60 കഴിഞ്ഞവര്‍ ആരോഗ്യത്തിനായി കഴിക്കണം ഈ സൂപ്പര്‍ഫുഡുകള്‍

ഓട്‌സ്

എല്ലാ പ്രായത്തിലുമുള്ള ആളുകള്‍ക്കും കഴിക്കാവുന്ന ഒരു മികച്ച പ്രഭാതഭക്ഷണമാണ് ഓട്‌സ്. പ്രത്യേകിച്ച് പ്രായമായവര്‍ക്ക് ഇത് വളരെയേറെ ഗുണംചെയ്യുന്നു. വൈകുന്നേരം ലഘുഭക്ഷണമായും നിങ്ങള്‍ക്ക് ഇത് കഴിക്കാം. ഓട്സില്‍ ധാരാളം ഫൈബര്‍ അടങ്ങിയിട്ടുണ്ട്. ഇത് നിങ്ങളെ ഏറെ നേരം വിശപ്പില്ലാതെ നിലനിര്‍ത്തും. പ്രായമായവര്‍ക്ക് ഇത് എളുപ്പത്തില്‍ ചവച്ച് കഴിക്കാനും സാധിക്കും. പഞ്ചസാരയ്ക്ക് പകരമായി ഓട്‌സ് ഉപ്പിട്ട് കഴിക്കുന്നതാണ് നല്ലത്.

മത്തങ്ങ

വിറ്റാമിന്‍ സി, ഇ, ബീറ്റാ കരോട്ടിന്‍ എന്നിവ ധാരാളമായി അടങ്ങിയ ഒരു പച്ചക്കറിയാണ് മത്തങ്ങ. ഈ വിറ്റാമിനുകള്‍ ശരീരത്തിന്റെ കേടുപാടുകള്‍ തടയുന്നതിനും കാഴ്ച മെച്ചപ്പെടുത്തുന്നതിനും കണ്ണിന്റെ മൊത്തത്തിലുള്ള ആരോഗ്യം നിലനിര്‍ത്തുന്നതിനും സഹായിക്കും. മത്തങ്ങയില്‍ ഫൈബര്‍ അടങ്ങിയിട്ടുണ്ട്, കലോറി കുറവാണ്. പ്രായമായവര്‍ക്ക് മത്തങ്ങ കഴിക്കുന്നത് ശരീരഭാരം കുറയ്ക്കാനും ആരോഗ്യം നിലനിര്‍ത്താനും സഹായിക്കും.

നട്‌സ്, വിത്തുകള്‍

പ്രായമായവര്‍ ദിവസവും ഒരു പിടി നട്‌സും വിത്തുകളും കഴിക്കുന്നത് അവരുടെ ആരോഗ്യത്തിന് വളരെ നല്ലതാണ്. ബദാം, വാല്‍നട്ട്, കശുവണ്ടി, ചിയ വിത്തുകള്‍, ചണ വിത്ത്, മത്തങ്ങ വിത്തുകള്‍ എന്നിവയുള്‍പ്പെടെയുള്ളവ നിരവധി ആരോഗ്യ ഗുണങ്ങള്‍ നിങ്ങള്‍ക്ക് നല്‍കുന്നു. വിട്ടുമാറാത്ത രോഗങ്ങള്‍ തടയുന്നതിനും മൊത്തത്തിലുള്ള ആരോഗ്യം നിലനിര്‍ത്തുന്നതിനുമായി നിങ്ങള്‍ക്ക് ഇവ കഴിക്കാം. പ്രോട്ടീന്റെയും കാല്‍സ്യത്തിന്റെയും നല്ല ഉറവിടമാണ് നട്‌സും വിത്തുകളും. ഇത് എല്ലുകളുടെ ആരോഗ്യത്തിനും ഗുണം ചെയ്യും.

ബീറ്റ്‌റൂട്ട് സൂപ്പ്

സാധാരണയായി ആളുകള്‍ സാലഡ് അല്ലെങ്കില്‍ കറിയുടെ രൂപത്തില്‍ ബീറ്റ്‌റൂട്ട് ഉപയോഗിക്കുന്നു. പ്രായമായവരില്‍ ഭൂരിഭാഗം പേരും സൂപ്പ് കഴിക്കാന്‍ ഇഷ്ടപ്പെടുന്നു. അതിനാല്‍ നിങ്ങള്‍ക്ക് തീര്‍ച്ചയായും ബീറ്റ്‌റൂട്ട് സൂപ്പ് പരീക്ഷിക്കാം. വളരെ ആരോഗ്യകരമായ ഒന്നാണിത്. ഫൈബറാല്‍ സമ്പന്നമായ ബീറ്റ്‌റൂട്ട് നിങ്ങളുടെ ശരീരഭാരം കുറയ്ക്കാന്‍ സഹായിക്കുന്നു. കൂടാതെ, ഇത് നിങ്ങളുടെ വയര്‍ കൂടുതല്‍ നേരം നിറഞ്ഞുനില്‍ക്കാനും സഹായിക്കുന്നു. ഭക്ഷണത്തില്‍ ബീറ്റ്‌റൂട്ട് ഉള്‍പ്പെടുത്തുന്നത് കലോറി കുറയ്ക്കാനും ഫലപ്രദമാണ്.

