നാരുകള്‍ അടങ്ങിയ ഭക്ഷണം പ്രധാനം

ദഹനപ്രശ്‌നങ്ങള്‍ ഉണ്ടാക്കുന്ന എല്ലാ ഭക്ഷണങ്ങളും കുടലില്‍ നിന്ന് പുറന്തള്ളുകയാണ് നാരുകള്‍ ചെയ്യുന്നത്. അസിഡിറ്റിക്കും മലബന്ധത്തിനും ഏറ്റവും പറ്റിയ പരിഹാരമാണിത്. ഭക്ഷണത്തില്‍ നാരുകള്‍ ഉള്‍പ്പെടുത്താനുള്ള ചില എളുപ്പവഴികളുണ്ട്.

ചില സമയങ്ങളില്‍ മാത്രമെ ലഭിക്കുകയുള്ളുവെങ്കിലും മാങ്ങ ഫൈബര്‍ അടങ്ങിയ നല്ലൊരു ഭക്ഷണമാണ്.
പഴുത്ത മാങ്ങ ചപ്പി കുടിയ്ക്കുന്നത് കുട്ടികള്‍ക്ക് ഇഷ്ടമുള്ള കാര്യമാണ്. എന്നാല്‍ ഇങ്ങനെ ചെയ്യുന്നതു കാണുമ്പോള്‍ ചിലപ്പോഴെങ്കിലും മുതിര്‍ന്നവര്‍ കുട്ടികളെ വഴക്കു പറയാറുണ്ട്. എന്നാല്‍ മാങ്ങ ഫൈബര്‍ അടക്കം ഉള്ളിലെത്തുവാനുള്ള ഒരു വഴിയാണിത്.

ഓറഞ്ചിലും ധാരാളം നാരുകള്‍ അടങ്ങിയിട്ടുണ്ട്. ഇവയുടെ തൊലി പൊളിച്ച ശേഷം അല്ലികള്‍ക്കു പുറത്തുള്ള ചെറിയ വെളുത്ത നാരുകള്‍ നീക്കം ചെയ്യാതെ കഴിയ്ക്കുകയാണ് നല്ലത്. ഇതാണ് പ്രധാനമായും ഓറഞ്ചില്‍ അടങ്ങിയിട്ടുള്ള നാരുകള്‍. ജ്യുസുണ്ടാക്കി കുടിയ്ക്കുന്നതിനേക്കാള്‍ ഓറഞ്ചുള്‍പ്പെടെയുള്ള എല്ലാതരം ഫലവര്‍ഗങ്ങളും അങ്ങനെ തന്നെ കഴിയ്ക്കുന്നതാണ് നല്ലത്.

സ്‌നാക്കുകളുണ്ടാക്കുമ്പോള്‍ നിലക്കടല, ചോളം എന്നിവ കൊണ്ടുണ്ടാക്കാനോ ഇവ ഉള്‍പ്പെടുത്താനോ ശ്രമിക്കുക. നിലക്കടലയും ചോളവും ഫൈബര്‍ അടങ്ങിയ ഭക്ഷണമാണ്.

സാധാരണ വൈറ്റ് ബ്രെഡ് മൈദ കൊണ്ടാണ് ഉണ്ടാക്കുന്നത്. ഇത്തരം ബ്രെഡുകള്‍ ഒഴിവാക്കി ഗോതമ്പ്, മള്‍ട്ടി ഗ്രെയിന്‍ ബ്രെഡ് എന്നിവ ഉപയോഗിക്കാന്‍ ശ്രമിക്കുക. ഇവയും ഫൈബറിന്റെ നല്ല ഉറവിടമാണ്.

കൊഴുപ്പുള്ള ഇറച്ചിയുടെ ഉപയോഗം കുറച്ച് പകരം പച്ചക്കറികളും ഫലവര്‍ഗങ്ങളും ഭക്ഷണത്തില്‍ ഉള്‍പ്പെടുത്തുക. ഇവയില്‍ ധാരാളം നാരുകള്‍ അടങ്ങിയിട്ടുണ്ട്.

ദഹനപ്രശ്‌നങ്ങള്‍ക്ക് മാത്രമല്ലാ, നാരുകള്‍ അടങ്ങിയ ഭക്ഷണം വണ്ണം കുറയ്ക്കാനും നല്ലതാണ്. അതും ആരോഗ്യം കാത്തുകൊണ്ടുതന്നെ.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.