പല്ലുകടിയ്ക്കുന്നതിന്റെ കാരണം, പരിഹാരം

ഉറക്കത്തില്‍ പല്ലു കടിക്കുന്ന സ്വഭാവം പലര്‍ക്കുമുണ്ട്. ബ്രോക്‌സിസം എന്നാണ് ഇത് അറിയപ്പെടുന്നത്.

ഉറക്കത്തില്‍ പല്ലു കടിയ്ക്കുന്ന ഈ ശീലം തനിയെ മാറുമെന്നു കരുതുന്നത് തെറ്റാണ്. കേള്‍ക്കുന്നവര്‍ക്ക് അസ്വസ്ഥതയുണ്ടാക്കുമെന്നു മാത്രമല്ലാ, പല്ലു കേടാക്കുന്ന ഒരു ശീലം കൂടിയാണിത്.

കുട്ടികളിലും ബ്രൂക്‌സിസം കണ്ടുവരാറുണ്ട്. കുട്ടികളുടെ വളര്‍ച്ചയില്‍ രണ്ടു സമയത്ത് ഈ ശീലം കണ്ടുവരുന്നു. കുഞ്ഞുങ്ങളായിരിക്കുമ്പോള്‍ പല്ലില്ലെങ്കിലും മോണ അമര്‍ത്തിക്കടിക്കുന്ന ശീലം ചില കുട്ടികള്‍ക്കുണ്ടാകാറുണ്ട്. ചില കുട്ടികളില്‍ പല്ലു മുളച്ചു വരുമ്പോള്‍ അതു കൊണ്ടുള്ള അസ്വസ്ഥത കാരണം പല്ലും മോണയും അമര്‍ത്തിക്കടിക്കും. എന്നാല്‍ ഇത് സ്ഥിരമായ ഒരു ഇഫക്ട് കുട്ടികളിലുണ്ടാക്കില്ല.

കുട്ടികളിലെ പാല്‍പ്പല്ല് പൊഴിഞ്ഞ് പുതിയ പല്ലു വരുമ്പോളും ചിലപ്പോള്‍ ഈ ശീലം തുടരും. മുകളിലും താഴെയുമുള്ള പല്ലുകള്‍ ഒരേ നിരപ്പിലല്ലെങ്കിലും കുട്ടികളില്‍ ഈ ശീലം കണ്ടുവരാറുണ്ട്. ചില കുട്ടികളില്‍ അലര്‍ജി, എന്‍ഡോക്രൈന്‍ പ്രശ്‌നങ്ങള്‍ എന്നിവ കാരണവും പല്ലു കടിക്കുന്ന ശീലമുണ്ടാകും. ഇത് മുതിര്‍ന്നാലും നിലനില്‍ക്കുകയും ചെയ്യും.

ഉറക്കത്തില്‍ പല്ലു കടിയ്ക്കുന്നതു തന്നെയാണ് ബ്രൂക്‌സിസത്തിന്റെ പ്രധാന ലക്ഷണം. അവരവര്‍ക്ക് തിരിച്ചറിയാനാകില്ലെങ്കിലും മറ്റുള്ളവര്‍ക്ക് ഇക്കാര്യം മനസിലാക്കാം. കൂര്‍ക്കംവലി പോലെ തന്നെ അടുത്തു കിടക്കുന്നവരുടെ ഉറക്കം കെടുത്തുന്ന ഒരു ശീലമാണിത്.

ബ്രൂക്‌സിസത്തിന്റെ കാരണം ഇപ്പോഴും വ്യക്തമായി തിരിച്ചറിയാനായിട്ടില്ല. സ്‌ട്രെസാണ് പ്രധാന കാരണമായി പറയുന്നത്. ദന്തരോഗങ്ങളും ഒരു പരിധി വരെ ഇതിന് കാരണമാകുന്നുണ്ട്. ഇത്തരം ശീലമുണ്ടെങ്കില്‍ ഡെന്റിസ്റ്റിന്റെ സഹായം തേടുന്നത് അത്യാവശ്യമായിരിക്കും. ദന്തരോഗങ്ങളാണ് ഇതിന് കാരണമെങ്കില്‍ പല്ലിന് ക്യാപ്പിടുക, റൂട്ട് കനാല്‍ ചെയ്യുക തുടങ്ങിയ കാര്യങ്ങള്‍ സഹായിക്കും.

പല്ലുകടിയ്ക്കുന്നതിനുള്ള പ്രധാന കാരണം സ്‌ട്രെസാണെന്നാണ് കരുതുന്നത്. അതുകൊണ്ട് സ്‌ട്രെസും ടെന്‍ഷനും ഒഴിവാക്കാനുള്ള വഴികള്‍ കണ്ടെത്തണം. യോഗ, മെഡിറ്റേഷന്‍ തുടങ്ങിയവ സഹായം ചെയ്യും.

കഫീന്‍ അടങ്ങിയ ഭക്ഷണസാധങ്ങളും പാനീയങ്ങളും മദ്യവും ഉപേക്ഷിക്കുക. പല്ലിന്റെയും മോണയുടേയും ആരോഗ്യം കാത്തു സൂക്ഷിക്കുക എന്നിവയും പല്ലു കടിയ്ക്കുന്നതിനുള്ള പരിഹാരങ്ങളാണ്.