വസ്ത്രങ്ങളില്‍ നിന്ന് വിയര്‍പ്പ് കറ നീക്കാന്‍ എളുപ്പവഴി

Updated: Friday, April 2, 2021, 13:57 [IST]

ദിവസം കഴിയുന്തോറും വേനല്‍ച്ചൂട് കടുത്തുകൊണ്ടിരിക്കുകയാണ്. ചൂടുള്ള ഈ സീസണ്‍ വിവിധ ചര്‍മ്മ പ്രശ്‌നങ്ങള്‍ക്കും ആരോഗ്യ പ്രശ്നങ്ങള്‍ക്കും വഴിവയ്ക്കുന്നു. മാത്രമല്ല, അമിതമായ വിയര്‍പ്പിനും കാരണമാകുന്നു. ശരീര താപനില തണുപ്പിക്കാന്‍ വിയര്‍പ്പ് ഒരു സാധാരണ പ്രക്രിയയാണെങ്കിലും ഇത് പല പ്രശ്നങ്ങള്‍ക്കും കാരണമാകുന്നു. അമിതമായ വിയര്‍പ്പ് നിങ്ങളുടെ വസ്ത്രങ്ങളെ മോശമാക്കിയേക്കാം. ഇത് ദുര്‍ഗന്ധത്തിനും വസ്ത്രങ്ങളില്‍ കറയ്ക്കും കാരണമാകുന്നു.

ഡിയോഡറന്റുകള്‍ പ്രയോഗിക്കുന്നതും സ്ഥിതി കൂടുതല്‍ വഷളാക്കും. നിങ്ങളുടെ വസ്ത്രങ്ങള്‍ പരിരക്ഷിക്കാനും അവ ദീര്‍ഘകാലം നിലനിര്‍ത്താനും നിങ്ങള്‍ ആഗ്രഹിക്കുന്നുവെങ്കില്‍, വിയര്‍പ്പ് കറ നീക്കാന്‍ കുറച്ച് വീട്ടുവൈദ്യങ്ങള്‍ ഉണ്ട്. ഇതാ, നിങ്ങളുടെ വസ്ത്രങ്ങളില്‍ നിന്ന് വിയര്‍പ്പ് കറ എളുപ്പത്തില്‍ കളയാനുള്ള ചില വഴികള്‍ വായിച്ചറിയൂ.

ആസ്പിരിന്‍ ഗുളികകള്‍

നിങ്ങളുടെ കോട്ടണ്‍ വസ്ത്രങ്ങളില്‍ വിയര്‍പ്പ് തട്ടി മഞ്ഞനിറമാകുന്നുണ്ടെങ്കില്‍, ആസ്പിരിന്‍ ഗുളികകള്‍ ഉപയോഗിച്ച് അവ വൃത്തിയാക്കാനാകും. 2-3 ആസ്പിരിന്‍ ഗുളികകള്‍, 2 ടേബിള്‍സ്പൂണ്‍ വെള്ളം എന്നിവ മാത്രം മതി. ടാബ്ലറ്റുകള്‍ ഒരു സ്പൂണ്‍ ഉപയോഗിച്ച് പൊടിച്ചെടുക്കുക. ഇതിലേക്ക് അല്‍പം വെള്ളം ചേര്‍ത്ത് കട്ടിയുള്ള പേസ്റ്റ് രൂപപ്പെടുത്തുക. ഇത് തുണിയില്‍ പ്രയോഗിച്ച് ഒരു ടൂത്ത് ബ്രഷ് ഉപയോഗിച്ച് സൗമ്യമായി സ്‌ക്രബ് ചെയ്യുക. അതിനുശേഷം കറ ഒഴിവാക്കാന്‍ സാധാരണ വെള്ളത്തില്‍ കഴുകുക.

