ദാമ്പത്യബന്ധത്തില്‍ വിള്ളല്‍ വീഴുന്നുവോ?

Published: Thursday, May 10, 2012, 15:49 [IST]

ദാമ്പത്യബന്ധത്തില്‍, വിള്ളല്‍ വീണുവെന്നൊക്കെ വേണമെങ്കില്‍ അച്ചടി ഭാഷയില്‍ പറയാം. ഈ വിള്ളലിന്റെ തുടക്കം മനസിലാക്കാന്‍ എന്തെങ്കിലും വഴിയുണ്ടോയെന്നാണ് കണ്ടുപിടിക്കേണ്ടത്. എല്ലാറ്റിനുമെന്ന പോലെ ഇതിനുമുണ്ടാകും ചില ലക്ഷണങ്ങളും ലക്ഷണക്കേടുകളും.

പരസ്പരം സംശയിക്കുന്നത് ദാമ്പത്യത്തകര്‍ച്ചയുടെ ആദ്യലക്ഷണമാണ്. സ്‌നേഹത്തിനൊപ്പം പരസ്പര വിശ്വാസവും ദാമ്പത്യബന്ധത്തില്‍ പ്രധാനമാണ്. പങ്കാളിയുടെ ഫോണ്‍ ഒളിച്ചു പരിശോധിക്കുക, സംശയത്തിന്റെ പേരില്‍ ഇന്റര്‍നെറ്റ് അക്കൗണ്ടുകള്‍ പരിശോധിക്കുക തുടങ്ങിയവ ഈ സംശയലക്ഷത്തിന്റെ ഭാഗം മാത്രം.

പങ്കാളികള്‍ തമ്മില്‍ ഒരുമിച്ചുള്ള അവസരങ്ങളില്‍ മറ്റെയാളെ അവഗണിച്ച് ഫോണിലോ കമ്പ്യൂട്ടറിലോ മുഴുകിയിരിക്കുന്നതും ബന്ധത്തിന്റെ തകര്‍ച്ചയുടെ ലക്ഷണം തന്നെയാണ്. പരസ്പരമുള്ള ആശയവിനിമയം നല്ലൊരു ബന്ധത്തിന്റെ അടിസ്ഥാനമാണ്. പരസ്പരമുള്ള അവഗണന ആര്‍ക്കും അത്ര സുഖമായി തോന്നുകയുമില്ല. ഇരുവര്‍ക്കും സ്വന്തമായി സ്വകാര്യത വേണം. എന്നാല്‍ ഇത് ഒരുമിച്ചുള്ള സമയം കവര്‍ന്നാകരുത്.

ഭാര്യയാണെങ്കിലും ഭര്‍ത്താവണെങ്കിലും ഒറ്റയ്ക്ക് യാത്ര പോവുക, ഒറ്റയ്ക്ക് ഹോബി കണ്ടെത്തുക തുടങ്ങിയവയും നല്ല ബന്ധത്തിന്റെ അടിസ്ഥാനം കളയും. ബന്ധങ്ങള്‍ വഷളാകുമെന്നതിന്റെ ഉദാഹരണമാണിത്.