ആദ്യം സ്‌നേഹിക്കൂ, ഭാരം താനേ കുറയും

Studies

oi-Siji

By Lakshmi

Published: Sunday, November 20, 2011, 13:27 [IST]

ഭാരം കുറയ്ക്കാനും ശരീരം നന്നാക്കാനുമെല്ലാമുള്ള കുറുക്കുവഴികള്‍ അന്വേഷിക്കുന്നവരാണ് എല്ലാവരും ഇതിനായി ഭക്ഷണം കുറയ്ക്കുന്നവരും അമിതവ്യായാമം ചെയ്യുന്നവരുമുണ്ട്. എന്നാല്‍ പുതിയൊരു ഗവേഷണത്തില്‍ കണ്ടെത്തിയിരിക്കുന്നത് സ്‌നേഹം കൊണ്ടു ശരീരത്തെ മെരുക്കാമെന്നാണ്.

മറ്റാരെയെങ്കിലും സ്‌നേഹിക്കുന്നകാര്യമല്ല പറഞ്ഞുവരുന്നത്. സ്വന്തം ശരീരത്തെ സ്‌നേഹിക്കുക, അപ്പോള്‍ അതിന് ദോഷകരമായി ഭവിക്കുന്ന ഓരോന്നും ഉപേക്ഷിക്കാന്‍ സാധിക്കും. അതായത് വലിച്ചുവാരിയുള്ള തീറ്റ, മദ്യപാനം, പുകവലി തുടങ്ങിയ ദുശ്ശീലങ്ങള്‍. ഇതൊന്നുമില്ലെങ്കില്‍ത്തന്നെ ആരോഗ്യം ഒപ്പം നില്‍ക്കും. പിന്നെ വേണ്ടവിധത്തിലുള്ള വ്യായാമവും കൂടിയാകുമ്പോള്‍ ആരോഗ്യവും സൗന്ദര്യവുമുള്ള ശരീരത്തിനായി മറ്റൊരു വഴിയും തേടേണ്ടതില്ല.

ഇതിനായി ബോഡ് ഇമേജ് ട്രീറ്റ്‌മെന്റും മിറര്‍ എക്‌സര്‍സൈസുമെല്ലാമാണ് വിദഗ്ധര്‍ നിര്‍ദ്ദേശിക്കുന്നത്. 18നും 24നും ഇടയില്‍ പ്രായമുള്ള സ്ത്രീകളെ ഉള്‍പ്പെടുത്തിയുള്ള പഠനത്തിലാണ് ബോഡി ഇമേജ് തെറാപ്പിയുടെ സാധ്യതകള്‍ ഗവേഷകര്‍ തിരിച്ചറിഞ്ഞത്.

ഈ തെറാപ്പിയ്ക്ക് വിധേയരാവയര്‍ക്കെല്ലാം പുകവലി ഉപേക്ഷിക്കാന്‍ കഴിഞ്ഞിട്ടുണ്ടത്രേ. 43 സ്ത്രീകളെ ഉള്‍പ്പെടുത്തിയായിരുന്നു പഠനം. ഭാരം കൂടുകയും അതുമൂലം ശരീരത്തിന്റെ സൗന്ദര്യം നഷ്ടപ്പെടുകയും ചെയ്യുമെന്ന് തിരിച്ചറിഞ്ഞവര്‍ പുകവലി നിര്‍ത്താന്‍ മാനസികമായി തയ്യാറാവുകയായിരുന്നു.

സ്ത്രീകള്‍ക്ക് സ്വന്തം ശരീരത്തിലുള്ള ചിന്തതന്നെയാണ് ഇതിന് പിന്നിലെ കാരണം. ഇത്തരത്തിലുള്ള ചിന്തയില്ലാത്തവരില്‍ അതുണ്ടാക്കിയെടുക്കാനും സ്വന്തം ശരീരത്തിന്റെ സൗന്ദര്യവും പ്രാധാന്യവും അവരെ മനസ്സിലാക്കിക്കൊടുക്കാനും ബോഡി ഇമേജ് തെറാപ്പിക്കു കഴിയും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.