ബൈകാര്‍ബ് സോഡ

എത്ര കഠിനമായ കറ നീക്കാനും നിങ്ങള്‍ക്ക് സോഡ ഉപയോഗിക്കാം. 3-4 ടേബിള്‍സ്പൂണ്‍ ബൈകാര്‍ബ് സോഡ, ഒരു കപ്പ് ചെറുചൂടുള്ള വെള്ളം എന്നിവയാണ് വേണ്ടത്. ഒരു കപ്പില്‍ രണ്ട് ചേരുവകളും ചേര്‍ക്കുക. ഇത് നന്നായി മിക്‌സ് ചെയ്ത് വസ്ത്രങ്ങളിലെ കറകളില്‍ ഒഴിക്കുക. നിങ്ങളുടെ കൈ ഉപയോഗിച്ച് സ്‌ക്രബ് ചെയ്ത ശേഷം തുണി സാധാരണ വെള്ളത്തില്‍ കഴുകുക.

ഹൈഡ്രജന്‍ പെറോക്‌സൈഡ്

ഡെനിം ജാക്കറ്റുകളോ യോഗ പാന്റുകളോ ആകട്ടെ ഏത് തരത്തിലുള്ള തുണിയില്‍ നിന്നും കറകള്‍ നീക്കാന്‍ ഫലപ്രദമാണ് ഹൈഡ്രജന്‍ പെറോക്‌സൈഡ്. ½ ടേബിള്‍സ്പൂണ്‍ ഹൈഡ്രജന്‍ പെറോക്‌സൈഡ്, അര കപ്പ് വെള്ളം, 1 ടീസ്പൂണ്‍ ബൈകാര്‍ബണേറ്റ് സോഡ എന്നിവയാണ് ആവശ്യം. മൂന്ന് ചേരുവകളും ഒരു പാത്രത്തില്‍ കലര്‍ത്തുക. കറ പിടിച്ച തുണി ഈ ലായനിയില്‍ ഏകദേശം 10 മിനിറ്റ് മുക്കിവയ്ക്കുക. ശേഷം സാധാരണ വെള്ളം ഉപയോഗിച്ച് പതിവുപോലെ കഴുകുക.

ഓക്‌സിജന്‍ ബ്ലീച്ച് സ്റ്റെയിന്‍ റിമൂവര്‍

വസ്ത്രത്തിലെ വിയര്‍പ്പ് കറ നീക്കാന്‍ ഒന്നും പ്രവര്‍ത്തിക്കുന്നില്ലെന്ന് തോന്നുകയാണെങ്കില്‍, നിങ്ങള്‍ക്ക് ഓക്‌സിജന്‍ ബ്ലീച്ച് സ്റ്റെയിന്‍ റിമൂവര്‍ പരീക്ഷിക്കാം. ഇത് സാധാരണ ബ്ലീച്ചിനേക്കാള്‍ കറകള്‍ വൃത്തിയാക്കുന്നു. 1 ടേബിള്‍ സ്പൂണ്‍ ഓക്‌സിജന്‍ ബ്ലീച്ച് സ്റ്റെയിന്‍ റിമൂവര്‍, അര കപ്പ് വെള്ളം എന്നിവയാണ് ആവശ്യം. രണ്ട് ചേരുവകളും ഒരു കപ്പില്‍ മിക്‌സ് ചെയ്യുക. കറകളില്‍ ഒഴിക്കുക. 15 മിനിറ്റ് കഴിഞ്ഞ് സാധാരണ വെള്ളം ഉപയോഗിച്ച് കഴുകുക.

നാരങ്ങാ നീര്‌

വിറ്റാമിന്‍ സി അടങ്ങിയ നാരങ്ങ അസിഡിറ്റി സ്വഭാവമുള്ളതാണ്. ഇത് വസ്ത്രങ്ങളില്‍ നിന്ന് കറയും മറ്റും നീക്കംചെയ്യാന്‍ മികച്ചതാണ്. 4-5 ടേബിള്‍സ്പൂണ്‍ നാരങ്ങ നീര്, അര കപ്പ് വെള്ളം എന്നിവ എടുക്കുക. ഒരു പാത്രത്തില്‍ നാരങ്ങ പിഴിഞ്ഞെടുക്കുക. ഇതിലേക്ക് വെള്ളം ചേര്‍ക്കുക. ഇത് കറയില്‍ ഒഴിച്ച് ഒരു മണിക്കൂര്‍ വിടുക. തുടര്‍ന്ന് വെള്ളം ഉപയോഗിച്ച് പതിവുപോലെ കഴുകുക.