രക്തസമ്മര്‍ദ്ദം കുറയ്ക്കാം, ആരോഗ്യം സംരക്ഷിക്കാം; വരുത്തൂ ഈ ജീവിതശൈലീ മാറ്റങ്ങള്‍

ഉയര്‍ന്ന രക്തസമ്മര്‍ദ്ദമുള്ള രോഗികളുടെ എണ്ണം ഓരോ ദിവസവും അതിവേഗം വര്‍ദ്ധിച്ചുകൊണ്ടിരിക്കുകയാണ്. അമിതമായ ടെന്‍ഷനോ ഉത്കണ്ഠയോ മൂലമാണ് ഈ രോഗം പ്രധാനമായും ഉണ്ടാകുന്നത്. ഇതുകൂടാതെ ശരീരത്തിലെ സോഡിയം, പൊട്ടാസ്യം എന്നിവയുടെ അസന്തുലിതാവസ്ഥ മൂലവും ഹൈപ്പര്‍ടെന്‍ഷന്‍ പ്രശ്‌നം ഉണ്ടാകുന്നു. ഉയര്‍ന്ന രക്തസമ്മര്‍ദ്ദത്തെ നിശബ്ദ കൊലയാളി എന്നും വിളിക്കുന്നു. ഉയര്‍ന്ന രക്തസമ്മര്‍ദ്ദ സമയത്ത് ധമനികളിലെ രക്തസമ്മര്‍ദ്ദം വളരെയധികം വര്‍ദ്ധിക്കുന്നു. സമ്മര്‍ദ്ദം വളരെക്കാലം തുടരുകയാണെങ്കില്‍ അത് ആരോഗ്യത്തെ പ്രതികൂലമായി ബാധിക്കുന്നു.

ഇത് ഹൃദയാഘാതം, പക്ഷാഘാതം തുടങ്ങി നിരവധി രോഗങ്ങള്‍ക്കുള്ള സാധ്യതയും വര്‍ദ്ധിപ്പിക്കുന്നു. അതിനാല്‍, 30 വയസ്സിനു ശേഷം, ഓരോ വ്യക്തിയും കൃത്യമായ ഇടവേളകളില്‍ ഉയര്‍ന്ന രക്തസമ്മര്‍ദ്ദം പരിശോധിക്കണം. കൂടാതെ ഭക്ഷണശീലങ്ങളിലും ജീവിതശൈലിയിലും കാര്യമായ മാറ്റങ്ങള്‍ വരുത്തുകയും വേണം. ഹൈപ്പര്‍ടെന്‍ഷന്‍ നിയന്ത്രിക്കാന്‍ സഹായിക്കുന്ന ചില വഴികളാണ് ഈ ലേഖനത്തില്‍ പറയുന്നത്.

ശരീരഭാരം ക്രമമാക്കുക

ആരോഗ്യകരമായ ബോഡി മാസ് ഇന്‍ഡക്സ് (ബിഎംഐ) 18.5, 24.9 എന്നീ ശ്രേണിയിലാണെന്ന് നിങ്ങള്‍ക്കറിയാമോ. ശരീരഭാരം കൂടുന്നതിനനുസരിച്ച് ഒരാളുടെ രക്തസമ്മര്‍ദ്ദവും വര്‍ദ്ധിക്കുന്നു. അതിനാല്‍, നിങ്ങളുടെ ഭാരം നിയന്ത്രിക്കാന്‍ നിങ്ങള്‍ ഫിറ്റ് ആയിരിക്കുകയും സമീകൃതാഹാരം കഴിക്കുകയും ദിവസവും വ്യായാമം ചെയ്യുകയും വേണം.

സമീകൃതാഹാരം കഴിക്കുക

നിങ്ങളുടെ ഭക്ഷണ ശീലങ്ങള്‍ തെറ്റിപ്പോയിട്ടുണ്ടെങ്കില്‍, നിങ്ങളുടെ ആരോഗ്യത്തിന്റെ ചുമതല ഏറ്റെടുക്കാനും ധാരാളം പഴങ്ങളും പച്ചക്കറികളും കൊഴുപ്പ് കുറഞ്ഞ പാലുല്‍പ്പന്നങ്ങളും കഴിക്കാനുമുള്ള ശരിയായ സമയമാണിത്. ജങ്ക്, എണ്ണമയമുള്ള, പ്രോസസ് ചെയ്ത, ടിന്നിലടച്ച ഭക്ഷണങ്ങള്‍ ഒഴിവാക്കുക. പാസ്ത, പിസ്സ, ബര്‍ഗര്‍, ഫ്രഞ്ച് ഫ്രൈസ്, ചിപ്‌സ്, കൃത്രിമ മധുരമുള്ള മറ്റ് ഭക്ഷണങ്ങള്‍ എന്നിവ കഴിക്കുന്നത് ഒഴിവാക്കേണ്ടത് അത്യാവശ്യമാണ്. നിങ്ങളുടെ ഭക്ഷണ ശീലങ്ങള്‍ അറിയുന്നതിനും അവ മെച്ചപ്പെടുത്തുന്നതിനും ഒരു ഭക്ഷണ ഡയറി സൂക്ഷിക്കുക, നിങ്ങള്‍ എന്താണ് കഴിക്കുന്നതെന്ന് രേഖപ്പെടുത്തുക.

