30 കിലോ കുറച്ച് ബോളിവുഡില്‍ അരങ്ങേറ്റം; തടി കുറയ്ക്കാന്‍ സൊനാക്ഷി ശീലിച്ച മാര്‍ഗ്ഗങ്ങള്‍

ശരീരഭാരം കുറയ്ക്കാനുള്ള പ്രചോദനം

സോനാക്ഷി സിന്‍ഹ ഇപ്പോള്‍ പലരുടെയും ഫിറ്റ്‌നസ് ഐക്കണായി മാറിയിരിക്കുന്നു. ഉദാസീനമായ ജീവിതശൈലി, വ്യായാമക്കുറവ്, ജങ്ക് ഫുഡിനോടുള്ള ഇഷ്ടം എന്നിവയായിരുന്നു സൊനാക്ഷിയുടെ അമിതവണ്ണത്തിനു പിന്നിലെ പ്രധാന കാരണങ്ങള്‍. പക്ഷേ കഠിനമായ വ്യായാമവും ഡയറ്റ് പ്ലാനും ഉപയോഗിച്ച് അവള്‍ അവളുടെ അമിതവണ്ണം നിയന്ത്രിച്ചു. ശരിയായ ഭക്ഷണക്രമവും കഠിനമായ വ്യായാമവും ചേര്‍ന്നതാണ് തന്നെ ഇപ്പോഴുള്ള രൂപത്തിലേക്ക് എത്തിച്ചതെന്ന് സൊനാക്ഷി പറയുന്നു.

സല്‍മാന്‍ ഖാന് നന്ദി

വാസ്തവത്തില്‍, തന്നെ ശരീരഭാരം കുറയ്ക്കാന്‍ പ്രേരിപ്പിച്ചതിന് സല്‍മാന്‍ ഖാനോടാണ് നന്ദി പറയേണ്ടതെന്ന് സൊനാക്ഷി പറയുന്നു. തന്റെ ആദ്യ ചിത്രമായ ദബാംഗിനായി സൊനാക്ഷി 30 കിലോയാണ് കുറച്ചത്. സല്‍മാന്‍ എന്നിലെ കഴിവ് കാണുകയും ശരീരഭാരം കുറയ്ക്കാന്‍ എന്നെ സഹായിക്കുകയും ചെയ്തു. അദ്ദേഹം എന്നോട് പറഞ്ഞതിന് ശേഷമാണ് ഞാന്‍ തടി കുറയ്ക്കുന്നത് ഗൗരവമായി എടുക്കാന്‍ തുടങ്ങിയതെന്നും സൊനാക്ഷി പറയുന്നു.

കര്‍ശനമായ ഭക്ഷണക്രമം

ശരീരഭാരം നിലനിര്‍ത്താന്‍ സോനാക്ഷി കര്‍ശനമായ ഭക്ഷണക്രമമാണ് പിന്തുടരുന്നത്. ഒരു ഗ്ലാസ് ചെറുചൂടുള്ള വെള്ളവും തേനും നാരങ്ങാനീരും ഉപയോഗിച്ചാണ് സൊനാക്ഷി തന്റെ ദിവസം ആരംഭിക്കുന്നത്. കൊഴുപ്പ് കുറഞ്ഞ പാലും ധാന്യങ്ങളും ഗോതമ്പ് ടോസ്റ്റും ഉള്‍പ്പെടുന്ന നേരിയ പ്രഭാതഭക്ഷണമാണ് അവര്‍ കഴിക്കുന്നത്. ഉച്ചഭക്ഷണത്തില്‍ സൊനാക്ഷി ധാരാളം പച്ചക്കറികള്‍ കഴിക്കുന്നു. അവ അവളുടെ ശരീരത്തിന് ആവശ്യമായ എല്ലാ വിറ്റാമിനുകളും ധാതുക്കളും നല്‍കുന്നു. ദിവസത്തിനിടയ്ക്ക് ഗ്രീന്‍ ടീ കുടിക്കാറുണ്ട്. ഇത് ആന്റി ഓക്സിഡന്റുകള്‍ ശരീരത്തില്‍ നിറയ്ക്കുന്നു. വൈകുന്നേരം 6 മണിക്ക് ശേഷം സൊനാക്ഷി കാര്‍ബോഹൈഡ്രേറ്റ് അടങ്ങിയ ഭക്ഷണം കഴിക്കാറില്ല. പ്രോട്ടീന്റെ മികച്ച സ്രോതസ്സായതിനാല്‍ അത്താഴത്തിന് നട്‌സോ ചിക്കനോ കഴിക്കുന്നു.

