യൂട്രസ് ഇറങ്ങിവരുന്നോ?

സ്ത്രീകള്‍ക്ക് ഗര്‍ഭപാത്ര സംബന്ധമായ പ്രശ്‌നങ്ങള്‍ ഇക്കാലത്ത് ധാരാളമായി കണ്ടുവരുന്നു. ഇത്തരമൊരു പ്രശ്‌നമാണ് ഗര്‍ഭപാത്രം ഇറങ്ങി വരുന്നത്.

മെനോപോസ് സമയത്താണ് സാധാരണയായി ഈ അവസ്ഥ കണ്ടുവരുന്നത്. ഗര്‍ഭപാത്രത്തെ ഉറപ്പിച്ചു നിര്‍ത്തുന്ന പേശികളുടെ ബലം കുറയുമ്പോഴാണ് സാധാരണയായി ഈ പ്രശ്‌നമുണ്ടാകുന്നത്.

ഈ പ്രശ്‌നമുണ്ടാകുന്നതിന് കാരണങ്ങള്‍ പലതാണ്. ഗര്‍ഭകാലത്തും പ്രസവസമയത്തും ഇത്തരം പേശികള്‍ വികസിക്കും. പ്രസവശേഷം ഇത് സാധാരണ ഗതിയിലേക്ക് മടങ്ങുകയും ചെയ്യും. പ്രസവശേഷം ആവശ്യത്തിന് ശരീരരക്ഷ കിട്ടാതിരിക്കുക, ഇടവേളകള്‍ അധികമില്ലാത്ത പ്രസവം തുടങ്ങിയവ ഈ പ്രശ്‌നത്തിന് കാരണമാകുന്നു.

മെനോപോസിന് മുന്‍പ് ഈസ്ട്രജന്‍ ആവശ്യത്തിന് ശരീരത്തില്‍ ഉള്ളതിനാല്‍ പേശികള്‍ക്ക് അയവുണ്ടാകുന്നില്ല. എന്നാല്‍ ആര്‍ത്തവവിരാമത്തിന് ശേഷം ഈ ഹോര്‍മോണിന്റെ കുറവ് പ്രശ്‌നങ്ങളുണ്ടാക്കുകയും ചെയ്യുന്നു.

മൂത്രമൊഴിക്കുമ്പോഴും മറ്റും ഗര്‍ഭാശയം ഇറങ്ങിവരുന്നതായി അനുഭവപ്പെടും. അടിവയറ്റില്‍ വേദനയും തോന്നും. തക്ക സമയത്ത് ചികിത്സ ലഭ്യമായില്ലെങ്കില്‍ ഗര്‍ഭപാത്രം പുറത്തേക്കു തള്ളിപ്പോരാനും സാധ്യതയുണ്ട്.

വ്യായാമമാണ് ഈ പ്രശ്‌നം വരാതിരിക്കാനുള്ള ഏറ്റവും നല്ല ചികിത്സ. കെഗെല്‍ വ്യായാമങ്ങള്‍ അങ്ങേയറ്റം ഗുണം ചെയ്യും. മലബന്ധം വരാതെ സൂക്ഷിക്കേണ്ടത് വളരെ പ്രധാനം. നാരുകളടങ്ങിയ ഭക്ഷണങ്ങള്‍ ശീലമാക്കണം. സര്‍ജറിയിലൂടെ ഈ പ്രശ്‌നത്തിന് പരിഹാരം കാണാം. ലൂപ്‌ഹോള്‍ ശസ്ത്രക്രിയ ഇതിന് സഹായകമാണ്.