ഓണം നല്‍കുന്ന ജോലിഭാരം ഒരു ത്രില്‍

Insync

oi-Staff

By സിജി സുരേന്ദ്രന്‍

Updated: Friday, March 15, 2013, 16:50 [IST]

ഓണക്കാലത്ത് ഒട്ടേറെ ജോലിയും ചുമതലയുമുണ്ടെങ്കിലും അതില്‍ സ്ത്രീകള്‍ ഏറെ സന്തുഷ്ടരാണ്, കാരണം മറ്റൊന്നുമല്ല, ഭര്‍ത്താവായാവും മക്കളായാലും ഒരു കൈ സഹായവുമായി അവരെവിടെയുമുണ്ട്. ഇനിയില്ലെങ്കിലും പതിവായി ആരും സഹായിക്കുന്നില്ലെന്ന് പരാതി പറയുന്ന സ്ത്രീകള്‍ ആഘോഷ വേളകളില്‍ ഏത് ജോലിഭാരവും വളരെ ലളിതമായി കൈകാര്യം ചെയ്യുന്നത് കാണുകയും ചെയ്യാം

പണ്ടത്തെ കാലത്ത് അതായത് സ്ത്രീകള്‍ക്ക് ഒരുപാട് നിയന്ത്രണങ്ങള്‍ ഉണ്ടായിരുന്ന കാലത്ത് ഓണം വരുന്നത് ഒരു സ്വാതന്ത്ര്യ പ്രഖ്യാപനം പോലെയായിരുന്നു. ഉമ്മറത്തിണ്ണയില്‍പ്പോലും ഇരിക്കാന്‍ അനുവാദമില്ലാതിരുന്ന പെണ്‍കുട്ടികള്‍ക്ക് ഓണത്തിന് മുറ്റത്ത് ഒത്തുചേരാം തിരുവാതിരക്കളികളിയ്ക്കാം, ഊഞ്ഞാലാടാം എന്നുവേണ്ട അവര്‍ക്ക് ആസ്വദിക്കാന്‍ സ്വാതന്ത്ര്യത്തിന്റെ ഒട്ടേറെ മുഹൂര്‍ത്തങ്ങള്‍ നല്‍കുന്ന ഒന്നായിരുന്നു ഓണം.

ഇന്നത്തെക്കാലത്ത് സ്ത്രീകള്‍ക്ക് കുടുംബത്തില്‍ സ്വാതന്ത്ര്യമില്ലായ്മയുടെ വലിയ പ്രശ്‌നങ്ങളുണ്ടാകുന്നില്ല. വീട്ടില്‍ വരുന്ന അതിഥികളെ സല്‍ക്കരിക്കാനായാലും കുടുംബാംഗങ്ങള്‍ക്ക് ഓര്‍ത്തുവച്ച് ഓണക്കോടികള്‍ വാങ്ങിക്കാനാണെങ്കിലും മുന്നിലുണ്ടാകുന്നത് എപ്പോഴും സ്ത്രീകളാണ്.

മുമ്പത്തെക്കാലത്ത് പുരുഷന്‍ അധ്വാനിച്ചുകൊണ്ടുവരുന്ന വകകൊണ്ട് ഓണം രണ്ടറ്റവും തൊടീക്കേണ്ടവളായിരുന്നു സ്ത്രീ, അടുക്കളയിലെ ഇല്ലായ്മകളൊന്നും ഇലച്ചീന്തിലെ സദ്യയില്‍ അറിയിക്കാതെ എല്ലാകാര്യത്തിലും കയ്യടക്കം സൂക്ഷിച്ച് ലുബ്ധിച്ച് ചെയ്യേണ്ടിയിരുന്ന ഒരു കാലം.

ഇന്നിങ്ങനെയൊരു സാഹചര്യം കുറവാണ്. മിക്ക കുടുംബങ്ങളിലും സ്ത്രീയും പുരുഷനും അധ്വാനിക്കുന്നവരാണ്. ഓണാഘോഷത്തിനായി എത്രപണവും ഏത് രീതിയിലും ചെലവാക്കാന്‍ ഇന്ന് ആളുകള്‍ തയ്യാറാണ്. അതുകൊണ്ടുതന്നെ രണ്ടുപേര്‍ക്കും തുല്യമാണ് ആഘോഷങ്ങളിലെ പങ്കാളിത്തം.