സൗഹൃദങ്ങള്‍ക്കായി ഒരു ദിനം

ഓഗസ്റ്റ് മാസത്തിലെ ആദ്യ ഞായറാഴ്ച, സൗഹൃദ ദിനം.നിര്‍വ്വചനങ്ങള്‍ക്കും അപ്പുറത്താണ് ചില സൗഹൃദങ്ങള്‍. ഫ്രണ്ട്ഷിപ്പ് ബാന്‍ഡുകള്‍ക്കും സമ്മാനങ്ങള്‍ക്കും അപ്പുറത്താണ് ചില സൗഹൃദങ്ങള്‍. പണ്ട് കാലങ്ങളില്‍ ഇല്ലന്റിലും പോസ്റ്റ് കവറുകളിലും സമ്മാനങ്ങളുമായി എത്തിയിരുന്ന സൗഹൃദ ദിനാശംസകള്‍ ഇന്ന് പാടേ മാറിയിരിക്കുന്നു. സാങ്കേതിക വിദ്യ വളരെയേറെ വികസിച്ച ഈ കാലഘട്ടത്തില്‍ സൗഹൃദസന്ദേശങ്ങളും വാട്‌സ് ആപ്പിലൂടേയും മറ്റ് സോഷ്യല്‍ മീഡിയ മാര്‍ഗ്ഗങ്ങളിലൂടെയും എത്തുന്നു.

ഓരോ ദിവസവും മാറിക്കൊണ്ടിരിക്കുന്ന കാലഘട്ടത്തില്‍ സൗഹൃദത്തിനും നിരവധി മാറ്റങ്ങള്‍ സംഭവിച്ചു കൊണ്ടിരിക്കുകയാണ്. പങ്കുവെക്കലും സങ്കടവും സന്തോഷവും എല്ലാം അവനവനിലേക്ക് തന്നെ ചുരുങ്ങിക്കൊണ്ടിരിക്കുന്ന സമയമാണ് ഇത്. യന്ത്രവത്കൃതമായ ഈ ലോകത്ത് ആത്മാര്‍ത്ഥത എന്നത് ഓരോ നിമിഷവും ഇല്ലാതായിക്കൊണ്ടിരിക്കുകയാണ്.

പുതുതലമുറ സൗഹൃദത്തെക്കുറിച്ചും സുഹൃത്ബന്ധങ്ങളെക്കുറിച്ചും ഇനിയും മനസ്സിലാക്കേണ്ടതുണ്ട്. ഹൈ ബൈ എന്ന വാക്കുകള്‍ക്കും അതീതമാണ് സൗഹൃദം. ആത്മാവ് നഷ്ടപ്പെടുന്ന സൗഹൃദങ്ങളാണ് നമ്മളില്‍ പലരും ഇന്ന് കൊണ്ട് നടക്കുന്നത്. യാന്ത്രികമായ കമ്പ്യൂട്ടര്‍ കീ ബോര്‍ഡിലും മൊബൈലിലും ഒതുങ്ങുന്ന സൗഹൃദങ്ങളാണ് ഇന്ന് പലതും.

എന്നാല്‍ ഇത്തരം പൊള്ളയായ സൗഹൃദങ്ങള്‍ക്കും അപ്പുറത്ത് സൗഹൃദം എന്താണെന്നും സൗഹൃദത്തിന്റെ ആഴം മനസ്സിലാക്കുന്നതുമായ സൗഹൃദങ്ങള്‍ ഇന്നും ചുരുക്കം ചിലരിലും ഉണ്ട്. ഇത്തരം സൗഹൃദങ്ങള്‍ക്ക് ഈ സൗഹൃദദിനത്തില്‍ സല്യൂട്ട്. ആത്മാവ് നഷ്ടമായിക്കൊണ്ടിരിക്കുന്ന പല സൗഹൃദങ്ങളും ഇവരില്‍ നിന്നും സൗഹൃദമെന്തെന്ന് കണ്ടു പഠിക്കേണ്ടതുണ്ട്.