എന്റെ സഹോദരന്‍ ഞങ്ങളെ വിട്ടുപോയി! സങ്കടവാര്‍ത്ത പങ്കിട്ട് മേജര്‍ രവി! കണ്ണന്‍ പട്ടാമ്പി വിടവാങ്ങി

അഭിനേതാവും, പ്രൊഡക്ഷന്‍ കണ്‍ട്രോളറുമായ കണ്ണന്‍ പട്ടാമ്പി അന്തരിച്ചു. സംവിധായകനായ മേജര്‍ രവിയുടെ സഹോദരനാണ്. അനിയന്റെ വിയോഗത്തെക്കുറിച്ച് ഫേസ്ബുക്കിലൂടെയായി മേജര്‍ രവിയും കുറിപ്പ് പോസ്റ്റ് ചെയ്തിരുന്നു. എന്റെ പ്രിയ സഹോദരന്‍, സിനിമ പ്രൊഡക്ഷന്‍ സെക്രട്ടറി ആയിട്ടുള്ള കണ്ണന്‍ പട്ടാമ്പി ഇന്നലെ രാത്രി 11.41 ന് അന്തരിച്ചു. സംസ്‌കാരം പട്ടാമ്പി ഞാങ്ങാട്ടിരിയിലെ വീട്ടുവളപ്പില്‍, ഇന്ന് വൈകിട്ട് നാല് മണിക്ക് എന്നായിരുന്നു അദ്ദേഹം കുറിച്ചത്. സഹോദരന്റെ ഫോട്ടോയും കുറിപ്പിനൊപ്പം പോസ്റ്റ് ചെയ്തിരുന്നു.

പുനരധിവാസം, ഒടിയന്‍, പുലിമുരുകന്‍, കാണ്ഡഹാര്‍, ട്വല്‍ത്ത് മാന്‍, അനന്തഭദ്രം, ക്രേസി ഗോപാലന്‍, വെട്ടം, മിഷന്‍ 90 ഡേയ്‌സ്, കുരുക്ഷേത്ര, കിളിച്ചുണ്ടന്‍ മാമ്പഴം തുടങ്ങി 23 ല്‍ അധികം സിനിമകളില്‍ അഭിനയിച്ചിട്ടുണ്ട് കണ്ണന്‍ പട്ടാമ്പി. റേച്ചല്‍ എന്ന ചിത്രത്തിലാണ് ഒടുവിലായി അഭിനയിച്ചത്. അഭിനയം മാത്രമല്ല പ്രൊഡക്ഷന്‍ കണ്‍ട്രോളറായും പ്രവര്‍ത്തിച്ചിട്ടുണ്ട് അദ്ദേഹം.

Photo Credit: Kannan Pattambi / Facebook

എനിക്ക് എല്ലാ കാര്യങ്ങളിലും എന്റേതായ കാഴ്ചപ്പാടുകളുണ്ട്. എല്ലാം എല്ലാവരുടെ ഇഷ്ടത്തിന് അനുസരിച്ച് ആവണമെന്നില്ലല്ലോ. ചേട്ടന്‍ പറയുന്ന രാജ്യസ്‌നേഹം എന്ന് പറയുന്നത്, ഞാന്‍ വേറെ രീതിയില്‍ രാജ്യത്തെ സ്‌നേഹിക്കുന്നു. രാജ്യത്തെ ജനങ്ങളെ സ്‌നേഹിക്കുന്നു. ഇന്ത്യയിലെ ജനങ്ങളെയല്ലേ നമ്മള്‍ സ്‌നേഹിക്കേണ്ടത്. അല്ലാതെ നാല് അതിര്‍ത്തിയിലൂടെ ഓടിപ്പാഞ്ഞ് ഇന്ത്യയെ സ്‌നേഹിക്കാന്‍ പറ്റില്ലല്ലോ. അതിനുള്ളില്‍ കിടക്കുന്ന ജനങ്ങളെ സ്‌നേഹിക്കലാണല്ലോ. അത് വിഭാഗം തിരിച്ചൊന്നുമല്ല എന്നായിരുന്നു മുന്‍പൊരു അഭിമുഖത്തില്‍ കണ്ണന്‍ പട്ടാമ്പി പറഞ്ഞത്.

Credit: Filmibeat