ഓഫീസില്‍ കരഞ്ഞാല്‍...

Published: Tuesday, May 22, 2012, 13:48 [IST]

ചിലരുണ്ട്, ഓഫീസില്‍ ബോസ് വഴക്കു പറഞ്ഞാല്‍ കരയും. വ്യക്തിപരമായ പ്രശ്‌നങ്ങളോര്‍ത്തും ഓഫീസിലിരുന്നു കരയും. ഇത് നല്ലതോ ചീത്തയോ, ഗുണം ചെയ്യുമോ അതോ ദോഷം ചെയ്യുമോ, പലരും ഇതേക്കുറിച്ച് കൂടുതല്‍ കാര്യമായി ചിന്തിച്ചു കാണില്ല.

ഓഫീസിലെ കരച്ചിലിനെ കുറിച്ച് പാശ്ചാത്യരാജ്യങ്ങള്‍ പഠനം തന്നെ നടത്തിയിട്ടുണ്ട്. ഇതില്‍ ഒന്നാംസ്ഥാനം സ്ത്രീകള്‍ക്ക് തന്നെ. 41 ശതമാനം സ്ത്രീകളും 9 ശതമാനം പുരുഷന്മാരും ജോലിസ്ഥലത്ത് കരയുന്നുവെന്നാണ് പഠനത്തില്‍ തെളിഞ്ഞത്.

പഠനത്തില്‍ തെളിഞ്ഞ ഒരു കാര്യമുണ്ട്. ഓഫിസിലെ കരച്ചില്‍ സാധാരണ സംഭവമായി മാറുകയാണ്. ഇതിന് പഠനങ്ങള്‍ വ്യക്തമായ കാരണങ്ങളും പറയുന്നുണ്ട്. മുന്‍പത്തേതിനെ അപേക്ഷിച്ച് വീട്, ഓഫീസ് അന്തരം കുറയുകയാണ്. മുന്‍പാണെങ്കില്‍ ഓഫീസിലിരുന്നാല്‍ ഓഫീസ് ജോലി, വീട്ടിലെത്തിയാല്‍ അവിടുത്തെ കാര്യം എന്ന നിലയ്ക്കായിരുന്നു കാര്യങ്ങള്‍ പോയിരുന്നത്.

ഇത്തരം വ്യത്യാസങ്ങള്‍ ഇപ്പോള്‍ കുറഞ്ഞു വരികയാണ്. കാരണം ജോലിയുടെ തരവും ജീവിതശൈലിയും പാടേ മാറിയിരിക്കുന്നു. പ്രത്യേകിച്ച് ഇന്റര്‍നെറ്റ്, മൊബൈല്‍ സൗകര്യങ്ങള്‍ വര്‍ദ്ധിച്ചതോടെ. വീട്ടിലിരുന്നും ഓഫീസ് ജോലി ചെയ്യുന്നവരുണ്ട്. ജോലിത്തിരക്കു കാരണം വീട്ടുകാര്യങ്ങളില്‍ വേണ്ട ശ്രദ്ധ കൊടുക്കാന്‍ പറ്റാത്തവരുണ്ട്. വീടും ഓഫീസും കൂടിക്കുഴയുമ്പോള്‍ പ്രശ്‌നങ്ങളും വൈകാരികക്ഷോഭങ്ങളുമുണ്ടാകുന്നത് സ്വാഭാവികം. ഇത് ചെന്നെത്തുന്നത് കണ്ണുനീരിലായിരിക്കും.