അയ്യോ, നേരം വൈകി....

നേരത്തെ ഉറങ്ങുക

രാവിലെ എഴുനേല്‍ക്കാന്‍ വൈകുന്നത്‌ മറ്റെല്ലാം കാര്യങ്ങളും വൈകിപ്പിക്കും. അതിനാല്‍ നേരത്തെ കിടന്ന്‌ ശീലക്കുക. തലച്ചോറിന്റെ ശരിയായ പ്രവര്‍ത്തനത്തിന്‌ മതിയായ ഉറക്കം ആവശ്യമാണ്‌. അതിനാല്‍ ഇക്കാര്യം അവഗണിക്കരുത്‌.

സമയ ക്രമീകരണം

എല്ലാം കൂടി ഒരുമിച്ച്‌ ചെയ്യാന്‍ നില്‍ക്കരുത്‌. ദിവസവും ചെയ്യുന്ന കാര്യങ്ങള്‍ പൂര്‍ത്തിയാക്കാന്‍ വേണ്ടത്ര സമയം എടുത്തിട്ട്‌ ജോലിക്കു പോകാന്‍ തയ്യാറെടുക്കുക.

എഴുന്നേല്‍ക്കുമ്പോഴേ തിരക്കിട്ട്‌ പണിയെടുത്താല്‍ അങ്ങോട്ടും ഇങ്ങോട്ടും ഓടി നടക്കാം എന്നുമാത്രം.

ഓരോ ദിവസവും ചെയ്യേണ്ട കാര്യങ്ങള്‍ എന്തെല്ലാമാണന്ന്‌ ഒരു ഡയറിയില്‍ എഴുതി വയ്‌ക്കുക. ആരെ ഒക്കെ കാണണം എന്തെല്ലാം ചെയ്യണം എന്ന്‌ വളരെ വ്യക്തമായി എഴുതണം. ദിവസേന ചെയ്യേണ്ട കാര്യങ്ങളെ കുറിച്ച്‌ ഇങ്ങനെ എഴുതി സൂക്ഷിക്കുന്നത്‌ വളരെ ഗുണകരമാണ്‌.

ബാഗ്‌ നേരത്തെ തയ്യാറാക്കുക

ഓഫീസിലും കോളേജിലും മറ്റും സമയത്തിന്‌ എത്തിച്ചേരാന്‍ കഴിയുന്നില്ല എങ്കില്‍ തലേ ദിവസം രാത്രി തന്നെ ബാഗ്‌ തയ്യാറാക്കി വയ്‌ക്കാന്‍ ശീലിക്കുക. തിരക്കു പിടിച്ച്‌ ചെയ്യാന്‍ നില്‍ക്കരുത്‌.

അലാറം കേട്ടാല്‍ എഴുനേല്‍ക്കുക

അലാറം അടിക്കുമ്പോള്‍ ഓഫ്‌ ആക്കിയിട്ട്‌ വീണ്ടും കിടക്കുന്ന ശീലം ഉപേക്ഷിക്കുക. അലാറം അടിക്കുമ്പോള്‍ തന്നെ എഴുനേല്‍ക്കുക.അലാറത്തിലെ ആവര്‍ത്തിച്ച്‌ അടിക്കാനുള്ള ബട്ടണ്‍ അമര്‍ത്തുന്ന ശീലം നിര്‍ത്തുക.

ചെയ്യേണ്ട കാര്യങ്ങള്‍ ഗൗരവമായി കാണുക

ആരെ ഒക്കെ കാണണം എന്തെല്ലാം ചെയ്യണം തുടങ്ങി ഓരോ ദിവസവും ചെയ്യേണ്ട കാര്യങ്ങളെ ഗൗരവമായി എടുക്കുക. ഇത്തരത്തിലുള്ള സമീപനം കൃത്യസമയത്ത്‌ ലക്ഷ്യസ്ഥാനത്ത്‌ എത്താന്‍ നിങ്ങളെ സഹായിക്കും.

പത്ത്‌ മിനുട്ട്‌ നേരത്തെ

ക്ലോക്കിലെ സമയം പത്ത്‌ മിനുട്ട്‌ മുമ്പോട്ടാക്കി വയ്‌ക്കുക. വൈകിയെത്തുന്നതില്‍ നിന്നും രക്ഷപെടുത്താന്‍ ഇത്‌ നിങ്ങളെ സഹായിക്കും. എന്നാല്‍ പത്ത്‌ മിനുട്ടു നേരത്തെയാണ്‌ നിങ്ങള്‍ ഓരോന്നും ചെയ്യുന്നതെന്ന്‌ സ്വയം ഓര്‍ക്കാതിരിക്കുക. അത്‌ നമ്മുടെ ഉദ്ദേശത്തെ തകര്‍ക്കും.