പഴവര്‍ഗങ്ങള്‍ അമിതമായാല്‍ തടി?

ആരോഗ്യത്തിന് ഏറെ മികച്ചവയാണ് പഴവര്‍ഗങ്ങളെന്ന് കാര്യം എല്ലാവര്‍ക്കും അറിവുള്ളതാണ്. പ്രകൃതിദത്തമായ ആരോഗ്യമാണ് പഴങ്ങളില്‍ നിന്നും ലഭിയ്ക്കുന്നത്.

എന്നാല്‍ അധികമായാല്‍ അമൃതും വിഷമെന്നു പറഞ്ഞ പോലെയാണ് കാര്യം. പഴങ്ങളും അമിതമായാല്‍ ദോഷം വരുത്തുമെന്നാണ് വിദഗ്ധര്‍ അഭിപ്രായപ്പെടുന്നത്.

പ്രധാന കാരണം മിക്കവാറും പഴവര്‍ഗങ്ങളും കൂടിയ തോതില്‍ മധുരമടങ്ങിയവയാണെന്നതാണ്.

പഴങ്ങളില്‍ അടങ്ങിയിരിയ്ക്കുന്നത് ഫ്രക്ടോസ് എന്ന മധുരമാണെങ്കിലും ഇത് ശരീരത്തില്‍ മധുരമായാണ് എത്തുന്നത്. ആരോഗ്യകരമായ മധുരമെങ്കിലും പ്രമേഹസാധ്യത തള്ളിക്കളയാനാവില്ലെന്നര്‍ത്ഥം. ഇതുകൊണ്ടുതന്നെ പ്രമേഹരോഗികള്‍ക്ക് ഉപയോഗിയ്ക്കാവുന്നവയ്ക്കു പരിമിതികളുമുണ്ട്.

ഫ്രൂട്‌സില്‍ പോഷകങ്ങള്‍ ധാരാളമുണ്ടെങ്കിലും കാര്‍ബോഹൈഡ്രേറ്റുകള്‍, അമിനോ ആസിഡുകള്‍ തുടങ്ങിയവയില്ല. ഇതുകൊണ്ടുതന്നെ ഒരു പൂര്‍ണ ആഹാരമാണ് പഴങ്ങളെന്നു കരുതാനുമാവില്ല.

അമിതമായി പഴങ്ങള്‍ കഴിച്ചാല്‍ മധുരത്തിന്റെ തോത് അമിതമാകും. ഇത് ചെറിയ തോതിലെങ്കിലും വണ്ണം കൂടാനും കാരണമാകില്ലെന്നു പറഞ്ഞു കൂടാ.

മാത്രമല്ല, ചില പഴവര്‍ഗങ്ങളെങ്കിലും ഗ്യാസുണ്ടാക്കുന്നവയാണ്. ഇവ അമിതമായി കഴിയ്ക്കുന്നത് ഈ പ്രശ്‌നത്തിനും കാരണമാകും.

ഫ്രൂട്‌സ് ജ്യൂസായി കുടിയ്ക്കുമ്പോള്‍ ഇതിലെ നാരുകളടക്കമുള്ള പല പോഷകങ്ങളും നഷ്ടപ്പെട്ടേക്കും. മാത്രമല്ല, കൃത്രിമ മധുരം ചേര്‍ക്കുമ്പോള്‍ തടിയും കൂടും.

ദിവസം ഒന്നര മുതല്‍ രണ്ടു കപ്പു വരെ പഴങ്ങള്‍ കഴിയ്ക്കുന്നതാണ് ശരിയായ അളവ്. മധുരത്തിന്റെ അളവു കുറഞ്ഞ പഴങ്ങള്‍ കഴിയ്ക്കുന്നതാണ് കൂടുതല്‍ നല്ലത്.

ഒരേ പഴവര്‍ഗം കൂടുതല്‍ കഴിയ്ക്കാതെ പലതരം പഴങ്ങള്‍ കുറേശെയായി കഴിയ്ക്കുന്നതാണ് കൂടുതല്‍ ഗുണകരം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.