കുട്ടികളുടെ ടെന്‍ഷന്‍ ഇല്ലാതാക്കാം

സ്‌കൂളിലാണെങ്കിലും വീട്ടിലാണെങ്കിലും പഠനത്തിനു വേണ്ടി നിര്‍ബന്ധിക്കുന്നവര്‍, നിന്നു തിരിയാന്‍ നേരമില്ലാത്ത ട്യൂഷനും മറ്റു ക്ലാസുകളും. നേരത്തെ എഴുന്നേല്‍ക്കാനുള്ള നിര്‍ബന്ധം, ഭക്ഷണം കഴിയ്ക്കാനുള്ള നിര്‍ബന്ധം..ഇങ്ങനെ പോകുന്നു ടെന്‍ഷനുണ്ടാക്കുന്ന ലിസ്റ്റുകള്‍.

മുതിര്‍ന്നവര്‍ക്കു മാത്രമല്ലാ, കുട്ടികള്‍ക്കും വേണ്ടേ ഈ ടെന്‍ഷന് ഒരു പരിഹാരം.

കുട്ടികളുടെ ടെന്‍ഷന്‍ ഒഴിവാക്കാന്‍ കൂടുതല്‍ സഹായിക്കാന്‍ സാധിക്കുക മാതാപിതാക്കള്‍ക്കു തന്നെയാണ്. കുട്ടികള്‍ക്കടുത്ത് അധികാരഭാവം കാണിക്കാതെ സൗഹൃദമനോഭാവം സൂക്ഷിക്കുക. ഇത് ഏതു കാര്യത്തിലാണെങ്കിലും. കുട്ടികളെ വഴക്കു പറയുകയോ തല്ലുകയോ ചെയ്യാതെ നല്ല രീതിയില്‍ കാര്യങ്ങള്‍ പറഞ്ഞു കൊടുത്താല്‍ തന്നെ പകുതി ടെന്‍ഷന്‍ ഒഴിവാക്കാം.

ഓരോ കുട്ടിക്കും താല്‍പര്യമുള്ള ഏതെങ്കിലും പ്രത്യേക മേഖലകള്‍ കാണും. ഇത് പഠിക്കാനോ ചെയ്യാനോ ഉള്ള സാഹചര്യം കുട്ടിക്കുണ്ടാക്കിക്കൊടുക്കുക.

കുട്ടികള്‍ക്കൊപ്പം സമയം ചെലവഴിക്കാന്‍ സമയം കണ്ടെത്താന്‍ മാതാപിതാക്കള്‍ ശ്രദ്ധിക്കുക. സ്വന്തം ഇഷ്ടാനിഷ്ടങ്ങള്‍ അടിച്ചേല്‍പ്പിക്കാനുള്ള യന്ത്രങ്ങളല്ല കുട്ടികളെന്നു മനസിലാക്കുക.

അവധി ദിനങ്ങളില്‍ കുട്ടികളെ കൂട്ടി ഉല്ലാസയാത്ര പോകുന്നത് കുട്ടികള്‍ക്കും മാതാപിതാക്കള്‍ക്കും മാനസിക ഉല്ലാസം നല്‍കുന്ന ഒന്നാണ്. കുട്ടികള്‍ക്ക് കൂടി താല്‍പര്യമുള്ള സ്ഥലങ്ങള്‍ തെരഞ്ഞെടുക്കണം.

നല്ല കാര്യങ്ങളില്‍ കുട്ടികളെ അഭിനന്ദിക്കുകയും കൊച്ചു കൊച്ചു സമ്മാനങ്ങള്‍ വാങ്ങിക്കൊടുക്കുകയും ചെയ്യുക. ഇത് കുട്ടികള്‍ക്കും സന്തോഷം നല്‍കും.

യോഗ പോലുള്ളവ കുട്ടികള്‍ക്ക് താല്‍പര്യമുണ്ടെങ്കില്‍ അവരെ അഭ്യസിപ്പിക്കാം. ഇതും നല്ല കാര്യമാണ്.

കുട്ടികളെ എപ്പോഴും പഠിക്കാന്‍ നിര്‍ബന്ധിക്കാതെ കളിക്കാനും സമയം കൊടുക്കുക. കളിയിലൂടെ കുട്ടികള്‍ ടെന്‍ഷന്‍ മറക്കും.