സോഡിയം കഴിക്കുന്നത് കുറയ്ക്കുക

സോഡിയത്തിന്റെ അളവ് സ്വാഭാവികമായും രക്തസമ്മര്‍ദ്ദം വര്‍ദ്ധിപ്പിക്കുന്നു. അതിനാല്‍ സോഡിയം കുറഞ്ഞ ഭക്ഷണങ്ങള്‍ മാത്രം തിരഞ്ഞെടുക്കുക. കെച്ചപ്പ് മുതല്‍ റൊട്ടി വരെ പല ഭക്ഷണങ്ങളിലും സോഡിയം മറഞ്ഞിരിക്കുന്നതിനാല്‍ ഇതെല്ലാമൊന്ന് പരിമിതപ്പെടുത്തുക. നിങ്ങളുടെ ഉപ്പ് ഉപഭോഗം ശ്രദ്ധിക്കാന്‍ ഭക്ഷണസാധന പാക്കറ്റുകളുടെ ലേബലുകള്‍ വായിച്ചുനോക്കുക.

സജീവമായിരിക്കുക

നിങ്ങള്‍ ഉദാസീനമായ ജീവിതശൈലി നയിക്കുകയാണെങ്കില്‍, നിങ്ങള്‍ എല്ലാം തെറ്റാണ് ചെയ്യുന്നത്. ആഴ്ചയില്‍ അഞ്ച് ദിവസം അരമണിക്കൂറെങ്കിലും വ്യായാമം ചെയ്യണം. നിങ്ങള്‍ക്ക് ഇഷ്ടമുള്ള ഏത് പ്രവര്‍ത്തനവും ചെയ്യാം. നീന്തല്‍, സൈക്ലിംഗ്, എയ്റോബിക്സ്, യോഗ, ജിമ്മിംഗ്, ഓട്ടം, അല്ലെങ്കില്‍ നിങ്ങള്‍ക്ക് ഇഷ്ടമുള്ള ഏതെങ്കിലും കായിക വിനോദം തിരഞ്ഞെടുക്കാന്‍ ശ്രമിക്കുക.

മദ്യം ഒഴിവാക്കുക, പുകവലി നിര്‍ത്തുക

നിങ്ങള്‍ക്ക് ഉയര്‍ന്ന രക്തസമ്മര്‍ദ്ദമുണ്ടെങ്കില്‍, മദ്യം ഒഴിവാക്കുക അല്ലെങ്കില്‍ മിതമായ അളവില്‍ മാത്രം മദ്യം കഴിക്കുക. ആരോഗ്യമുള്ള മുതിര്‍ന്നവര്‍ക്ക്, അതായത് സ്ത്രീകള്‍ക്ക് ഒരു ദിവസം ഒരു ഡ്രിങ്ക് വരെയും പുരുഷന്മാര്‍ക്ക് ഒരു ദിവസം രണ്ട് ഡ്രിങ്ക് വരെയും കഴിക്കാം. ആല്‍ക്കഹോളില്‍ കലോറി അടങ്ങിയിട്ടുണ്ടെന്ന കാര്യം ഓര്‍ക്കുക, അത് അനാവശ്യമായ ശരീരഭാരം വര്‍ദ്ധിപ്പിക്കുന്നതിന് കാരണമായേക്കാം. ഉയര്‍ന്ന രക്തസമ്മര്‍ദ്ദത്തിനുള്ള അപകട ഘടകമാണ് ഇത്. കൂടാതെ, മദ്യം ചില രക്തസമ്മര്‍ദ്ദ മരുന്നുകളുമായി ഇടപഴകുകയും നിങ്ങളുടെ ശരീരത്തിലെ മരുന്നിന്റെ അളവിനെ ബാധിക്കുകയും അല്ലെങ്കില്‍ പാര്‍ശ്വഫലങ്ങള്‍ വര്‍ദ്ധിപ്പിക്കുകയും ചെയ്യും. പുകവലി ഉപേക്ഷിക്കുന്നതിലൂടെയും രക്തസമ്മര്‍ദ്ദം സാധാരണ നിലയിലേക്ക് കൊണ്ടുവരാനും ഹൃദ്രോഗ സാധ്യത കുറയ്ക്കാനും കഴിയും.

