കോലം വരക്കാം, ദുര്‍ഗാപൂജയെ വരവേല്‍ക്കാം

Published: Thursday, September 29, 2011, 9:41 [IST]

കോലം വരക്കുന്നത് നമ്മുടെ പല ആഷോഷങ്ങള്‍ക്കും ഒഴിവാക്കാനാവാത്ത ഘടകമാണ്. ദുര്‍ഗാപൂജക്ക് കോലം വരക്കുന്നത് ബംഗാളികള്‍ക്കിടയില്‍ ഒഴിവാക്കാനാവാത്ത ആചാരമാണ്. ബംഗാളിയില്‍ അല്‍പന എന്നാണ് കോലം അറിയപ്പെടുന്നത്. വടക്കേയിന്ത്യയില്‍ രംഗോളി എന്നാണ് കോലം അറിയപ്പെടുന്നത്. കേരളത്തില്‍ ഓണത്തിന് പൂക്കളമിടുന്നതിനു സമാനമാണിത്.
തമിഴ്‌നാട്ടിലും കേരളത്തിലെ തമിഴ്ബ്രാഹ്മണര്‍ക്കിടയിലും കോലം വരക്കുന്നത് പ്രധാന ആചാരമാണ്. കേരളത്തിലും ഓണസമയത്തും ഉത്സങ്ങളുടെ സമയത്തും കോലമിടാറുണ്ട്.

രംഗോളിക്കും കോലത്തിനും വ്യത്യാസമുണ്ട്. പേരു സൂചിപ്പിക്കുന്നതു പോലെ പല നിറങ്ങളിലാണ് രംഗോലി വരക്കുക. എന്നാല്‍ കോലമാകട്ടെ വെള്ളനിറം കൊണ്ടു മാത്രമാണ് വരയ്ക്കുക. ദുര്‍ഗാപൂജക്ക് ഭംഗിയായി എങ്ങിനെ കോലമിടാമെന്നു നോക്കാം,

കോലമിടാന്‍ ആദ്യം വേണ്ടത് അരിമാവാണ്. ഇതിനായി അരി വെള്ളത്തിലിട്ടു കുതിര്‍ത്ത് അരച്ചെടുക്കണം. ഗുണനിലവാരം കുറഞ്ഞ അരി ഉപയോഗിക്കുന്നതാണ് നല്ലത്. ഇത് വേഗം കുതിര്‍ന്നുകിട്ടും. മൃദുവായി അരക്കാനും സാധിക്കും. പാകത്തിന് വെളളം ചേര്‍ക്കേണ്ടത് പ്രധാനമാണ്. കൂടുതല്‍ വെള്ളമായാലും വെള്ളം കുറവായാലും കോലം നന്നാവില്ല.

നല്ല വെളളനിറം ലഭിക്കാന്‍ വേണമെങ്കില്‍ ഒരു നുള്ള സിങ്ക് ഓക്‌സൈഡ് ചേര്‍ക്കാം. പാരമ്പര്യരീതിയില്‍ ഇതു ചേര്‍ക്കില്ല.

രംഗോലിയില്‍ ആദ്യം ഡിസൈന്‍ വരച്ച് അതിനുമുകളില്‍ കളറിടുകയാണ് ചെയ്യുക. എന്നാല്‍ കോലം വരക്കുവാന്‍ ഇതാവശ്യമില്ല. മാവു കൊണ്ട് നേരിട്ട് വരക്കാം.

ദേവതമാരുടെ രൂപങ്ങളും കലശവും കോലം വരക്കാന്‍ പൊതുവായി ഉപയോഗിച്ചു വരുന്ന ഡിസൈനുകളാണ്.

ത്രികോണാകൃതിയിലോ സമചതുരമായോ കോലം വരക്കാം. എന്നാല്‍ പാരമ്പര്യരീതിയിലുള്ള കോലങ്ങളാണ് ദുര്‍ഗാപൂജക്കു നല്ലത്.

നിങ്ങളുടെ വ്യത്യസ്തമായ കലാഭാവനക്കനുസരിച്ച് കോലം ഭംഗിയാക്കാം.