പതിവ് വ്യായാമം

സൊനാക്ഷിക്ക് ശരീരഭാരം കുറയ്ക്കുക എന്നത് വളരെ ബുദ്ധിമുട്ടുള്ള കാര്യമായിരുന്നു. സൊനാക്ഷി തന്റെ ശരീരം മെലിഞ്ഞതായും സ്ലിം ആയും നിലനിര്‍ത്താന്‍ ദിവസത്തില്‍ രണ്ടുതവണ ജിമ്മില്‍ പോകാറുണ്ട്. അവരുടെ പരിശീലകയായ യാസ്മിന്‍ കറാച്ചിവാല അവളെ കാര്‍ഡിയോ മുതല്‍ വെയ്റ്റ് ട്രെയിനിംഗ്, ഫങ്ഷണല്‍ ട്രെയിനിംഗ്, സ്‌കിപ്പിംഗ് വരെ എല്ലാം ചെയ്യാന്‍ പ്രേരിപ്പിക്കാറുണ്ട്. ജിമ്മില്‍ സോനാക്ഷി ഒരു കൂട്ടം വര്‍ക്ക്ഔട്ടുകള്‍ ചെയ്യാന്‍ സമയം നീക്കിവയ്ക്കാറുണ്ട്. ഇടയ്ക്കിടെ നീന്താനും പോകാറുണ്ട്.

സോനാക്ഷി സിന്‍ഹയുടെ വ്യായാമം

പല ആളുകളെയും പോലെ സോനാക്ഷിയും ജിമ്മിനെ വെറുത്തിരുന്നു. ജിമ്മിലെ പരിശീലനം അത്ര എളുപ്പമായിരിക്കില്ല എന്ന് അവര്‍ക്ക് അറിയാമായിരുന്നു. പക്ഷേ, തന്റെ ശരീരത്തിനായി ദൃഢനിശ്ചയത്തോടെ തീരുമാനമെടുക്കുകയായിരുന്നു സൊനാക്ഷി. സോനാക്ഷി സിന്‍ഹ തന്റെ ശരീരവണ്ണം കുറയ്ക്കാന്‍ ഷാഹിദ് കപൂറിന്റെ പരിശീലകനെ സമീപിക്കുകയും ചെയ്തു.

* കാര്‍ഡിയോ വ്യായാമങ്ങള്‍, സൈക്ലിംഗ്, ഫങ്ഷണല്‍, വെയ്റ്റ് ട്രെയിനിംഗ്.

* നീന്തലും ടെന്നീസ് കളിക്കലും.

* ദിവസത്തില്‍ രണ്ടുതവണ ജിം വര്‍ക്ക്ഔട്ട്

* കൂടുതല്‍ വഴക്കത്തിനായി യോഗയും സ്പിന്നിംഗും

കര്‍ശനമായ ചിട്ടകള്‍

മെറ്റബോളിക് നിരക്ക് വര്‍ദ്ധിപ്പിക്കുന്നതിനായി സോനാക്ഷി ദിവസവും രണ്ട് മൂന്ന് മണിക്കൂര്‍ കൂടുമ്പോള്‍ ഭക്ഷണം കഴിക്കുന്നു. മെച്ചപ്പെട്ട മെറ്റബോളിസം വേഗത്തില്‍ ശരീരഭാരം കുറയ്ക്കാന്‍ സഹായിക്കും. കൂടാതെ, അവര്‍ ധാരാളം വെള്ളം കുടിക്കുകയും സ്വയം ജലാംശം നിലനിര്‍ത്തുകയും ചെയ്യുന്നു. ശരീരഭാരം കുറയ്ക്കാനുള്ള ദിനചര്യയുടെ വളരെ പ്രധാനപ്പെട്ട ഭാഗമാണ് ഉറക്കമെന്ന് സൊനാക്ഷി വിശ്വസിക്കുന്നു. ശരീരത്തെ ആരോഗ്യത്തോടെ നിലനിര്‍ത്താനും ദോഷകരമായ വിഷവസ്തുക്കളില്‍ നിന്ന് മുക്തമാക്കാനും ശരിയായ ഉറക്കം ആവശ്യമാണ്. നിങ്ങള്‍ ദിവസവും 8 മണിക്കൂര്‍ ഉറങ്ങുമ്പോള്‍, നിങ്ങളുടെ ശരീരം ശരിയായി പ്രവര്‍ത്തിക്കുകയും വേഗത്തില്‍ ശരീരഭാരം കുറയുകയും ചെയ്യും.