സമത്വം അടുക്കളയോളം

Insync

oi-Staff

By സിജി സുരേന്ദ്രന്‍

Updated: Thursday, August 24, 2017, 11:28 [IST]

മതം ആചാരം തുടങ്ങിയ അതിവരമ്പുകള്‍ ഒഴിവാക്കിയാല്‍ എല്ലാ ആഘോഷങ്ങളും ഉത്സവങ്ങളും സാമൂഹികമായ കൂട്ടായ്മകളെ ഊട്ടിയുറപ്പിക്കാന്‍ വേണ്ടിയുള്ളതാണ്. ഒത്തുചേരലിന്റേതല്ലാതെ ഒറ്റപ്പെടലിന്റേതായി ഉത്സവങ്ങളൊന്നുമില്ല. കുടുംബ ബന്ധങ്ങളും, സാമൂഹിക ബന്ധങ്ങളും എല്ലാം പുതുക്കാനും കൂടുതല്‍ ഊഷ്മളമാക്കുവാനുമുള്ള അന്തരീക്ഷമാണ് ആഘോഷങ്ങളെല്ലാം ഒരുക്കിത്തരുന്നത്.

ഓണത്തിന്റെ കാര്യവും വ്യത്യസ്തമല്ല, ജാതി, മതം, വര്‍ഗ്ഗം എന്നുള്ള വേര്‍തിരുവകള്‍ക്കെല്ലാം അപ്പുറത്താണ് ഓണത്തിന്റെ പൊരുള്‍. സമൂഹത്തെയും പ്രകൃതിയെയും ബന്ധിപ്പിച്ചുനിര്‍ത്തുന്ന ആദൃശ്യമായ പലതും നമുക്കിതില്‍ കാണാന്‍ കഴിയും. ഓണവേളയില്‍ വിലക്കുകളും മാറ്റിനിര്‍ത്തലുകളുമെല്ലാം ഇല്ലാതാവുന്നു. കുടുംബാന്തരീക്ഷം നോക്കിയാല്‍ത്തന്നെ ഇത് കാണാന്‍ കഴിയും.

സാധാരണ ദിനങ്ങളില്‍ പൊതുവേ അടുക്കളജോലികളിലും മറ്റു വീട്ടുകാര്യങ്ങളിലും മാത്രം ശ്രദ്ധചെലുത്തി മുഷിയുന്ന അവസ്ഥയാണ് പലപ്പോഴും സ്ത്രീകള്‍ക്കുണ്ടാവുന്നത്. ജോലിക്കാരികളാണെങ്കില്‍ അതിന്റെ ഭാരം വേറെ താങ്ങണം.

എന്നാല്‍ ഓണം വരുമ്പോള്‍ അടുക്കളയെന്നത് ഒരു ഉത്സവത്തിന്റെ കേന്ദ്രമായി മാറുകയാണ്. അതുവരെ അനങ്ങാപ്പാറ നയം കാണിക്കുന്ന ആണുങ്ങള്‍ പോലും സദ്യ കാലമായോ എന്നറിയാന്‍ വേണ്ടിയെങ്കിലും അടുക്കളയില്‍ കയറുകയാണ്. പച്ചക്കറിയരിയാനും ഉപ്പേരി വറുക്കാനും എന്നുവേണ്ട പായസത്തിന് തേങ്ങ ചിരവാനും പിഴിയാനും വരെ എന്തിനും സഹായഹസ്തം വാഗ്ദാനം ചെയ്തുകൊണ്ട് അവരുണ്ട്.