ആണിന്റെ മനസും അറിയൂ

Relationship

oi-Saritha

By Veena

Published: Wednesday, May 23, 2012, 13:18 [IST]

മിക്കവാറും ചര്‍ച്ചകളിലും മാധ്യമങ്ങളിലും നടക്കുന്ന ചര്‍ച്ചകള്‍ സ്ത്രീകള്‍ക്ക് മുന്‍ഗണന കൊടുത്തു കൊണ്ടാകും. സ്ത്രീ ശക്തി, സ്ത്രീ പീഡനം, സ്ത്രീ സഹനം എന്നിങ്ങനെ.

സ്ത്രീയെ എങ്ങിനെ മാനിക്കണം, സ്ത്രീയെ എങ്ങനെ മനസിലാക്കണം എന്നിങ്ങനെ നീണ്ടുപോകും ഈ പട്ടിക. ഇവിടെ മനപൂര്‍വമല്ലെങ്കിലും തഴയപ്പെടുന്നത് പുരുഷനാണ്. അവനുമുണ്ട് ഒരു ഹൃദയം, വികാരവിചാരങ്ങള്‍.

പുരുഷനെ എപ്പോഴും ഒരു ഭാരംതാങ്ങിയായാണ് കണക്കാക്കാറ്. ഉത്തരവാദിത്വങ്ങളും സമ്മര്‍ദങ്ങളും നടുവൊടിക്കുമ്പോഴും തളരാതെ അവന്‍ നിന്നുകൊള്ളണമെന്നതാണ് വ്യവസ്ഥ. സങ്കടം കൂടി കണ്ണു നിറഞ്ഞാല്‍ പെണ്ണുങ്ങളെപ്പോലെ കരയുന്നുവെന്ന ദുഷ്‌പേരും.

ഭാര്യയെ മനസിലാക്കേണ്ട ഉത്തരവാദിത്വം ഭര്‍ത്താവിനുണ്ട്. ഇതുപോലെ തിരിച്ചും.

ഭര്‍ത്താവിനെ എപ്പോഴും കുറ്റപ്പെടുത്തുന്ന പ്രവണത പല ഭാര്യമാര്‍ക്കുമുണ്ട്. ഇതില്‍ നിന്നു മാറി ഭര്‍ത്താവിന്റെ നല്ല ഗുണങ്ങളിലേക്ക് കണ്ണൊന്നു പായിച്ചു നോക്കൂ. മനസു തുറന്ന് ഒന്ന് അഭിനന്ദിക്കാനും മടിക്കേണ്ട . ഇത് പര്‌സപര ബന്ധത്തിന്റെ ആഴവും പരപ്പും വര്‍ദ്ധിപ്പിക്കും.

ചിലപ്പോള്‍ ഓഫിസിലെ ടെന്‍ഷനുമായാവും ഭര്‍ത്താവ് വന്നുചേരുക. വാതില്‍ തുറക്കുമ്പോഴേക്കും വീര്‍ത്ത മുഖവുമായി ആവലാതികളുടേയും പരാതികളുടേയും കെട്ടഴിക്കാനായിരിക്കും പല ഭാര്യമാര്‍ക്കും ധൃതി.

അല്‍പം സാവകാശം കൊടുക്കുക. അങ്ങോട്ട് ആവലാതിപ്പെടുന്നതിന് പകരം ടെന്‍ഷന്റെ കാരണം ചോദിച്ചു നോക്കൂ. പരിഹാരം കാണാന്‍ പറ്റാത്ത പ്രശ്‌നമാണെങ്കിലും ഒരു ആശ്വാസവാക്ക് ഒരുപാട് ഗുണം ചെയ്യും.

സംസാരത്തിന്റെ കാര്യത്തില്‍ പലപ്പോഴും വാക്കുകള്‍ ചുരുക്കുന്നത് ഭര്‍ത്താവായിരിക്കും. ഇതിന് ചിലപ്പോള്‍ ഭാര്യ അവസരം കൊടുക്കുന്നില്ല എന്ന കാരണവുമുണ്ടാകും. അങ്ങോട്ടു പറയും പോലെ ഇങ്ങോട്ട് പറയാനുള്ള അവസരം നല്‍കുക. ഭര്‍ത്താവിനും പറയാനുണ്ടാകും, നേട്ടങ്ങളെയും കോട്ടങ്ങളെയും കുറിച്ച്, സ്വപ്‌നങ്ങളെക്കുറിച്ച്.