പൊട്ടാസ്യം ഉപഭോഗം വര്‍ദ്ധിപ്പിക്കുക

പൊട്ടാസ്യം നിങ്ങളുടെ രക്തസമ്മര്‍ദ്ദം ഫലപ്രദമായി കുറയ്ക്കും. അതിനാല്‍ കൂടുതല്‍ വാഴപ്പഴം, ഉരുളക്കിഴങ്ങ്, തക്കാളി, ഓറഞ്ച് ജ്യൂസ്, കിഡ്നി ബീന്‍സ്, ഉണക്കമുന്തിരി, തക്കാളി, ചീര, ബ്രൊക്കോളി, കൂണ്‍ എന്നിവ കഴിക്കുന്നതിലൂടെ നിങ്ങളുടെ ദൈനംദിന പൊട്ടാസ്യത്തിന്റെ അളവ് വര്‍ദ്ധിപ്പിക്കുക. ദിവസവും 3,000 മുതല്‍ 3,500 മില്ലിഗ്രാം വരെ പൊട്ടാസ്യം കഴിക്കുന്നത് നിങ്ങളുടെ രക്തസമ്മര്‍ദ്ദത്തിന്റെ അളവ് ഫലപ്രദമായി കുറയ്ക്കും. എന്നിരുന്നാലും, നിങ്ങള്‍ക്ക് വൃക്ക സംബന്ധമായ പ്രശ്‌നങ്ങളുണ്ടെങ്കില്‍ പൊട്ടാസ്യം കഴിക്കുന്നതിനെക്കുറിച്ച് ഡോക്ടറുമായി സംസാരിക്കുക. കാരണം അമിതമായ പൊട്ടാസ്യം വൃക്കകള്‍ക്ക് ദോഷം ചെയ്യും.

സമ്മര്‍ദ്ദം നിയന്ത്രിക്കുക

നിങ്ങള്‍ സമ്മര്‍ദപൂരിതമായ അവസ്ഥയില്‍ ആയിരിക്കുമ്പോള്‍ ശരീരം ഹോര്‍മോണുകളുടെ ഒരു പ്രവാഹം തന്നെ ഉണ്ടാക്കുന്നു. ഈ ഹോര്‍മോണുകള്‍ നിങ്ങളുടെ ഹൃദയമിടിപ്പ് വേഗത്തിലാക്കുകയും രക്തക്കുഴലുകള്‍ ഇടുങ്ങിയതാക്കുകയും ചെയ്തുകൊണ്ട് നിങ്ങളുടെ രക്തസമ്മര്‍ദ്ദം താല്‍ക്കാലികമായി വര്‍ദ്ധിപ്പിക്കുന്നു. സമ്മര്‍ദ്ദം, ദീര്‍ഘകാലാടിസ്ഥാനത്തിലുള്ള ഉയര്‍ന്ന രക്തസമ്മര്‍ദ്ദത്തിന് കാരണമാകുന്നു എന്നതിന് തെളിവുകളൊന്നുമില്ല. എന്നാല്‍ സമ്മര്‍ദ്ദത്തോട് അനാരോഗ്യകരമായ രീതിയില്‍ പ്രതികരിക്കുന്നത് ഉയര്‍ന്ന രക്തസമ്മര്‍ദ്ദത്തിനുള്ള സാധ്യത വര്‍ദ്ധിപ്പിക്കും.

ജലാംശം നിലനിര്‍ത്തുക

പ്രതിദിനം 8 മുതല്‍ 10 ഗ്ലാസ് വരെ വെള്ളം കുടിക്കുന്നത് രക്തസമ്മര്‍ദ്ദവുമായി ബന്ധപ്പെട്ട പ്രശ്നങ്ങള്‍ കൈകാര്യം ചെയ്യുന്നതിനുള്ള ഏറ്റവും എളുപ്പമുള്ള മാര്‍ഗമാണ്. അതിനാല്‍ സ്വയം ആവശ്യത്തിന് വെള്ളം കുടിച്ച് ജലാംശം നിലനിര്‍ത്തുക.

രക്തസമ്മര്‍ദ്ദം പതിവായി നിരീക്ഷിക്കുക

രക്തസമ്മര്‍ദ്ദം നിങ്ങള്‍ വീട്ടില്‍ നിന്ന് പതിവായി നിരീക്ഷിക്കണം. പ്രത്യേകിച്ചും മരുന്നുകള്‍ കഴിക്കേണ്ടതിന്റെ ആവശ്യകത തടയാനോ നിങ്ങള്‍ ഇപ്പോള്‍ കഴിക്കുന്ന മരുന്നുകള്‍ കുറയ്ക്കാനോ ആഗ്രഹിക്കുന്നുവെങ്കില്‍ ഇത് ഫലപ്രദമായ വഴിയാണ്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.