ബോസിനെ വീഴ്ത്തും കണ്ണുനീര്‍

Insync

oi-Saritha

By Veena

Published: Tuesday, May 22, 2012, 13:49 [IST]

ഓഫീസില്‍ കരയുന്നത് ഗുണമോ ദോഷമോ എന്ന ചോദ്യത്തിന് നല്ലതല്ലെന്നായിരിക്കും ഭൂരിപക്ഷ അഭിപ്രായവും.

കരയുന്നതിന് ദോഷങ്ങള്‍ ഏറെയാണ്. കാരണം കാര്യങ്ങളെ ധൈര്യപൂര്‍വം നേരിടാനാവാത്തവര്‍ എന്നൊരു പേര് കണ്ണുനീര്‍ വരുത്തിത്തരും. വൈകാരിക ക്ഷോഭം അടക്കാനും കാര്യങ്ങള്‍ ധൈര്യത്തോടെയും സമചിത്തതയോടെയും നേരിടാനുമുള്ള കഴിവ് ജോലി ചെയ്യുന്നതിനുള്ള പ്രധാന യോഗ്യതയായി പലരും കണക്കാക്കുന്നു.

കരച്ചിലിന് മറ്റു വശവുമുണ്ട്. ഭൂരിഭാഗവും സ്ത്രീകളായിരിക്കും കരയുക. പ്രത്യേകിച്ചും ബോസില്‍ നിന്നും വഴക്കു കേള്‍ക്കുമ്പോഴോ ജോലിയില്‍ വിമര്‍ശനങ്ങള്‍ നേരിടേണ്ടി വരുമ്പോഴോ. ബോസ് ഒരു പുരുഷനാണെങ്കില്‍ പറയാനുമില്ല. മുന്നിലിരുന്ന് ഒരു സ്ത്രീ കരയുന്നതു കാണുമ്പോള്‍ കോപം മിക്കവാറും പരിഭ്രമത്തിന് വഴി മാറും. കാരണം കണ്ണുനീരിന് മുന്നില്‍ പകച്ചുപോകുന്ന, ഉത്തരം മുട്ടുന്ന സ്വഭാവമാണ് ഭൂരിഭാഗം പുരുഷന്മാര്‍ക്കും. ഈ കരച്ചിലിന് മറ്റുള്ളവര്‍ എന്തര്‍ത്ഥം കണ്ടുപിടിക്കുമെന്ന ഭയവുമുണ്ടാകും. അതുകൊണ്ട് എത്രയും പെട്ടെന്ന് ഈ കരച്ചില്‍ നിര്‍ത്താനുള്ള വഴികളായിരിക്കും ഇവര്‍ ചിന്തിക്കുന്നതും.

ചിലര്‍ കണ്ണുനീര്‍ പ്രശ്‌നങ്ങളില്‍ നിന്നും രക്ഷപ്പെടാനുള്ള ആയുധമായി എടുക്കും. മുന്നിലിരിക്കുന്നയാള്‍ കരയുമ്പോള്‍ മറുഭാഗത്തിന് വാദിച്ചു നില്‍ക്കാന്‍ ന്യായങ്ങള്‍ ലഭിച്ചെന്നു വരില്ല.

സഹതാപം പിടിച്ചു പറ്റാനുള്ള തന്ത്രം കൂടിയാണ് കണ്ണുനീര്‍ പലര്‍ക്കും. എന്നാല്‍ പല തവണ ഈ കരച്ചില്‍ തന്ത്രം പ്രയോഗിക്കുമ്പോള്‍ കണ്ടുനില്‍ക്കുന്നവര്‍ക്ക് ഇത് അലോസരമുണ്ടാക്കുകയാകും ചെയ്യുക.

മനുഷ്യന്‍ വികാരജീവിയാണെങ്കിലും ഓഫീസിലുള്ള കരച്ചില്‍ കഴിവതും ഒഴിവാക്കുന്നതാണ് നല്ലത്. കരയാനുള്ള പ്രേരണ ശക്തമാകുകയാണെങ്കില്‍ അത് മറ്റുള്ളവര്‍ കാണ്‍കെ ചെയ്യാതിരിക്കാനും ശ്രദ്ധിക്കണം.