നളപാചകവും ഭീമസേനനും

സ്ത്രീകള്‍ക്കും പുരുഷന്മാര്‍ക്കും പൊതുസ്വാഭാവങ്ങളേറെ. ഇരുവര്‍ക്കും പരസ്പരമറിയാത്ത ചില സ്വഭാവങ്ങളുമുണ്ടായിരിക്കും. പുരുഷനെക്കുറിച്ച് സ്ത്രീകള്‍ക്കറിയാത്ത ചില സ്വഭാവങ്ങള്‍ നോക്കൂ.

പാചകം സ്ത്രീപക്ഷമാണെന്നാണ് പൊതുവെയുള്ളൊരു ചിന്താഗതി. തന്റെ ഭര്‍ത്താവ്, അല്ലെങ്കില്‍ അച്ഛന്‍, അതുമല്ലെങ്കില്‍ സഹോദരന് പാചകം ഇഷ്ടമല്ലാ, അറിയില്ല എന്നിങ്ങനെയുള്ള ചിന്തകളുള്ളവരുണ്ട്. ഇവരിലാരെങ്കിലും ഒറ്റയ്ക്കാക്കി എവിടെയെങ്കിലും പോകാന്‍ എതിരു പറയുന്ന സ്ത്രീകള്‍ നിരത്തുന്ന പ്രധാന കാരണവും ഇതു തന്നെയാണ്. പാചകം പുരുഷന് വഴങ്ങില്ലെന്നും ചില സ്ത്രീകള്‍ കരുതും. എന്നാല്‍ തെറ്റിപ്പോയി.

പാചകം ഇഷ്ടമുള്ള, ആസ്വദിച്ചു ചെയ്യുന്ന ഒരു വലിയ വിഭാഗം പുരുഷന്മാരുണ്ട്. നളപാചകം എന്നു കേട്ടിട്ടില്ലേ. പുരാണങ്ങള്‍ വരെ വിശദീകരിക്കുന്നുണ്ട്, അസലായി പാചകം ചെയ്യുന്ന പുരുഷന്മാരെ. നളനു പുറമെ മഹാഭാരതത്തിലെ ഭീമനും വിരാടരാജാവിന്റെ കൊട്ടാരത്തില്‍ വലലന്‍ എന്ന പേരില്‍ പാചകക്കാരനായാണ് കഴിഞ്ഞു കൂടിയിരുന്നത്. സ്ത്രീക്കൊപ്പമോ അല്ലെങ്കില്‍ ഒരു പടിയോ മുന്‍പിലാണ് പാചകത്തില്‍ പുരുഷന്റെ സ്ഥാനം. പ്രധാന ഹോട്ടലുകളിലെ പാചകക്കാര്‍ മിക്കവാറും പുരുഷകേസരിമാരായിരിക്കുമെന്നത് പുരുഷന്റെ പാചകകലയ്ക്ക് ഉദാഹരണം.

കൂടുതല്‍ വികാരാധീനരാകുന്നതാര്. സംശയമെന്ത്, സ്ത്രീകള്‍ തന്നെയെന്നായിരിക്കും പലരുടെയും മറുപടി. അതുപോലെ കരച്ചിലും. പെണ്ണുങ്ങളെപ്പോലെ പോലെ കരയുക എന്നൊരു പ്രയോഗം തന്നെയുണ്ട്. ഇത്തരം കരച്ചില്‍ ബലഹീനതയായിട്ടാരിക്കും പുരുഷന്മാര്‍ കരുതുന്നത്.

എന്നാല്‍ സ്ത്രീകളേക്കാള്‍ കൂടുതല്‍ വികാരാധീനരാകുന്നത് പുരുഷന്മാരത്രെ. ഇവരിത് പുറത്തു കാണിക്കില്ലെന്നു മാത്രം. കാരണം ഇത്തരം വികാരങ്ങള്‍ തുറന്നു കാണിക്കുന്നത് തങ്ങളുടെ വിലയിടിക്കുമെന്ന് മിക്കവാറും പുരുഷന്മാര്‍ കരുതുന്നു.

സ്ത്രീകള്‍ മനസിലുള്ള സങ്കടങ്ങള്‍ കണ്ണുനീരിന്റെ രൂപത്തില്‍ കഴുകിക്കളയുന്നവരാണ്. ഇതേ സങ്കടം പുരുഷനുണ്ടെങ്കിലും ഇത് പുറത്തേക്കു കാണിക്കില്ലെന്നു മാത്രം. ഉള്ളിലിത് ഒതുക്കിപ്പിടിക്കാനായിരിക്കും ഇവരുടെ ശ്രമം. പുരുഷന്മാര്‍ പൊതുവെ മനക്കരുത്തുള്ളവരും സ്ത്രീകള്‍ ദുര്‍ബലരുമാണെന്ന വാദമായിരിക്കും മിക്കവാറും ഇതിന് പുറകില്‍.