നിങ്ങള്‍ ജോലിയെ വെറുക്കുന്നോ?

Insync

oi-Saritha

By Veena

Published: Tuesday, July 17, 2012, 12:38 [IST]

ചെയ്യുന്ന ജോലി ആസ്വദിച്ചു ചെയ്യുന്നവര്‍ വളരെ കുറവാണെന്നു തന്നെ പറയാം. ഒന്നല്ലെങ്കില്‍ മറ്റൊരു കാരണം കൊണ്ട് ജോലികള്‍ വിരസമാകാം. നിങ്ങള്‍ നിങ്ങളുടെ ജോലിയെ സ്‌നേഹിക്കുന്നില്ലെന്നു മനസിലാക്കുവാന്‍ ചില തെളിവുകള്‍ ഇതാ,

രാവിലെ എഴുന്നേല്‍ക്കാനുള്ള മടി ജോലിയിഷ്ടപ്പെടുന്നില്ലെന്നതിന്റെ ലക്ഷണവുമാകാം. ഇന്നും ജോലിക്കു പോകണമല്ലോ എന്ന തോന്നലില്‍ ഉണര്‍ന്നാലും മടി പിടിച്ചു കിടക്കുന്നവരുണ്ട്. ജോലി ഇഷ്ടപ്പെടുന്നവരാണെങ്കില്‍ ജോലിക്കു പോകണമെന്ന ചിന്ത മതി ഉന്മേഷത്തോടെ ഉണര്‍ന്നെഴുന്നേല്‍ക്കാനും ദിനകൃത്യങ്ങള്‍ ചെയ്യാനും.

ഓഫീസില്‍ സഹപ്രവര്‍ത്തകരില്‍ നിന്ന് അകലം സൂക്ഷിക്കുക, എപ്പോഴും മടുപ്പനുഭവപ്പെടുക തുടങ്ങിയവയും നിങ്ങള്‍ നിങ്ങളുടെ ജോലിയും ഓഫീസ് അന്തരീക്ഷവും ഇഷ്ടപ്പെടുന്നില്ലെന്നു തെളിയിക്കുന്ന ഒന്നാണ്. മറ്റുള്ളവര്‍ നന്നായി ജോലി ചെയ്യുമ്പോള്‍ തങ്ങള്‍ക്കതിന് കഴിയുന്നില്ലല്ലോ എന്ന തോന്നലും സഹപ്രവര്‍ത്തകരിന്‍ നിന്ന് അകലാന്‍ ഇട വരുത്തും.

ജോലി ആത്മാര്‍ത്ഥമായി ചെയ്യാന്‍ സാധിക്കാതിരിക്കുക, പുതിയ വെല്ലുവിളികള്‍ ഏറ്റെടുക്കാതിരിക്കുക എന്നതും നിങ്ങള്‍ നങ്ങളുടെ ജോലിയെ ഇഷ്ടപ്പെടുന്നില്ലെന്നതിന് തെളിവാണ്. ജോലിയില്‍ താല്‍പര്യമുള്ളവര്‍ പുതിയ പരീക്ഷണങ്ങള്‍ക്ക് എപ്പോഴും തയ്യാറാകും. അല്ലാത്തവര്‍ ചത്തതിനൊക്കുമേ എന്ന അവസ്ഥയില്‍ ഇരുന്നു ജോലി ചെയ്യുകയും ചെയ്യും.

പറഞ്ഞ ജോലി സമയത്തു തീര്‍ക്കുക എന്നത് കഴിവിന്റെ മാത്രമല്ലാ, ജോലിയോടുള്ള താല്‍പര്യത്തിന്റെ ലക്ഷണം കൂടിയാണ്. ജോലിയോട് താല്‍പര്യമുള്ളവര്‍ ഇത്തരം കാര്യങ്ങള്‍ താല്‍പര്യത്തോടെ ചെയ്യും. എന്നാല്‍ ജോലിയോട് താല്‍പര്യമില്ലാത്തവര്‍ക്ക്, ചെയ്യുന്ന ജോലി ഇഷ്ടപ്പെടാത്തവര്‍ക്ക് ഇത് വലിയ കാര്യമാകില്ല.