില്‍ പതിനാല് കെട്ടുകളുമുണ്ട്. സ്ത്രീകള്‍ അനന്ത ദാരം ഇടതു കൈയിലും പുരുഷന്മാര്‍ വലതുവശത്തും കെട്ടുന്നു. 14 കെട്ടുകള്‍ മനുഷ്യശരീരത്തിലെ 14 ഗ്രന്ഥികളാണെന്ന് പറയപ്പെടുന്നു. ഈ ശുഭദിനത്തില്‍, അനന്തപൂജയ്ക്ക് ശേഷം ഭക്തര്‍ അനന്ത ദാരം കെട്ടിയാല്‍ അത് മഹാവിഷ്ണുവിന്റെ ഊര്‍ജ്ജത്തെ ആകര്‍ഷിക്കുമെന്ന് പറയുന്നു.

മഹാവിഷ്ണു ആരാധന

ഈ ദിവസം രാവിലെ മുതല്‍ വൈകുന്നേരം വരെ മുഴുവന്‍ സമയവും വ്രത വിധി പിന്തുടര്‍ന്ന് ഒരാള്‍ക്ക് അനന്തവ്രതം ആചരിക്കാം. ഇത് സാധ്യമല്ലെങ്കില്‍, ആ ദിവസം ഒരുനേരം പഴങ്ങള്‍ കഴിച്ച് വ്രതമെടുക്കാം. എന്നിരുന്നാലും, മഹാവിഷ്ണുവിന്റെ അനുഗ്രഹത്തിനായ ഭക്തര്‍ ഈ ദിനം പൂര്‍ണ ഉപവാസം അനുഷ്ഠിക്കുന്നു. ഭക്തര്‍ മഹാവിഷ്ണുവിന്റെയോ ശ്രീകൃഷ്ണന്റെയോ ക്ഷേത്രം സന്ദര്‍ശിച്ച് പ്രാര്‍ത്ഥനയും അനന്തപൂജയും നടത്തുന്നു. ഇത് സാധ്യമല്ലെങ്കില്‍ നിങ്ങള്‍ക്ക് രാവിലെ വീട്ടില്‍ തന്നെ പ്രാര്‍ത്ഥന നടത്താം. മഹാവിഷ്ണുവിന്റെ വിഗ്രഹത്തെ ചന്ദനപ്പൊടി, പൂക്കള്‍, പഴങ്ങള്‍ എന്നിവ ഉപയോഗിച്ച് പൂജിക്കണം.

അനന്ത ചതുര്‍ദശിയില്‍ ശുഭകരമായ യോഗം

ഇത്തവണത്തെ അനന്ത ചതുര്‍ദശി സെപ്റ്റംബര്‍ 9ന് വെള്ളിയാഴ്ച ആഘോഷിക്കും. ഈ ദിവസം രണ്ട് ശുഭകരമായ യാദൃശ്ചികതകള്‍ സൃഷ്ടിക്കപ്പെടുന്നു. ഈ ശുഭ യോഗങ്ങള്‍ ഈ ദിവസത്തിന്റെ പ്രാധാന്യം കൂടുതല്‍ വര്‍ധിപ്പിക്കുന്നു. ഈ ദിവസം സുകര്‍മയോഗത്തിന്റെയും രവിയോഗത്തിന്റെയും സംയോജനമാണ് രൂപപ്പെടുന്നത്. സുകര്‍മ്മ യോഗയില്‍ ചെയ്യുന്ന മംഗളകരമായ പ്രവൃത്തികള്‍ വിജയത്തിലേക്ക് നയിക്കുമെന്ന് വിശ്വസിക്കപ്പെടുന്നു. അതേ സമയം രവിയോഗത്തില്‍ വിഷ്ണുവിനെ ആരാധിക്കുന്നതിലൂടെ ഭക്തര്‍ക്ക് പാപങ്ങളില്‍ നിന്ന് മുക്തി ലഭിക്കും.