കുട്ടിക്കും വേണ്ടേ വ്യായാമം?

കളിയും വ്യായാമങ്ങളും ശാരീരിക ആരോഗ്യത്തിന് മാത്രമല്ലാ, ബുദ്ധിവികാസത്തിനും സഹായിക്കുമെന്ന് ഇതെക്കുറിച്ചു നടത്തിയ പഠനങ്ങള്‍ തെളിയിച്ചിട്ടുണ്ട്. ബാസ്‌ക്കറ്റ് ബോള്‍, സ്വിമ്മിംഗ്, ടെന്നീസ്, സൈക്കിള്‍ ചവിട്ടുക, ഓടുക തുടങ്ങിയവ കുട്ടികള്‍ക്ക് ചെയ്യാവുന്ന വ്യായാമങ്ങളാണ്. ഇവ കൂടാതെ കളിയുടെ രൂപത്തില്‍ തന്നെ കുട്ടികള്‍ക്ക് ചെയ്യാവുന്ന ചില വ്യായാമങ്ങളുണ്ട്.

ബാര്‍ ഹാഗിംഗ് കുട്ടികളെ ഉയരം കൂടാന്‍ സഹായിക്കുന്ന ഒരു വ്യായാമമാണ്. പണ്ടാണെങ്കില്‍ മാവിന്റെ മുകളിലും മറ്റും തൂങ്ങിക്കിടന്ന് കളിക്കുന്ന കുട്ടികള്‍ പതിവു കാഴ്ചയായിരുന്നു. ഇപ്പോള്‍ നഗരങ്ങളില്‍ ഇത്തരം സൗകര്യങ്ങള്‍ ലഭിക്കില്ല. ഇതിന് പകരമാണ് ബാര്‍ ഹാഗിംഗ്. കുറുകെയുള്ള ബാറില്‍ കുട്ടികളെ തൂങ്ങിക്കിടന്ന് ആടാന്‍ മാതാപിതാക്കള്‍ക്കും സഹായിക്കാം.

ഇരുവശങ്ങളിലേക്കും സ്‌ട്രെച്ചിംഗ് ചെയ്യുന്നതും നല്ലൊരു വ്യായാമം തന്നെ. കാലുകള്‍ അകറ്റി വച്ച് ഇരുവശങ്ങളിലേക്കും വളഞ്ഞ് നിലം തൊടാന്‍ കുട്ടികളെ അഭ്യസിപ്പിക്കുക. കാലുകള്‍ അനക്കരുത്. ഇത് പുസ്തകങ്ങളുടെ ഭാരം പുറകില്‍ താങ്ങുന്ന കുട്ടികളുടെ നടുവേദനയും കുറയ്ക്കും.

സ്‌കിപ്പിംഗ് വിനോദം നല്‍കുന്ന മറ്റൊരു വ്യായാമം കൂടിയാണ്. ഇത് ഏകാഗ്രത വര്‍ദ്ധിപ്പിക്കാന്‍ കുട്ടികളെ സഹായിക്കും.

ഓടിക്കളിക്കാനും ഓടുവാനും കുട്ടികളെ പ്രേരിപ്പിക്കുക. ഏതെങ്കിലും പാട്ടു വച്ചു കൊടുത്ത് അതിനൊപ്പം ഓടുവാന്‍ കുട്ടികളെ പ്രേരിപ്പിക്കുക. അല്ലെങ്കില്‍ കൂട്ടു ചേര്‍ന്ന് കുട്ടികള്‍ ഓടിക്കളിക്കണം. വേണമെങ്കില്‍ മാതാപിതാക്കള്‍ക്കും ഇതില്‍ കുട്ടികള്‍ക്കൊപ്പം പങ്കെടുക്കാം.

പഠനത്തില്‍ നിന്നും വിട്ട് ഇത്തരം വിനോദങ്ങളില്‍ ഏര്‍പ്പെടുന്നത് കുട്ടികളുടെ ഉത്സാഹവും വളര്‍ച്ചയും ഒപ്പം പഠനത്തിനുള്ള കഴിവുകളും വര്‍ദ്ധിപ്പിക്കും.