നൃത്തമാടി ഹേമലത ഗിന്നസ് ബുക്കില്‍

Insync

oi-Siji KM

By Lakshmi

Published: Sunday, September 26, 2010, 11:31 [IST]

തൃശ്ശൂര്‍: നര്‍ത്തകി കലാമണ്ഡലം ഹേമലത ലോകറെക്കോര്‍ഡിന്റെ നെറുകയില്‍. ഏറ്റവുമധികം സമയം തുടര്‍ച്ചയായി നൃത്തം ചെയ്ത വ്യക്തിയെന്ന ഗിന്നസ് റെക്കോര്‍ഡി ഇനി ഹേമലതയ്ക്ക് സ്വന്തം.

ശനിയാഴ്ച രാത്രി 9.32നാണ് ഹേമലത റെക്കോര്‍്ഡ് കുറിച്ചത്. 108 മണിക്കൂര്‍ നൃത്തമാടിയ ഹൈദരാബാദിലെ ഡോക്ടര്‍ വട്ടിക്കോട്ട യാദഗിരി ആചാര്യയുടെ നേട്ടമാണ് ഇതോടെ പഴങ്കഥയായത്.

സപ്തംബര്‍ 20ന് രാത്രി 11.30ന് മോഹിനിയാട്ടം തുടങ്ങിയ ഹേമലത റെക്കോര്‍ഡ് നേട്ടത്തിനു ശേഷവും നൃത്തം തുടരുകയാണ്. 120 മണിക്കൂര്‍ മോഹിനിയാട്ടം അവതരിപ്പിക്കുകയാണ് ലക്ഷ്യം.

കഴിഞ്ഞ ജൂണില്‍ ലോകറെക്കോര്‍ഡിന് ശ്രമിച്ച് ഇടയ്ക്ക് ശാരീരികബുദ്ധിമുട്ടുകള്‍ കാരണം പിന്മാറിയ ഹേമലത ഇക്കുറി ചിട്ടയായ പരിശീലനത്തിലൂടെയാണ് സ്വന്തം പേരില്‍ ലോകറെക്കോര്‍ഡ് കുറിച്ചത്. കഴിഞ്ഞ തവണ 64 മണിക്കൂര്‍ മാത്രമേ ഹേമലതയ്ക്ക് പൂര്‍ത്തിയാക്കാന്‍ കഴിഞ്ഞിരുന്നുള്ളൂ.

108 മണിക്കൂര്‍ മുമ്പ് ഗണപതിസ്തുതിയോടെ തുടങ്ങിയ മോഹിനിയാട്ടം ശനിയാഴ്ച രാത്രി 'ഉഡുപ്പി കൃഷ്ണാ...' എന്ന പദം ആടുമ്പോഴാണ് റെക്കോര്‍ഡിലേക്ക് പ്രവേശിച്ചത്.

ദേവി കലാമണ്ഡലം നൃത്തവിദ്യാലയത്തിലൂടെ നൂറുകണക്കിന് കുട്ടികളെ മോഹിനിയാട്ടം പഠിപ്പിക്കുന്ന ഹേമലത ഡോക്ടര്‍ പത്മ സുബ്രഹ്മണ്യത്തിന്റെ ശിഷ്യയാണ്. പി.ബി. ജയനാണ് ഭര്‍ത്താവ്. മക്കള്‍: സ്വരൂപ്, സൗരവ്.