സൗന്ദര്യപ്പിണക്കം വഴി തെറ്റാതിരിക്കാന്‍..

Published: Friday, March 23, 2012, 15:26 [IST]

ഭാര്യാഭര്‍ത്താക്കന്മാര്‍ക്കിടയില്‍ സൗന്ദര്യപ്പിണക്കങ്ങള്‍ സാധാരണയാണ്. ഇത്തരം സൗന്ദര്യപ്പിണക്കങ്ങള്‍ പരസ്പരമുള്ള അടുപ്പവും സ്‌നേഹവും വര്‍ദ്ധിക്കുമെന്നും പറയാറുണ്ട്. എന്നാല്‍ ചില ചെറിയ തെറ്റുകള്‍ ഇത്തരം പിണക്കങ്ങളെ വലിയ പ്രശ്‌നമാക്കി മാറ്റും.

ഭാര്യയും ഭര്‍ത്താവും തമ്മില്‍ ഒരുമിച്ചിരുന്നു സംസാരിച്ചാല്‍ തീരാവുന്ന പ്രശ്‌നങ്ങളേയുള്ളൂ. അവസാനം ഇത് ഡൈവോഴ്‌സ് വരെയെത്തി എന്നു പലരുടെ കാര്യത്തിലും നാം പറഞ്ഞു കേള്‍ക്കാറുമുണ്ട്. ഒരു ജീവിതത്തെ ഇരു കരകളിലാക്കി നിര്‍ത്തുന്ന ഇത്തരം തെറ്റുകളെക്കുറിച്ച് ഒന്നറിഞ്ഞിരിക്കുന്നതു നല്ലതല്ലേ.

ആദ്യമായി ശ്രദ്ധിക്കേണ്ട ഒരു കാര്യമുണ്ട്. ഒരു പ്രധാന കാര്യം. ഭാര്യാഭര്‍ത്താക്കന്മാര്‍ തമ്മിലുള്ള വഴക്കിലേക്ക് ഒരിക്കലും മൂന്നാമതൊരാളെ വലിച്ചിഴയ്‌ക്കേണ്ട കാര്യമില്ല. ഇത് പ്രശ്‌നം കൂടുതല്‍ വഷളാക്കാനേ ഉപകരിക്കൂ. മിക്കവാറും പിണക്കങ്ങള്‍ ഭാര്യയും ഭര്‍ത്താവും ഒരുമിച്ചിരുന്ന് അല്‍പസമയം സംസാരിച്ചാല്‍ തീരാവുന്നതേയുള്ളൂ.

ഒരു വിധത്തില്‍ പറഞ്ഞാല്‍ എല്ലാ പ്രശ്‌നങ്ങളുടേയും മൂലകാരണം ഈഗോയാണ്. ആദ്യം ഭര്‍ത്താവ് മിണ്ടട്ടെ, അല്ലെങ്കില്‍ ഭാര്യ മിണ്ടട്ടേ എന്ന ഈഗോ വേണ്ട. ചെറിയൊരു വിട്ടുവീഴ്ച ചിലപ്പോള്‍ വലിയ ഫലം തന്നുവെന്നു വരും. പിണക്കമവസാനിപ്പിക്കാന്‍ മുന്നിട്ടിറങ്ങുക.

താനാണ് വലുത് എന്ന ചിന്ത വേണ്ട. അത് സ്ത്രീയായാലും പുരുഷനായാലും. ഇരുകൂട്ടര്‍ക്കും അവരുടേതായ പ്രത്യേകതകളും സ്വഭാവ സവിശേഷതകളുമുണ്ട്. ഇരു കൂട്ടരും ഇത് അംഗീകരിച്ച് പ്രവര്‍ത്തിച്ചാല്‍ വഴക്കുകള്‍ ഒഴിവാക്കാന്‍ കഴിയും.