'പഴിക്കേണ്ടത് മാതാപിതാക്കളെയല്ല'

Relationship

oi-Saritha

By Veena

Published: Friday, March 23, 2012, 15:31 [IST]

വഴക്കടിക്കുമ്പോള്‍ പരസ്പരം മാതാപിതാക്കളെ പഴി ചാരുന്ന സ്വഭാവം ചിലര്‍ക്കുണ്ട്. സ്വന്തം മാതാപിതാക്കളെ പറ്റി പറയുന്നത് ആര്‍ക്കായാലും ഇഷ്ടപ്പെടില്ലെന്നു മനസിലാക്കുക. നമ്മുടെ തെറ്റുകള്‍ക്കും ശരികള്‍ക്കും പലപ്പോഴും നാം മാത്രമായിരിക്കും ഉത്തരവാദി. ഇതില്‍ കഴിവതും മറ്റുള്ളവരെ കുറ്റപ്പെടുത്താതിരിക്കുക. വളര്‍ത്തുദോഷം എന്ന് പരസ്പരം പഴി ചാരാതിരിക്കുക. സംഗതി കൂടുതല്‍ ഗൗരവമാകും.

വിവാഹജീവിതത്തിന്റെ ഉത്തരവാദിത്വം കാത്തു സൂക്ഷിക്കാനുള്ള ചുമതല സ്ത്രീയ്ക്കും പുരുഷനും തുല്യമാണ്. അതുകൊണ്ടുതന്നെ പ്രശ്‌നങ്ങളുണ്ടാകുമ്പോള്‍ ഒരാളെ മാത്രം പഴി പറയുന്ന ശീലം നല്ലതുമല്ല. നല്ലതിനും ചീത്തക്കും ഉത്തരവാദിത്വം തുല്യമായി ഏല്‍ക്കാന്‍ ശ്രമിക്കുക. പൊതുവായ പ്രശ്‌നങ്ങള്‍ വരുമ്പോള്‍ വഴക്കിട്ട് കൈകഴുകുന്ന ശീലം നല്ലതല്ല.

മറ്റുള്ളവരുടെ ജീവിതവും സാഹചര്യങ്ങളുമായി തങ്ങളുടേത് താരതമ്യം ചെയ്യാന്‍ നോക്കുന്നത് പലപ്പോഴും വഴക്കിന് കാരണമാകാറുണ്ട്. ഓരോരുത്തരും അവരുടേതായ ജീവിതമാണ് ജീവിച്ചു തീര്‍ക്കേണ്ടത് എന്ന ബോധ്യം ഉള്ളിലുണ്ടാകണം.

അമിതപ്രതീക്ഷകളാണ് പലപ്പോഴും വഴക്കിനുള്ള മൂലകാരണമാകാറ്. ഇത്തരം പ്രതീക്ഷകള്‍ വച്ചു പുലര്‍ത്താത്തതാണ് ഒരുറപ്പുമില്ലാത്ത ജീവിതത്തില്‍ സമാധാനമായി ജീവിക്കാനുള്ള വഴിയെന്ന കാര്യം മനസില്‍ അടിവരയിട്ട് ഉറപ്പിക്കുക.