ചില ഡയറ്റ് 'കാര്യ'ങ്ങള്‍

ഡയറ്റെടുത്ത് വണ്ണം കുറയ്ക്കാന്‍ പലര്‍ക്കും അമിത ആവേശമായിരിക്കും. എന്നാല്‍ ഇത് പൂര്‍ത്തീകരിക്കാന്‍ പലര്‍ക്കും സാധിച്ചെന്നു വരില്ല. ഡയറ്റ് കൃത്യമായി പാലിക്കണമെങ്കില്‍ താഴെ പറയുന്ന ചില കാര്യങ്ങള്‍ ശ്രദ്ധിച്ചാല്‍ മതിയാകും.

ക്രാഷ് ഡയറ്റ് എടുത്ത് ആരും തടി കുറയ്ക്കാന്‍ ശ്രമിക്കരുത്. കാരണവുമുണ്ട്. പെട്ടെന്ന് തടി കുറയും. എന്നാല്‍ ആരോഗ്യമില്ലാത്ത ഒരു മെലിച്ചിലായിരിക്കും. പെട്ടെന്ന് കൊഴുപ്പു കുറയുന്നതു കൊണ്ട് ചര്‍മം വലിഞ്ഞു തൂങ്ങും. പ്രായക്കൂടുതല്‍ തോന്നിക്കും. നിറം മങ്ങും. സൗന്ദര്യം കളഞ്ഞ് തടി കുറയ്ക്കാന്‍ ആരും ആഗ്രഹിക്കുകയുമില്ല. തടി കുറയാന്‍ സമയമെടുക്കും എന്ന കാര്യം അംഗീകരിക്കുക.

തടി കുറയണമെങ്കില്‍ ജങ്ക് ഫുഡ് ഉപേക്ഷിക്കണം. എന്നാല്‍ ഇത് പെട്ടെന്ന് വേണ്ട. സാവധാനം കുറയ്ക്കുക. കാരണം വറുത്തത് ധാരാളം കഴിച്ചു കൊണ്ടിരുന്ന ഒരാള്‍ പെട്ടെന്ന് ഭക്ഷണം കുറച്ചാല്‍ ഇത് അറിയാതെ സ്‌ട്രെസ് തോത് ഉയര്‍ത്തും. വറുത്തവയുടെ അളവ് കുറയ്ക്കുകയാണ് ഏറ്റവും നല്ല വഴി.

യാതൊരു കാരണവശാലും പ്രാതല്‍ ഉപേക്ഷിക്കരുത്. കാരണം ശരീരത്തിന് ഒരു ദിവസം മുഴുവന്‍ വേണ്ട ഊര്‍ജം ലഭിക്കുന്നത് ഇതില്‍ നിന്നാണ്. വയര്‍ നിറയെ ബ്രേക്ഫാസ്റ്റാകാം. എന്നാല്‍ പോഷകഗുണമുള്ള പലതരം ഭക്ഷണങ്ങള്‍ ഉള്‍പ്പെടുത്തുകയും വേണം.

ഡയറ്റില്‍ പാനീയങ്ങള്‍ വളരെ ഗുണം ചെയ്യും. ലിക്വിഡ് ഡയറ്റ് എന്നൊരു പ്രത്യേക വിഭാഗം ഡയറ്റ് തന്നെയുണ്ട്. വെള്ളം മാത്രമല്ലാ, ജ്യുസുകള്‍, സൂപ്പ് തുടങ്ങിയവയെല്ലാം ഇതില്‍ ഉള്‍പ്പെടുന്നു. ഏതുതരം ഡയറ്റെടുത്താലും ധാരാളം വെള്ളം കുടിയ്ക്കാന്‍ ശ്രദ്ധിക്കണം.

വ്യായാമവും നല്ല ഡയറ്റിന്റെ ഒരു ഭാഗമാണ്. വ്യായാമമെന്നാല്‍ ജിമ്മില്‍ പോകണമെന്നില്ല. നടക്കുക, ഓടുക, നീന്തുക, സൈക്കിള്‍ ചവിട്ടുക തുടങ്ങിയവ നല്ല വ്യായാമങ്ങളാണ്. ഇവയ്ക്ക് പുറമെ കോണിപ്പടികള്‍ കയറിയിറങ്ങുന്നതും വീട്ടുജോലികള്‍ ചെയ്യുന്നതുമെല്ലാം വ്യായാമമുറകളില്‍ പെടും.

ഡയറ്റില്‍ ഇത്തരം കാര്യങ്ങള്‍ ശ്രദ്ധിച്ചാല്‍ ഗുണം ലഭിക്കും, തീര്‍ച്ച.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.