സ്ത്രീകള്‍ ആരോഗ്യം അവഗണിക്കരുത്

Health

oi-Saritha

By Veena

Published: Monday, December 19, 2011, 12:17 [IST]

വ്യായാമം കൊണ്ട് വണ്ണം കുറയ്ക്കാന്‍ പറഞ്ഞാല്‍ ഓ, വയസായില്ലെ, ഇനിയെന്ത് സൗന്ദര്യസംരക്ഷണം എന്ന മട്ടുണ്ട് ചില സ്ത്രീകള്‍ക്ക്. അതുകൊണ്ടു തന്നെ വ്യായാമം ചെയ്യാനും ഇവര്‍ മടികാണിക്കുന്നു. എന്നാല്‍ ശരീരസൗന്ദര്യത്തിനേക്കാള്‍ ആരോഗ്യത്തിന് വേണ്ടി വ്യായാമം ചെയ്യേണ്ടത് പ്രധാനമാണ്, അതേത് പ്രായമായാലും.

ശരീരം ഫിറ്റായിരിക്കേണ്ടത് സൗന്ദര്യത്തിന് മാത്രമല്ലാ, ആരോഗ്യത്തിനും പ്രധാനമാണ്. ശരീരവണ്ണം കൂടുമ്പോള്‍ പ്രമേഹം, ബിപി, വെരിക്കോസ് വെയിന്‍, വാതം തുടങ്ങിയ പലവിധ രോഗങ്ങള്‍ക്കും കാരണമാകുന്നുണ്ട്. അതുകൊണ്ട് അമിതവണ്ണം എപ്പോഴും ഒഴിവാക്കുവാന്‍ ശ്രദ്ധിക്കുക. ഇതിന് മിക്കവാറും വ്യായാമക്കുറവും അനാരോഗ്യകരമായ ഭക്ഷണക്രമവുമായിരിക്കും കാരണം.

ദിവസം അരമണിക്കൂര്‍ സമയം കണ്ടെത്തിയാല്‍ മതി വ്യായാമത്തിന്. ഇതു നിങ്ങളുടെ ജീവിതത്തെ തന്നെ മാറ്റിമറയ്ക്കും. പല അസുഖങ്ങളെയും ദൂരെ നിര്‍ത്തും. ഓഫീസ് ജോലിയായാലും വ്യായാമത്തിന് മാര്‍ഗമുണ്ട്. ലിഫ്റ്റ് ഉപയോഗിക്കുന്നതിന് പകരം കോണിപ്പടികള്‍ ഉപയോഗിച്ചാല്‍ നല്ലൊരു വ്യായാമവുമാകും.

മസില്‍, കൈകാല്‍ വേദന സ്ത്രീകള്‍ അവഗണിക്കരുത്. ഇത് പലപ്പോഴും അത് വളരെ ഗുരുതരമായ ആരോഗ്യപ്രശ്‌നങ്ങളിലേക്കു വഴി വയ്ക്കും. എല്ലു തേയ്മാനം തുടങ്ങിയ രോഗങ്ങള്‍ സ്ത്രീകള്‍ക്ക് വരാന്‍ സാധ്യത കൂടുതലാണ്.

ടെന്‍ഷന്‍ പുരുഷന്മാരെ അപേക്ഷിച്ച് സ്ത്രീകള്‍ക്ക് കൂടുതല്‍ പ്രശ്‌നങ്ങള്‍ വരുത്തിവയ്ക്കുമെന്ന് തെളിഞ്ഞിട്ടുണ്ട്. യോഗ, മെഡിറ്റേഷന്‍ തുടങ്ങിയവ ചെയ്യുന്നത് നിങ്ങളറിയാതെ തന്നെ നിങ്ങളില്‍ മാറ്റങ്ങള്‍ വരുത്തും.

ആരോഗ്യപ്രശ്‌നങ്ങള്‍ നിസാരമായി അവഗണിക്കുന്ന പ്രവണത മിക്കവാറും സ്ത്രീകള്‍ക്കുണ്ട്. തുടക്കത്തില്‍ ചികിത്സിച്ചു മാറ്റാവുന്ന പല രോഗങ്ങളും ഗുരുതരമാകുന്നതിന് കാരണമിതാണ്. നേരത്തെയുള്ള ചികിത്സ പരിഹാരവും എളുപ്പമാക്കുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.