നിറം വര്‍ദ്ധിക്കാന്‍ മഞ്ഞളും ചന്ദനവും

നിറം നല്‍കാന്‍ മഞ്ഞളിനോളം കഴിവ് ഒരു ബ്യൂട്ടീഷന്മാര്‍ക്കുമില്ല. ഇതിന്റെ ഔഷധഗുണവും എടുത്തുപറയേണ്ടതാണ്. മഞ്ഞള്‍ ഉണക്കി പൊടിച്ച് പാല്‍പ്പാടയും പാലും കടലമാവും ചേര്‍ത്ത മിശ്രിതം മുഖത്ത് തേച്ച് ഉണങ്ങിക്കഴിയുമ്പോള്‍ കഴുകിക്കളയാം. പാക്കറ്റില്‍ കിട്ടുന്ന മഞ്ഞപ്പൊടികള്‍ ഉപയോഗിക്കാതിരിക്കുകയാണ് നല്ലത്. ഇവയില്‍ രാസവസ്തുക്കള്‍ക്കുള്ള സാധ്യത കൂടുതലാണ്.

ബദാം ആരോഗ്യത്തിന് മാത്രമല്ലാ, സൗന്ദര്യസംരക്ഷണത്തിനും നല്ലതാണ്. 10 ബദാം രാത്രി മുഴുവന്‍ വെള്ളത്തിലിട്ട് കുതിര്‍ത്ത് അരച്ചെടുക്കുക. ഇത് തേനില്‍ ചേര്‍ത്ത് മുഖത്ത് സ്‌ക്രബറായും ഫേസ്പാക്കായും ഉപയോഗിക്കാം. നിറം വര്‍ദ്ധിക്കാന്‍ പറ്റിയ നല്ലൊരു മാര്‍ഗമാണ് ഇത്.

ചന്ദനം നല്ലൊരു സൗന്ദര്യസംരക്ഷണ മാര്‍ഗമാണ്. ചന്ദനം അരച്ചോ ചന്ദനപ്പൊടി നനച്ചോ മുഖത്തു തേയ്ക്കാം. ചന്ദനം നാരങ്ങാനീര്, തക്കാളി നീര് എന്നിവയുമായി ചേര്‍ത്ത് മുഖത്തിടുന്നതും നല്ലതാണ്. നിറം വര്‍ദ്ധിപ്പിക്കാന്‍ മാത്രമല്ലാ, പാടുകളും കുരുക്കുളും അകറ്റാന്‍ കൂടിയുള്ള ഒരു നല്ല മരുന്നാണ് ചന്ദനം.

കുങ്കുമപ്പൂ കുങ്കുമത്തിന്റെ നിറം നല്‍കുമെന്നാണ് ചൊല്ല്. അല്‍പം കുങ്കമപ്പൂ പാല്‍പ്പാടയും തൈരും ചേര്‍ത്ത് മുഖത്തു തേച്ചാല്‍ നിറം വര്‍ദ്ധിക്കും. ഈ മിശ്രിതം ഉണങ്ങിയ ശേഷം ചെറുചൂടുള്ള വെള്ളം കൊണ്ട് കഴുകിക്കളയാം.