വസ്ത്രത്തില്‍ വിയര്‍പ്പുകറയോ?

ചൂടുള്ള കാലാവസ്ഥയിലും വ്യായാമശേഷവുമെല്ലാം വിയര്‍ക്കുന്നത് സാധാരണമാണ്. വിയര്‍പ്പ് കുളിച്ചാല്‍ പോകുമെങ്കിലും ചിലരുടെ വസ്ത്ത്രില്‍ പറ്റിയ വിയര്‍പ്പു കറ പോകാന്‍ ബുദ്ധിമുട്ടാണ്.

വസ്ത്രത്തിലെ വിയര്‍പ്പുകറ വസ്ത്രത്തിന്റെ വൃത്തിയും ഭംഗിയും കളയുക മാത്രമല്ല, കാണുന്നവരില്‍ അരോചകത്വമുണ്ടാക്കുകയും ചെയ്യും. പ്രത്യേകിച്ച് ഇളം നിറത്തിലുള്ള വസ്ത്രങ്ങളില്‍ ഈ കറ തെളിഞ്ഞു കാണുകയും ചെയ്യാം.

വസ്ത്രത്തില്‍ നിന്നും വിയര്‍പ്പുകറ കളയാനുള്ള ചില വഴികളെക്കുറിച്ചറിയൂ,

വസ്ത്രം കഴുകുന്ന വെള്ളത്തില്‍ അല്‍പം ചെറുനാരങ്ങാനീര് കലര്‍ത്തി അല്‍പനേരം തുണി ഇതിലിട്ടു വയ്ക്കുക. ഇതിനു ശേഷം സോപ്പുമപയോഗിച്ചോ സോപ്പുപൗഡര്‍ ഉപയോഗിച്ചോ കഴുകാം.

ഒന്നോ രണ്ടോ ആസ്പിരിന്‍ ഗുളികകള്‍ അല്‍പം വെള്ളത്തിലിട്ട് ഒരു മിശ്രിതമുണ്ടാക്കുക. ഇത് വിയര്‍പ്പുകറയായ ഭാഗത്തു പുരട്ടാം. ഒന്നു രണ്ടു മണിക്കൂര്‍ കഴിഞ്ഞ് കഴുകിക്കളയാം.

തുണികള്‍ കഴുകുന്ന സോപ്പും ഹൈഡ്രജന്‍ പെറോക്‌സൈഡും ഉപയോഗിച്ച് ഒരു മിശ്രിതമുണ്ടാക്കി ഇത് കറയായ ഭാഗത്തു പുരട്ടാം. ഇത് നല്ലപോലെ ഉരച്ചു കഴുകുക.

ഉപ്പ് അല്‍പം ചൂടുവെള്ളത്തില്‍ കലര്‍ത്തുക. വിയര്‍പ്പു കറയായ വസ്ത്രഭാഗം ഇതില്‍ മുക്കി അല്‍പസമയം വയ്ക്കുക. ഇത് വെള്ളത്തില്‍ വെറുതെ കഴുകുക. പിന്നീട് സോപ്പുപയോഗിച്ചു കഴുകാം.