ഗര്‍ഭകാലത്തും വ്യായാമമാകാം

വ്യായാമം ചെയ്യുന്ന ഗര്‍ഭിണികളില്‍ മാസം തികയാതെയുള്ള പ്രസവത്തിനുള്ള സാധ്യത മറ്റുളള ഗര്‍ഭിണികളേക്കാള്‍ പകുതിയാണെന്നാണ് കണക്കുകള്‍ കാണിക്കുന്നത്. ഗര്‍ഭകാലത്തെ ടെന്‍ഷനുകള്‍ കുറയ്ക്കാനും വ്യായാമം സഹായിക്കുന്നുണ്ട്.

വ്യായാമം ചെയ്യുമ്പോള്‍ ഗര്‍ഭിണികള്‍ ശ്രദ്ധിക്കേണ്ട ചില കാര്യങ്ങളുണ്ടെന്നു മാത്രം. മരത്തിന്റെ തറയിലോ കാര്‍പ്പെറ്റിലോ നിന്ന് വ്യായാമം ചെയ്യുന്നതാണ് നല്ലത്.

കൂടുതല്‍ സ്‌ട്രെച്ചിംഗ് വ്യായാമങ്ങള്‍ ഒഴിവാക്കണം. ആദ്യം വാം അപ് ചെയ്ത ശേഷം മാത്രം ആയാസകരമായ വ്യായാമങ്ങളിലേക്ക് കടക്കുക.

ചാടിയും വല്ലാതെ കുനിഞ്ഞുമുള്ള വ്യായാമങ്ങള്‍ ഒഴിവാക്കണം. നിലത്തു നിന്ന് ഉയര്‍ന്നുള്ള വ്യായാമങ്ങള്‍ ചെയ്യുമ്പോള്‍ പെട്ടെന്ന് ചെയ്യാതെ സാവധാനം ചെയ്യുക. അല്ലെങ്കില്‍ മസില്‍ കയറുവാനും വേദനയുണ്ടാകുവാനും സാധ്യതയുണ്ട്.

വ്യായാമത്തിന് മുന്‍പും ശേഷവും ധാരാളം വെള്ളം കുടിയ്ക്കുക. വ്യായാമം കാരണം ശരീരത്തില്‍ നിന്ന് വെള്ളം നഷ്ടപ്പെടുന്നത് ഒഴിവാക്കാന്‍ ഇത് സഹായിക്കും.

ഗര്‍ഭിണിക്ക് സൗകര്യപ്രദമായ വ്യായാമങ്ങള്‍ ചെയ്യുകയാണ് ഏറ്റവും പ്രധാനം എന്നോര്‍ക്കുക.