ഗര്‍ഭകാലത്ത് വയറുവേദനയെങ്കില്‍...

Pre Natal

oi-Saritha

By Veena

Updated: Monday, August 13, 2012, 15:10 [IST]

ഗര്‍ഭകാലത്ത് പല ശാരീരിക അസ്വസ്ഥതകളും തോന്നും. ശരീരത്തിലുണ്ടാകുന്ന വേദനകള്‍ ഇതില്‍ ചിലതാണ്. വയറുവേദന, കൈകാല്‍ വേദന, നടുവേദന ഇങ്ങനെ പോകുന്നു ഈ വേദനകളുടെ പട്ടിക.

ഗര്‍ഭത്തിന്റെ തുടക്കത്തില്‍ പലര്‍ക്കും വയറുവേദന അനുഭവപ്പെടുന്നത് സ്വാഭാവികം. ഇത് സാധാരണമാണ്. യൂട്രസ് വലിയുന്നതാണ് ഇതിന് കാരണം. ഗര്‍ഭത്തിന്റെ രണ്ട്, മൂന്ന് ഘട്ടങ്ങളിലും ഇതുണ്ടാകാറുണ്ട്. കുഞ്ഞിന്റെ വലിപ്പത്തിനനുസരിച്ച് ഗര്‍ഭപാത്രത്തിന് വലിപ്പം വര്‍ദ്ധിക്കുന്നതാണ് ഇതിനും കാരണം.

എന്നാല്‍ ഇത്തരം വേദനകള്‍ തുടരെത്തുടരെ അനുഭവപ്പെടുകയാണെങ്കില്‍ ഇതല്‍പം ഗൗരവമായിത്തന്നെ എടുക്കണം. കാരണം മാസം തികയാതെയുള്ള പ്രസവത്തിന്റെ ലക്ഷണം കൂടിയാകാം ഇത്തരം വേദനകള്‍.

ഇത് സാധാരണ വേദന മാത്രമാണെങ്കില്‍ പരിഹാരവുമുണ്ട്. വളഞ്ഞോ കുനിഞ്ഞോ ഇരിക്കാതെ നിവര്‍ന്നിരിക്കാന്‍ ശ്രമിക്കുക. നടക്കുന്നതും അധികനേരം ഒരിടത്തു തന്നെ ഇരിക്കാതിരിക്കുന്നതും നല്ലതാണ്.

കാലുവേദന, മസില്‍ കയറുക തുടങ്ങിയവ ഗര്‍ഭകാലത്തുണ്ടാകുന്ന പ്രധാന വേദനയാണ്. ഇതിന് വ്യക്തമായ കാരണം ഇതുവരെ കണ്ടെത്തിയിട്ടില്ലെന്നതാണ് വാസ്തവം. കാലു വേദനയുള്ളവര്‍ക്ക് ഡോക്ടര്‍മാര്‍ വൈറ്റമിന്‍, ഫോളിക് ആസിഡ് എന്നിവ നിര്‍ദേശിക്കാറുണ്ട്.

കാലുവേദനയുള്ളവര്‍ ഇക്കാരണം പറഞ്ഞ് അധികസമയം ഇരിക്കാതെ നടക്കുന്നത് നല്ലതാണ്. കാരണം മസില്‍ കയറുന്നതിനും കാലുവേദന കുറയ്ക്കുന്നതിനും പറ്റിയ വ്യായാമമാണിത്. കാല്‍ താഴേക്കു തൂക്കിയിടാതെ ഉയര്‍ത്തി വച്ച് ഇരിക്കാന്‍ ശ്രദ്ധിക്കുക. ആവശ്യത്തിന് ഉറങ്ങുന്നതും മസില്‍ കയറുന്നതു പോലുള്ള പ്രശ്‌നങ്ങള്‍ പരിഹരിക്കാന്‍ സഹായിക്കും.