ആവിയില്‍ വേവിച്ച പച്ചക്കറികള്‍

പച്ചക്കറികള്‍ കഴിക്കുന്നതിലൂടെ നിങ്ങള്‍ക്ക് പല വിധത്തിലുള്ള ആരോഗ്യ ഗുണങ്ങള്‍ ലഭിക്കുന്നു. എന്നാല്‍ ചില പച്ചക്കറികള്‍ ആവിയില്‍ വേവിച്ച് കഴിക്കുന്നതിലൂടെ കൂടുതല്‍ ഗുണം ലഭിക്കും. ബ്രോക്കോളി, കാപ്‌സിക്കം, കടല, കാരറ്റ് തുടങ്ങിയവ ആവിയില്‍ വേവിച്ച് കഴിക്കുന്നത് ഏറെ ഫലപ്രദമാണ്. ഈ പച്ചക്കറികള്‍ വളരെ ആരോഗ്യകരവും എളുപ്പത്തില്‍ നിങ്ങളുടെ ഭക്ഷണത്തിന്റെ ഭാഗമാകാന്‍ കഴിയുന്നതുമാണ്. പ്രായമായ ഒരു വ്യക്തിക്ക് ആവശ്യമായ എല്ലാ പോഷകങ്ങളും പച്ചക്കറികളില്‍ അടങ്ങിയിട്ടുണ്ട്.

പയര്‍ സൂപ്പ്

പ്രായമായവര്‍ക്ക് കഴിക്കാവുന്ന ഏറ്റവും ആരോഗ്യകരമായ സൂപ്പര്‍ഫുഡുകളില്‍ ഒന്നാണ് പയര്‍ സൂപ്പ്. ഇത് പ്രോട്ടീന്‍ നിറഞ്ഞതും പ്രായമായവര്‍ക്ക് വളരെ പ്രയോജനപ്രദവുമാണ്. നല്ല ദഹനത്തിനായി ചുവന്ന പയര്‍ സൂപ്പ് കഴിക്കാം. ദിവസം മുഴുവന്‍ ഇത് ആരോഗ്യവും നല്‍കുന്നു. ദിവസവും ധാരാളം വെള്ളവും കുടിക്കുക. തേങ്ങാവെള്ളം പോലുള്ള ഇലക്ട്രോലൈറ്റ് അടങ്ങിയ വെള്ളം കുടിക്കാന്‍ ശ്രമിക്കുക. അമിതമായ മധുരവും എരിവുമുള്ള ഭക്ഷണങ്ങള്‍ ഒഴിവാക്കുക. ദഹനവ്യവസ്ഥ മെച്ചപ്പെടുത്താനും കൊളസ്‌ട്രോള്‍, രക്തത്തിലെ പഞ്ചസാരയുടെ അളവ് എന്നിവ നിയന്ത്രിക്കാനും ഇത് സഹായിക്കും.

റാഗി

റാഗി ഒരു മികച്ച സൂപ്പര്‍ഫുഡ് ആണ്. ഇതില്‍ കാല്‍സ്യം ധാരാളമായി അടങ്ങിയിട്ടുണ്ട്. അവശ്യ നാരുകളും ഇതിലുണ്ട്. റാഗി കഴിക്കുന്നത് കൊളസ്ട്രോളിന്റെ അളവ് നിയന്ത്രിക്കാന്‍ നിങ്ങളെ സഹായിക്കുന്നു. ശരീര താപനില കുറക്കാനും ഇത് ഫലപ്രദമാണ്.

ചണവിത്ത്

ചണവിത്തിന്റെ ആരോഗ്യ ഗുണങ്ങള്‍ ആളുകള്‍ മനസ്സിലാക്കാന്‍ തുടങ്ങിയതോടെ ഇതൊരു സൂപ്പര്‍ഫുഡായി മാറിയിട്ടുണ്ട്. വിവിധ പോഷകങ്ങളാല്‍ സമ്പുഷ്ടമാണ് ചണവിത്ത്. ഫൈബറും ലിഗ്‌നാനുകളും ഇതില്‍ ധാരാളമുണ്ട്. ക്യാന്‍സര്‍ സാധ്യത കുറയ്ക്കാന്‍ ലിഗ്‌നന്‍ സഹായിക്കുന്നു.

മഞ്ഞള്‍

മഞ്ഞളിന്റെ ആരോഗ്യഗുണങ്ങളെക്കുറിച്ച് നമുക്ക് നന്നായി അറിയാം. മഞ്ഞളിന് ആന്റി-ഇന്‍ഫ്‌ലമേറ്ററി ഗുണങ്ങളുണ്ട്, കൂടാതെ ആന്റിഓക്സിഡന്റുകളും ഇതില്‍ ധാരാളമുണ്ട്. ഇത് തലച്ചോറിന്റെ പ്രവര്‍ത്തനങ്ങളെ ഉത്തേജിപ്പിക്കുകയും മസ്തിഷ്‌ക രോഗങ്ങള്‍ വരാനുള്ള സാധ്യത കുറയ്ക്കുകയും ചെയ്യുന്നു. സാധാരണ ഭക്ഷണത്തിന്റെ ഭാഗമായി മഞ്ഞള്‍ കഴിക്കാം അല്ലെങ്കില്‍ ചെറുചൂടുള്ള പാലില്‍ മഞ്ഞള്‍ ചേര്‍ത്ത് കഴിക്കാം.