ഗര്‍ഭവും കാപ്പിയും തമ്മില്‍

Published: Saturday, August 18, 2012, 17:16 [IST]

ഗര്‍ഭകാലത്ത് കഴിക്കേണ്ടതും ഒഴിവാക്കേണ്ടതുമായി ധാരാളം ഭക്ഷണങ്ങളും പാനീയങ്ങളുമുണ്ട്. ഒരു കപ്പു കാപ്പി നമുക്ക് ഉന്മേഷം തരും. എന്നാല്‍ ഒരു കപ്പു കാപ്പി ഗര്‍ഭിണിക്കുണ്ടാക്കുന്ന ദോഷവശങ്ങള്‍ കുറച്ചൊന്നുമില്ല.

ഗര്‍ഭകാലത്ത് കാപ്പിയുണ്ടാക്കുന്ന ഏറ്റവും വലിയ ഭീഷണി അബോര്‍ഷന്‍ തന്നെയാണ്. ദിവസവും 200 മില്ലീഗ്രാമെങ്കിലും കഫീന്‍ ഉള്ളില്‍ എത്തുന്ന ഗര്‍ഭിണിക്ക് അബോര്‍ഷന്‍ സംഭവിക്കാനുള്ള സാധ്യത കാപ്പി കുടിക്കാത്ത മറ്റുള്ളവരേക്കാള്‍ രണ്ടിരട്ടിയാണ്.

ഗര്‍ഭസ്ഥ ശിശുവിന് മറ്റ് ആരോഗ്യപ്രശ്‌നങ്ങളും കാപ്പി വരുത്തി വയ്ക്കുന്നുണ്ട്. അമ്മ കാപ്പി കുടിക്കുമ്പോള്‍ കഫീന്‍ പൊക്കിള്‍ക്കൊടിയിലൂടെ നേരിട്ട് കുഞ്ഞിന്റെ ശരീരത്തിലേക്ക് പ്രവേശിക്കുന്നു. കാപ്പി കുടിക്കുമ്പോള്‍ മുതിര്‍ന്നവര്‍ക്കുണ്ടാകുന്ന ഉറക്കക്കുറവ് അടക്കമുള്ള പല പ്രശ്‌നങ്ങളും വയറ്റിലെ കുഞ്ഞിനുമുണ്ടാകും. കുഞ്ഞിന്റെ ഹൃദയമിടിപ്പും ശ്വാസോച്ഛാസഗതിയും വര്‍ദ്ധിക്കും.

കാപ്പി ഗര്‍ഭസ്ഥ ശിശുവിന്റെ തൂക്കം കുറയ്ക്കുന്നതായും കണ്ടെത്തിയിട്ടുണ്ട്. കഫീന്‍ രക്തക്കുഴലുകളെ ചുരുക്കുന്നു. ഇതുമൂലം പൊക്കിള്‍ക്കൊടിയിലൂടെ കുഞ്ഞിലേക്കെത്തുന്ന രക്തത്തിന്റെ അളവും കുറയുന്നു.

ഗര്‍ഭിണിയുടെ ബിപി കൂടാനും കാപ്പി കാരണമാകുന്നു. ഇത് പ്രസവസമയത്തും പ്രശ്‌നങ്ങള്‍ സൃഷ്ടിക്കും.

കാപ്പി കുടിക്കുന്നതിലൂടെ മാത്രമല്ലാ, കഫീന്‍ അടങ്ങിയ എന്ത് ശരീരത്തിനുള്ളില്‍ ചെന്നാലും ഇതു തന്നെയായിരിക്കും ഫലം. പല ശീതളപാനീയങ്ങളിലും കഫീന്‍ അടങ്ങിയിട്ടുണ്ടെന്നോര്‍ക്കുക.