സ്ത്രീകളിലെ ഹോര്‍മോണ്‍ ക്രമക്കേടുകള്‍

Published: Friday, January 6, 2012, 15:27 [IST]

സ്ത്രീ ശരീരത്തിന്റെ ശരിയായ പ്രവര്‍ത്തനത്തിന് ഹോര്‍മോണുകള്‍ അത്യാവശ്യമാണ്. എന്നാല്‍ ഹോര്‍മോണ്‍ തകരാറുകള്‍ കൂടുതലായി കണ്ടുവരുന്നതും സ്ത്രീകളിലാണ്. ആര്‍ത്തവ പ്രശ്‌നങ്ങള്‍, വന്ധ്യത തുടങ്ങിയ പല പ്രശ്‌നങ്ങള്‍ക്കും സ്ത്രീകളിലെ ഹോര്‍മോണ്‍ പ്രശ്‌നങ്ങള്‍ വഴിവയ്ക്കും.

പുരുഷന്മാരെ അപേക്ഷിച്ച് സ്ത്രീകള്‍ക്ക് തടി വയ്ക്കുവാനുള്ള സാധ്യതയും കൂടുതലാണ്. അധികം കൊഴുപ്പും ഹോര്‍മോണ്‍ പ്രശ്‌നങ്ങളുണ്ടാക്കുന്നുണ്ട്. പ്രത്യേകിച്ച് സ്ത്രീകളില്‍ വയറിന്റെ ഭാഗത്ത് കൊഴുപ്പടിഞ്ഞു കൂടുന്നത് നല്ലൊരു പ്രവണതയല്ല.

കൗമാരത്തിലെത്തിയ പെണ്‍കുട്ടികളില്‍ കണ്ടുവരുന്ന പോളിസിസ്റ്റിക് ഓവറി ഹോര്‍മോണ്‍ തകരാറു മൂലം സംഭവിക്കുന്നതാണ്. വേണ്ട സമയത്ത് ചികിത്സ ലഭിച്ചില്ലെങ്കില്‍ വന്ധ്യതയ്ക്കു വരെ കാരണമാകാവുന്ന ഒരു അവസ്ഥയാണിത്. ഗര്‍ഭധാരണം തടയുന്ന എന്‍ഡോമെട്രിയാസിസ് എന്ന രോഗത്തിനും ഹോര്‍മോണ്‍ തകരാറു തന്നെ കാരണം.

ആര്‍ത്തവക്രമക്കേടുകള്‍ക്കും ഹോര്‍മോണ്‍ കാരണമാകുന്നുണ്ട്. ആര്‍ത്തവം വരാതിരിക്കുക, ആര്‍ത്തവസമയത്തെ രക്തസ്രാവത്തിലെ ക്രമക്കേടുകള്‍ എന്നിവയ്ക്കും ഹോര്‍മോണ്‍ പ്രശ്‌നങ്ങള്‍ കാരണമാകുന്നുണ്ട്.

ചില സ്ത്രീകളില്‍ അമിതമായ രോമവളര്‍ച്ചയ്ക്കും കാരണമായി പറയുന്നത് ഹോര്‍മോണ്‍ അസന്തുലിതാവസ്ഥയാണ്.

ഭക്ഷണനിയന്ത്രണവും വ്യായാമവും സ്ത്രീകളിലെ ഹോര്‍മോണ്‍ ക്രമക്കേടുകള്‍ ഒരു പരിധി വരെ ഒഴിവാക്കും. വറുത്തതും പൊരിച്ചതുമായ ഭക്ഷണങ്ങളും കൊഴുപ്പധികമുള്ള ഭക്ഷണവും ഒഴിവാക്കണം. കൃത്യമായ വ്യായാമം വഴി ശരീരഭാരം നിയന്ത്രിക്കുന്നതും നല്ലതാണ്.