ശ്വാസകോശ രോഗങ്ങള്‍ തടയാം, ആരോഗ്യം കാക്കാം; എളുപ്പത്തില്‍ പരിശീലിക്കാം ശ്വസനവ്യായാമം

ദിര്‍ഘശ്വാസം

ശാന്തമായ സ്ഥലത്ത് ഇരുന്ന് സാവധാനം ശ്വാസം അകത്തേക്ക് എടുക്കുക. അപ്പോൾ നിങ്ങളുടെ ഡയഫ്രം ചുരുങ്ങുകയും വയർ വികസിക്കുകയും ചെയ്യും.അതിനു ശേഷം ചിറകുകൾ പോലെ വാരിയെല്ലുകൾ വികസിപ്പിക്കുക. തുടർന്ന് നെഞ്ചിന്റെ മുകൾഭാഗം ഉയർത്തി വികസിപ്പിച്ച ശേഷം നിശ്വസിച്ച് ശ്വാസം പുറത്തേക്ക് വിട്ട് റിലാക്സ് ചെയ്യുക. ഇത് നിങ്ങളുടെ ശ്വാസകോശത്തിന് ഫുൾ കപ്പാസിറ്റിയിൽ ശ്വസിക്കാൻ സഹായിക്കുന്നു.

നിങ്ങളുടെ പോസ്ചർ അഥവാ ശരീരഭാഷ

ശ്വസന വ്യായാമം ചെയ്യുമ്പോൾ ശരീരഭാഷ പ്രധാനമാണ്. അതിനാൽ നിലത്ത് ഉറപ്പിച്ച കസേരയിൽ ചെറുതായി പിന്നിലേക്ക് ആഞ്ഞ്, നെഞ്ചുയർത്തി വേണം ദീർഘശ്വാസം എടുക്കാൻ. മൃദുവായ നമ്മുടെ ശ്വാസകോശത്തിന് കൂടുതൽ കരുത്തു പകരാൻ ഇത് ആവശ്യമാണ്.

ധാരാളം വെള്ളം കുടിക്കുക

നമ്മുടെ ശരീരത്തിന്റെ ആരോഗ്യത്തിന് എന്നപോലെ ശ്വാസകോശ ആരോഗ്യത്തിനും ധാരാളം വെള്ളം കുടിക്കണം. ജലാംശം കൂടുതൽ ഉണ്ടാകുമ്പോൾ ശ്വാസകോശത്തിലെ മ്യൂകോസൽ നിരകൾക്ക് കട്ടി കുറയുകയും കൂടുതൽ മെച്ചപ്പെട്ട രീതിയിൽ പ്രവർത്തിക്കുകയും ചെയ്യും.

ചിരിക്കുക

ശ്വാസകോശത്തിന്റെ കപ്പാസിറ്റി കൂട്ടാൻ ചിരി നല്ലൊരു മരുന്നാണ്. ഇത് അടിവയറിലെ പേശികളെ ചലിപ്പിക്കുകയും അശുദ്ധ വായുവിനെ പുറന്തള്ളി ശുദ്ധവായുവിന് കടക്കാനുള്ള സ്ഥലം ശ്വാസകോശത്തിൽ കൊടുക്കുകയും ചെയ്യുന്നു.

വ്യായാമം ചെയ്യുക

ദിവസേന കുറഞ്ഞത് 20 മിനിറ്റ് എങ്കിലും വ്യായാമം ചെയ്യുന്നത് ശ്വാസകോശ ആരോഗ്യത്തിനും എപ്പോഴും ഉന്മേഷമായി ഇരിക്കാനും സഹായിക്കും. പതിവായുള്ള വ്യായാമത്തിലൂടെ ശ്വാസകോശ കപ്പാസിറ്റി കൂട്ടിയാൽ മൂന്നു ഗുണമുണ്ട്.മികച്ച ശ്വാസകോശം,ആരോഗ്യമുള്ള ഹൃദയം ഒപ്പം നല്ല മൂഡും ലഭിക്കും.