സിസേറിയന്‍ സത്യങ്ങള്‍ തിരിച്ചറിയൂ

'ഒരു കുഴപ്പവുമില്ലായിരുന്നു, എന്നിട്ടും സിസേറിയന്‍ നടത്തി. പൈസ കിട്ടാനുള്ള അടവുകള്‍' . എന്ന് പലപ്പോഴും പഴി ചാരുന്നവരെ കാണാം.

ഗര്‍ഭകാലത്ത് പൊതുവെ പ്രശ്‌നങ്ങളില്ലാതിരിക്കുകയാണെങ്കിലും ചിലപ്പോള്‍ പ്രസവസമയത്ത് അത്യാവശ്യമായി സിസേറിയന്‍ വേണ്ടി വരുന്ന സന്ദര്‍ഭങ്ങള്‍ ഉണ്ടാകാറുണ്ട്.

പ്ലാസന്റയുടെ സ്ഥാനം ശരിയല്ലെങ്കില്‍ സിസേറിയന്‍ വേണ്ടി വന്നേക്കാം. ഇക്കാര്യം നേരത്തെ സ്‌കാനിംഗിലൂടെ അറിയാനും കഴിയും.

സാധാരണ ഗതിയില്‍ പ്ലാസന്റയുടെ സ്ഥാനം ഗര്‍ഭപാത്രത്തിന് മുകളിലാണ്. ചിലപ്പോള്‍ ഇത് ഗര്‍ഭപാത്രത്തിന് താഴെയോ ഗര്‍ഭപാത്രം മൂടിയോ വളരും. ഇത്തരം സന്ദര്‍ഭങ്ങളില്‍ സാധാരണ പ്രസവം നടക്കാന്‍ ബുദ്ധമുട്ടാണ്. കാരണം ഗര്‍ഭാശയ ഗളം വികസിക്കുമ്പോള്‍ പ്ലാസന്റ വേര്‍പെടാനും അമിതമായ രക്തസ്രാവം ഉണ്ടാകാനും സാധ്യതയുണ്ട്.

യഥാസ്ഥാനത്ത് വളരുന്ന പ്ലാസന്റയാണെങ്കിലും ചിലപ്പോള്‍ പ്രസവസമയത്ത് പ്രശ്‌നങ്ങളുണ്ടാകും. സാധാരണയായി കുഞ്ഞ് പുറത്തേക്കു പോന്ന ശേഷമാണ് മറുപിള്ള വേര്‍പെടാറ്. എന്നാല്‍ പ്ലാസന്റ ആദ്യം വേര്‍പെട്ട് പുറത്തേക്കു പോകുകയാണെങ്കില്‍ രക്തസ്രാവമുണ്ടാകും. കുഞ്ഞിന് ശ്വാസം കിട്ടാന്‍ ബുദ്ധിമുട്ട് ഉണ്ടാവുകയും ചെയ്യും. ഇത്തരം സന്ദര്‍ഭങ്ങളില്‍ ചിലപ്പോള്‍ അടിയന്തിര ശസ്ത്രക്രിയ വേണ്ടി വന്നേക്കാം.

കുഞ്ഞിന്റെ സ്ഥാനം ശരിയല്ലെങ്കിലും സിസേറിയന്‍ വേണ്ടി വന്നേക്കാം. തലയാണ് താഴേക്ക് ആദ്യം വരേണ്ടത്. ഇങ്ങനെ വരാതിരിക്കുമ്പോഴും സിസേറിയന്‍ വേണ്ടി വന്നേക്കും. കുഞ്ഞിന്റെ സ്ഥാനം ശരിയല്ലെങ്കില്‍ സിസേറിയന്‍ വേണ്ടി വരുമെന്ന് ഡോക്ടര്‍മാര്‍ മുന്‍കൂട്ടി പറയാറുണ്ട്.